काठमाडौं। कांग्रेसको १५औँ महाधिवेशनमा गगन थापा पक्ष र शेरबहादुर देउवा समूहले छुट्टाछुट्टै मनोनयन शुल्क निर्धारण गरेका छन्।

गगन नेतृत्वको कांग्रेसले आगामी १६ देखि १९ असोजसम्म पार्टीको १५औँ महाधिवेशन गर्दैछ। अर्कोतिर, देउवा पक्षले २१ देखि २३ मंसिरसम्म समानान्तर महाधिवेशनको तयारी गरिरहेको छ। जसको नेतृत्व बीपीपुत्र शशांक कोइरालाले गरिरहेका छन्।

यी दुवै पक्षका महाधिवेशनमा उम्मेदवारी मनोनयन शुल्क पनि फरक-फरक देखिएको छ।

सार्वजनिक विवरणअनुसार गगन नेतृत्वको कांग्रेसमा सभापतिका लागि उम्मेदवारी दिन ४० हजार रुपैयाँ शुल्क तिर्नुपर्नेछ। उपसभापति र महामन्त्रीका लागि ३० हजार, सहमहामन्त्रीका लागि २० हजार र केन्द्रीय सदस्यका लागि ११ हजार रुपैयाँ शुल्क निर्धारण गरिएको छ।

त्यस्तै, प्रदेश सभापतिका लागि २० हजार र जिल्ला सभापतिका लागि १५ हजार रुपैयाँ शुल्क तोकिएको छ।

उता, समानान्तर महाधिवेशनको तयारी अघि बढाएको देउवा पक्षले पनि मनोनयन शुल्क सार्वजनिक गरिसकेको छ। देउवा पक्षको शुल्क गगन पक्षको तुलनामा केही कम देखिन्छ।

सार्वजनिक मनोनयन शुल्कअनुसार केन्द्रीय सभापतिका लागि ३० हजार रुपैयाँ तिर्नुपर्नेछ। त्यस्तै, उपसभापति र महामन्त्रीका लागि २५ हजार, सहमहामन्त्रीका लागि २० हजार र केन्द्रीय सदस्यका लागि १० हजार रुपैयाँ शुल्क निर्धारण गरिएको छ।

देउवा पक्षले प्रदेश सभापतिका लागि १० हजार र जिल्ला सभापतिका लागि ५ हजार रुपैयाँ मनोनयन शुल्क तोकेको विवरण सार्वजनिक भएको छ।

दुवै पक्षको शुल्क तुलना गर्दा गगन पक्षको तुलनामा देउवा पक्षको मनोनयन शुल्क कम छ। सभापतिमा उम्मेदवारी दिन देउवा पक्षमा गगन पक्षभन्दा १० हजार रुपैयाँ कम तिरे पुग्छ।

त्यस्तै, उपसभापति र महामन्त्री पदका लागि देउवा पक्षको महाधिवेशनमा गगन पक्षको तुलनामा ५ हजार रुपैयाँ कम शुल्क लाग्ने देखिन्छ। सहमहामन्त्रीको मनोनयन शुल्क भने दुवै पक्षमा बराबर २० हजार रुपैयाँ छ।