काठमाडौं। दिवङ्गत पितृको सम्झनामा गरिने सोह्र श्राद्ध अर्थात् पितृ पक्ष आजदेखि विधिवत् सुरु भएको छ। आज आश्विन कृष्ण प्रतिपदा तिथिको श्राद्ध गरिँदैछ।

आश्विन कृष्ण प्रतिपदादेखि आश्विन शुक्ल प्रतिपदासम्म पर्ने १६ वटा तिथिमा पितृको सम्झनामा तर्पण, सिदादान र पिण्डदान गर्ने परम्परा रहेकाले यस अवधिलाई सोह्र श्राद्ध भनिन्छ। यसलाई अपर पक्ष वा प्रेत पक्षका रूपमा समेत चिनिन्छ।

वैदिक सनातन परम्पराअनुसार चाडपर्व, यज्ञयाग तथा अन्य शुभकार्यअघि पितृलाई श्रद्धापूर्वक सम्झने गरिन्छ। सोह्र श्राद्धका क्रममा पितृप्रति दायित्व पूरा हुने र पितृ ऋणबाट मुक्त भइने धार्मिक विश्वास छ।

काठमाडौंको पशुपतिनाथ क्षेत्रसहित विभिन्न मन्दिर तथा नदी किनारमा सोह्र श्राद्ध गर्ने गरिन्छ। तर, पछिल्ला केही दिनदेखि भइरहेको निरन्तर वर्षाका कारण यस वर्ष सोह्र श्राद्धको पहिलो दिन पशुपति क्षेत्रमा अघिल्ला वर्षमा जस्तो चहलपहल र भीड देखिएन।