काठमाडौं । श्रम संस्कृति पार्टीका सांसद ध्रुवराज राईले प्रधानमन्त्री बालेन्द्र शाह संसद्मा उपस्थित भएर सांसदका प्रश्नको जवाफ कहिले दिने भन्दै सरकारसँग प्रश्न गरेका छन्।

प्रतिनिधिसभाको सोमबारको बैठकमा आकस्मिक समयमा बोल्दै राईले लामो समयदेखि रोकिएको प्रधानमन्त्रीसँगको प्रत्यक्ष प्रश्नोत्तर कार्यक्रमबारे सभामुखमार्फत सरकारको ध्यानाकर्षण गराएका हुन्।

उनले भदौ १० गतेका लागि प्रधानमन्त्रीसँग प्रश्नोत्तर कार्यक्रम तय भए पनि निर्धारित मिति बितेको लामो समयसम्म कार्यक्रम हुन नसकेको बताए।

राईले भने, ‘सदनमा सभामुखमार्फत सोध्न चाहन्छु, सरकार र सरकार प्रमुखले दिनुपर्ने जिम्मेवारी कहिले पूरा हुन्छ ?’

प्रधानमन्त्रीले संसद्मा आएर सांसदका प्रश्नको जवाफ दिनुपर्ने व्यवस्था हुँदाहुँदै त्यसलाई लामो समयसम्म अघि नबढाइएको भन्दै उनले सरकार गम्भीर हुनुपर्ने बताए।

राईले प्रधानमन्त्रीसँग प्रत्यक्ष प्रश्नोत्तरका लागि भदौ १० गते मिति तोकिएको भए पनि एक महिना बितिसक्दा पनि त्यो कार्यक्रम हुन नसकेको उल्लेख गरेका छन्। यसअघि सभामुख डोलप्रसाद अर्यालले प्रतिनिधिसभा नियमावलीअनुसार प्रधानमन्त्रीसँग प्रत्यक्ष प्रश्नोत्तरका लागि मिति तोकेका थिए।

उनले सरकारका कामकारबाहीबारे उठेका प्रश्नको जवाफ संसद्मार्फत दिनुपर्ने भन्दै त्यसमा ढिलाइ नगर्न आग्रह गरे।