काठमाडौं । त्रिपुरेश्वरमा बस चालक अर्जुन दोङले आत्मदाह गरेको घटनाको निष्पक्ष छानबिनको माग गर्दै नेपाल यातायात स्वतन्त्र मजदुर संगठनले बुधबार काठमाडौंको माइतीघरमा प्रदर्शन गरेको छ।

प्रदर्शनमा सहभागी यातायात मजदुरहरूले घटनालाई सामान्य विवादका रूपमा मात्र नहेरी घटनाको सुरुदेखिको सम्पूर्ण परिस्थितिको अनुसन्धान गर्न माग गरेका छन्। उनीहरूले घटनाको वास्तविक कारण पत्ता लगाई सत्यतथ्य सार्वजनिक गर्न सम्बन्धित निकायसँग आग्रह गरेका छन्।

प्रदर्शनकारीहरूले यातायात मजदुरमाथि हुने व्यवहार, ट्राफिक व्यवस्थापन तथा कार्यस्थलमा मजदुरले भोग्दै आएका समस्याका विषयमा पनि सरकारको ध्यानाकर्षण गराएका छन्। घटनामा संलग्न पक्ष, प्रत्यक्षदर्शीको बयान, सीसीटीभी फुटेजलगायत उपलब्ध प्रमाणका आधारमा निष्पक्ष अनुसन्धान गर्नुपर्ने उनीहरूको माग छ।

यसअघि घटनाको सत्यतथ्य छानबिन गर्न काठमाडौं जिल्ला प्रशासन कार्यालयले सहायक प्रमुख जिल्ला अधिकारी कृष्णप्रसाद गैरेको संयोजकत्वमा सात सदस्यीय छानबिन समिति गठन गरेको थियो। समितिलाई सात दिनभित्र प्रतिवेदन बुझाउने जिम्मेवारी दिइएको छ।

यातायात मजदुर तथा व्यवसायीसम्बद्ध विभिन्न संघसंस्थाले पनि घटनाको विस्तृत छानबिन गरी दोषी देखिए कानुनी कारबाही गर्नुपर्ने माग गर्दै आएका छन्।

साथै मृतकका परिवारलाई राहत तथा क्षतिपूर्ति उपलब्ध गराउन पनि उनीहरूले सरकारसँग माग गरेका छन्।