काठमाडौँ । नेपाली कांग्रेसको १५औँ महाधिवेशनमार्फत देशभर झण्डै ४४ हजार युवा पार्टीको पदाधिकारी तथा कार्यसमितिको जिम्मेवारीमा आएका छन्। कांग्रेसको नयाँ विधानअनुसार ३५ वर्षमुनिका युवालाई विभिन्न तहको संगठनमा प्रतिनिधित्व सुनिश्चित गरिएपछि ठूलो संख्यामा युवा नेतृत्वमा पुगेका हुन्।

कांग्रेसको विधान मस्यौदा समितिका सदस्यसचिव प्रताप पौडेलका अनुसार पार्टीको इतिहासमै एकैपटक यति ठूलो संख्यामा युवाले पदाधिकारी तथा सांगठनिक जिम्मेवारी पाएको यो पहिलो घटना हो। उनका अनुसार नयाँ व्यवस्थाले पार्टीको तल्लो तहदेखि केन्द्रीय संरचनासम्म युवाको सहभागिता बढाएको छ।

नयाँ विधानअनुसार प्रत्येक वडाबाट ३५ वर्षमुनिका कम्तीमा तीन जना युवालाई क्षेत्रीय प्रतिनिधिका रूपमा निर्वाचित गर्नुपर्ने व्यवस्था गरिएको छ। तीमध्ये कम्तीमा एक जना महिला हुनुपर्ने प्रावधान छ। देशभर रहेका ६ हजार ७४३ वडाबाट न्यूनतम तीन जनाका दरले २० हजार २२९ युवा क्षेत्रीय प्रतिनिधि निर्वाचित हुने आधार बनेको छ।

यद्यपि, वडामा रहेका क्रियाशील सदस्यको संख्याका आधारमा तीनदेखि सात जनासम्म युवा क्षेत्रीय प्रतिनिधि निर्वाचित हुन सक्ने व्यवस्था छ। औसतमा प्रत्येक वडाबाट पाँच जना युवा निर्वाचित भएको हिसाब गर्दा ३३ हजार ७१५ जना ३५ वर्षमुनिका युवा क्षेत्रीय प्रतिनिधिका रूपमा निर्वाचित भएका छन्।

त्यसैगरी नयाँ विधानले स्थानीय तहका वडा कार्यसमितिमा पनि युवाको प्रतिनिधित्व सुनिश्चित गरेको छ। गाउँपालिकाका प्रत्येक वडाबाट एक जना र नगरपालिकाका प्रत्येक वडाबाट दुई जना ३५ वर्षमुनिका युवा कार्यसमिति सदस्य निर्वाचित हुने व्यवस्था गरिएको छ।

नेपालमा गाउँपालिकातर्फ ३ हजार २१५ वडा रहेका छन्। ती वडाबाट एक–एक जनाका दरले ३ हजार २१५ युवा वडा कार्यसमिति सदस्य बनेका छन्। त्यस्तै, नगरपालिकातर्फका ३ हजार ५२८ वडाबाट दुई–दुई जनाका दरले ७ हजार ५६ जना युवा वडा कार्यसमिति सदस्यमा निर्वाचित भएका छन्।

यसरी कांग्रेसको नयाँ सांगठनिक संरचनामा ३३ हजार ७१५ क्षेत्रीय प्रतिनिधि र १० हजार २७१ वडा कार्यसमिति सदस्य गरी कुल ४३ हजार ९८६ युवाले प्रत्यक्ष रूपमा पदिय जिम्मेवारी पाएका छन्।

यी पदमा निर्वाचित हुन कम्तीमा दोब्बर संख्यामा उम्मेदवारबीच प्रतिस्पर्धा भएको कांग्रेसको केन्द्रीय निर्वाचन समितिका सदस्यसचिव अधिवक्ता राजु कटुवालले बताएका छन्। उनका अनुसार कांग्रेसको १५औँ महाधिवेशनअन्तर्गत विभिन्न तहमा झण्डै एक लाख युवाले उम्मेदवारी दिएर प्रतिस्पर्धा गरेका छन्।

युवा प्रतिनिधित्व वडा तहमा मात्रै सीमित छैन। निर्वाचित क्षेत्रीय प्रतिनिधिमध्येबाट गाउँपालिका तथा नगरपालिकाको कार्यसमितिमा पनि युवाको सहभागिता सुनिश्चित गरिएको छ। त्यहाँ कम्तीमा तीन जना चयन हुने व्यवस्था छ, जसमा एक जना महिला हुनुपर्ने प्रावधान छ।

त्यसैगरी प्रदेश निर्वाचन क्षेत्रको कार्यसमितिमा एक जना, संघीय निर्वाचन क्षेत्रको कार्यसमितिमा दुई जना तथा जिल्ला कार्यसमितिमा एक महिलासहित तीन जना निर्वाचित हुने व्यवस्था रहेको कांग्रेसले जनाएको छ।

कांग्रेसले केन्द्रीय महाधिवेशन प्रतिनिधि र महासमिति सदस्य छनोटमा समेत युवाका लागि छुट्टै प्रतिनिधित्व सुनिश्चित गरेको छ। प्रत्येक निर्वाचन क्षेत्रबाट कम्तीमा एक महिलासहित तीन जनाका दरले देशभरबाट ४९५ जना केन्द्रीय महाधिवेशन प्रतिनिधि चयन हुनेछन्। त्यस्तै, प्रत्येक निर्वाचन क्षेत्रबाट एक जनाका दरले १६५ जना महासमिति सदस्य चयन हुनेछन्।

नयाँ विधानअनुसार प्रत्येक निर्वाचन क्षेत्रबाट एक महिलासहित दुई जना प्रदेश प्रतिनिधि रहने व्यवस्था गरिएको छ। त्यस्तै, सातवटै प्रदेशमा दुई महिलासहित कम्तीमा पाँच जना प्रदेश कार्यसमिति सदस्य रहने प्रावधान राखिएको छ।

केन्द्रीय कार्यसमितिमा समेत पहिलोपटक प्रत्येक प्रदेशबाट एक युवा र एक युवतीका दरले कुल १४ जना युवा प्रवेश गर्ने व्यवस्था गरिएको छ। यसले कांग्रेसको सबैभन्दा माथिल्लो सांगठनिक संरचनामा पनि युवा प्रतिनिधित्व सुनिश्चित गर्नेछ।

विधान मस्यौदा समितिका सदस्यसचिव पौडेलले ठूलो संख्यामा युवाले पार्टीका विभिन्न तहमा पदिय जिम्मेवारी पाएको र करिब एक लाख युवाले महाधिवेशनमा उम्मेदवारी दिएर प्रतिस्पर्धा गरेको बताएका छन्। यसबाट कांग्रेसको संगठनमा युवाको सहभागिता उल्लेख्य रूपमा बढेको उनको दाबी छ। पौडेलले कांग्रेस अब ‘युवामय पार्टी’ बनेको बताएका छन्।