काठमाडौं । वरिष्ठ पत्रकार हरि लम्सालको ७८ वर्षको उमेरमा निधन भएको छ।

फोक्सोसम्बन्धी समस्या भएपछि ह्याम्स अस्पतालमा उपचाररत लम्सालको उपचारकै क्रममा निधन भएको हो।

लम्साल नेपाल पत्रकार महासङ्घ काठमाडौं शाखाका पूर्वसभापति थिए। लामो समय पत्रकारितामा सक्रिय उनले साप्ताहिक ‘राष्ट्रवाणी’को सम्पादकीय नेतृत्वसमेत गरेका थिए। उपलब्ध अभिलेखमा पनि उनी ‘राष्ट्रवाणी’का प्रकाशक तथा सम्पादकका रूपमा उल्लेख छन्।

नेपाल पत्रकार महासङ्घका पूर्वसभापति तारानाथ दाहालले लम्सालको निधनप्रति दुःख व्यक्त गर्दै उनी नेपाली पत्रकारितामा पाँच दशकभन्दा बढी समय सक्रिय रहेको स्मरण गरेका छन्।

लम्सालका श्रीमती, दुई छोरा र दुई छोरी छन्।