काठमाडौं। बिहीबारदेखि लगातार परेको वर्षाले देशका विभिन्न ठाउँमा बाढी, पहिरो र नदी कटानको समस्या बढाएको छ। कतै बस्तीमा नदी पसेको छ, कतै पहिरोले घर पुरेको छ। सडक र पुल भत्किँदा यातायात अवरुद्ध भएको छ भने केही ठाउँमा सञ्चार सेवासमेत प्रभावित भएको छ।

पछिल्ला चार दिनमा मात्रै बाढी र पहिरोका घटनामा कम्तीमा ११ जनाको मृत्यु भएको छ। केही व्यक्ति अझै बेपत्ता छन्। घर, सडक, पुल र विद्यालयमा क्षति पुगेको छ।

कालीगण्डकीमा पानीको बहाव मनसुन अवधिकै उच्च विन्दुमा पुगेपछि पर्वत, बागलुङ र स्याङ्जामा जोखिम बढेको छ। पर्वतको जलजला गाउँपालिका–८ फर्सेमा आइतबार बिहान कालीगण्डकी बस्तीमा पस्दा २५ घर बगे। करिब ८० घर रहेको बस्तीका अन्य घर पनि जोखिममा छन्। मानवीय क्षति नभए पनि स्थानीयलाई सुरक्षित ठाउँमा सारिएको प्रहरीले जनाएको छ।

बागलुङको निसीखोला गाउँपालिका–३ मा भने पहिरोले एकै परिवारका चार जनाको ज्यान लिएको छ। घर पुरिँदा श्यामकुमारी विक र उनका तीन छोरा मनोज, मुकेश र निसान विकको मृत्यु भएको जिल्ला प्रहरी कार्यालय बागलुङले जनाएको छ। प्रहरीले तीन जनाको शव निकालिसकेको छ।

पाल्पामा पनि पहिरोले एक जनाको ज्यान गएको छ भने तीन जना बेपत्ता छन्। माथागढी गाउँपालिका–२ रुप्सेमा घर पुरिँदा घाइते भएका ७५ वर्षीय शेरबहादुर चिदीलाई स्वास्थ्यचौकी पुर्‍याएपछि चिकित्सकले मृत घोषणा गरेका थिए।

माथागढी–३ भैसकट्टामा पहिरोले दुई घर पुरिँदा ७५ वर्षीय लिलबहादुर घर्ती मगर, उनकी १७ वर्षीया छोरी दिना घर्ती मगर र छिमेकीकी १५ वर्षीया छोरी झरना घर्ती बेपत्ता छन्। उनीहरूको खोजीमा नेपाली सेना, सशस्त्र प्रहरी र नेपाल प्रहरी परिचालन भएका छन्।

म्याग्दीको अन्नपूर्ण गाउँपालिकामा पहिरोमा परी चार जनाको मृत्यु भएको छ। वडा नम्बर ३ दानामा घर पुरिँदा दुई जना र वडा नम्बर ५ मा पहिरोमा परी दुई जनाको मृत्यु भएको गाउँपालिका अध्यक्ष भारतकुमार पुनले बताएका छन्। सडक अवरुद्ध भएकाले घटनास्थल पुग्न कठिनाइ भइरहेको छ। उद्धारका लागि हेलिकप्टरको समन्वय भइरहेको छ।

वर्षाले स्याङ्जाको सेतीवेणी बजारलाई पनि डुबाएको छ। बाढीले पुल बगाएको छ। मनाङको ताल गाउँमा समेत बाढी पसेको छ। लमजुङको बेँसीसहर–चामे सडक पूर्ण रूपमा अवरुद्ध छ भने स्याङ्जामा सिद्धार्थ राजमार्ग बन्द भएको छ। कर्णालीका प्रमुख राजमार्गदेखि बागलुङका विभिन्न सडकसम्म वर्षाको असर परेको छ।

चितवनमा नारायणी नदीको बाढी भरतपुर महानगरपालिका–१ को नदी किनारको बस्तीमा पसेको छ। घरभित्र पानी पसेपछि सामानमा क्षति पुगेको छ। आसपासका विद्यालय पनि डुबानमा परेका छन्। नारायणीको पानी खतरा तहभन्दा माथि पुगेपछि बाढी पूर्वानुमान महाशाखाले सोमबारसम्म सावधानी अपनाउन आग्रह गरेको छ।

मुग्लिन–नारायणगढ सडकखण्डको सिमलतालमा त्रिशूली नदीले सडक कटान गरेको छ। कटानका कारण सडकको करिब आधा भाग भासिएको छ। अहिले त्यहाँ एकतर्फी रूपमा मात्रै सवारी सञ्चालन भइरहेको सडक डिभिजन कार्यालय भरतपुरले जनाएको छ।

वर्षाको असर मोबाइल र इन्टरनेट सेवामा पनि परेको छ। नेपाल टेलिकमका विभिन्न ठाउँमा टेलिफोन तथा इन्टरनेट सेवा अवरुद्ध भएका छन्। टेलिकमका प्रवक्ता डा. कमल लामिछानेका अनुसार समस्या कुनै एउटा क्षेत्रमा मात्र नभई ठाउँठाउँमा देखिएको छ। कतिपय ठाउँमा सेवा चले पनि गुणस्तर घटेको छ।

उता पश्चिम नेपालको हिम्लुङ हिमाल आधार शिविरमा भारी हिमपातपछि हिमपहिरो गएको छ। हिमपहिरोले बेस क्याम्पका टेन्ट पुरिँदा कम्तीमा १० जना सम्पर्कविहीन भएका छन्। आयोजकका अनुसार हिमालयन होलिडेज नेपालका आठ जना आरोही तथा सहयोगी कर्मचारी र इम्याजिन नेपाल ट्रेक्सका दुई जना किचन कर्मचारी सम्पर्कविहीन छन्।

मौसम बिग्रने चेतावनीपछि अधिकांश आरोही र कर्मचारी भने सुरक्षित रूपमा तल्लो क्षेत्रमा झरिसकेको आयोजकले जनाएको छ।