काठमाडाैं । भारतबाट नेपाल प्रवेश गर्ने क्रममा भारतीय सीमा सुरक्षा बल (एसएसबी) का सुरक्षाकर्मीसँग विवाद भएपछि मोरङका एक युवक कुटिएका छन्।

मोरङका कामत थरका युवक रानी नाकास्थित दशगजा क्षेत्रमा एसएसबीका सुरक्षाकर्मीसँग विवादमा परेका थिए। विवादका क्रममा उनले एसएसबीका एक जवानमाथि ढुंगा प्रहार गरेको बताइएको छ। ढुंगा लागेपछि एसएसबीका सुरक्षाकर्मीले उनलाई नियन्त्रणमा लिएका थिए।

नेपालतर्फ भागेका कामतलाई एसएसबीका सुरक्षाकर्मीले दशगजाबाट तानेर भारततर्फ लगेपछि लाठी प्रहार गर्दै कुटपिट गरेको बताइएको छ। घटनाका बेला सशस्त्र प्रहरी र नेपाल प्रहरीका सुरक्षाकर्मीसमेत घटनास्थलमा रहेको जनाइएको छ।

सामाजिक सञ्जालमा सार्वजनिक भएको घटनाको भिडियोमा नेपाली सुरक्षा टोलीले युवकलाई रोक्न खोजेको र घटनास्थलमा भेला भएका व्यक्तिहरूले उनलाई समातेको देखिन्छ। त्यसपछि एसएसबीको टोलीले उनलाई नियन्त्रणमा लिएर भारततर्फ लगेको देखिन्छ।

केही समय नियन्त्रणमा राखेर कुटपिट गरेपछि एसएसबीले कामतलाई नेपाल प्रहरीको जिम्मा लगाएको थियो। त्यसपछि इलाका प्रहरी कार्यालय रानीले उनलाई एक दिन नियन्त्रणमा राखेको थियो।

जिल्ला प्रहरी कार्यालय मोरङका प्रवक्ता डीएसपी मकेन्द्रकुमार मिश्रका अनुसार कामतलाई आइतबार उनकी श्रीमतीको रोहबरमा आफन्तको जिम्मा लगाएर घर पठाइएको छ।

प्रहरीका अनुसार कामत लागुऔषध प्रयोगकर्ता हुन्। एसएसबीसँग विवाद हुँदा पनि उनी सामान्य अवस्थामा नरहेको प्रहरीको भनाइ छ।