काठमाडौं । दाङको घोराहीकी १२ वर्षीया बालिकालाई एचपीभी खोप लगाएपछि स्वास्थ्यमा गम्भीर समस्या देखिएको भन्दै प्रतिनिधिसभामा सरकारको ध्यानाकर्षण गराइएको छ।

नेकपा एमालेकी सांसद साजिदा खातुन सिद्दिकीले कक्षा ६ मा अध्ययनरत आयशा परबिनको स्वास्थ्य अवस्थाबारे सदनमा जानकारी गराउँदै तत्काल उपचार र उचित क्षतिपूर्तिको व्यवस्था गर्न सरकारसँग माग गरेकी हुन्।

सांसद सिद्दिकीका अनुसार एचपीभी खोप लगाएपछि बालिकाको स्वास्थ्यमा जटिलता देखिएको थियो। गम्भीर बिरामी भएपछि उनलाई राप्ती स्वास्थ्य विज्ञान प्रतिष्ठानमा नौ दिनसम्म भेन्टिलेटरसहितको आईसीयूमा राखेर उपचार गरिएको उनले बताइन्।

हाल बालिका घर फर्किए पनि हातखुट्टा चलाउन नसक्ने अवस्थामा रहेको सिद्दिकीले सदनमा जानकारी गराइन्।

उनले बालिकाको स्वास्थ्य समस्याबारे निष्पक्ष छानबिन गर्न स्वास्थ्य मन्त्रालयसँग माग गरिन्। घटनाको यथार्थ पत्ता लगाई पीडित परिवारलाई आवश्यक उपचार र उचित क्षतिपूर्ति उपलब्ध गराउनुपर्ने उनको भनाइ छ।

सांसद सिद्दिकीले रसुवामा आएको बाढीमा परी बेपत्ता भएका नागरिकको खोजी कार्यबारे पनि सरकारसँग जवाफ माग गरिन्।

बेपत्ता नागरिकको अवस्थाबारे अझै स्पष्ट जानकारी आउन नसक्नु दुःखद् भएको भन्दै उनले खोजी तथा उद्धार कार्यलाई प्रभावकारी बनाउन सरकारको ध्यानाकर्षण गराइन्।

सदनमा बोल्दै सिद्दिकीले बढ्दो महँगी र नागरिकले भोगिरहेको आर्थिक संकटको विषयसमेत उठाइन्।

दैनिक उपभोग्य वस्तुदेखि आवश्यक सेवासम्म महँगिँदा सर्वसाधारण प्रभावित भएको उनको भनाइ थियो।

‘देश महँगो भयो, हरेक कुरा महँगो हुँदै जाँदा नागरिक पिल्सिएका छन्,’ उनले भनिन्।

उनले आत्महत्याका बढ्दो घटनाप्रति समेत सरकार गम्भीर बन्नुपर्ने बताइन्।

‘आत्महत्याका घटना किन बढिरहेका छन्? सरकारले नागरिकको जीवन रक्षाका लागि कस्तो योजना बनाउँदैछ?’ उनले प्रश्न गरिन्।

नागरिकको जीवन रक्षा र दैनिक समस्याको समाधानका लागि सरकारले स्पष्ट तथा ठोस योजना ल्याएर सदन र जनतालाई जवाफ दिनुपर्ने सिद्दिकीको माग छ।