काठमाडौं । ब्रिटिस एजुकेसन ग्रुप (बीईजी) ले ‘क्लास अफ २०२६’ अन्तर्गतका विद्यार्थीको संयुक्त दीक्षान्त समारोह आयोजना गरेको छ। काठमाडौंस्थित सोल्टी होटलमा भएको कार्यक्रममा समूहअन्तर्गतका चारवटै शैक्षिक संस्थाका विद्यार्थीलाई उपाधि तथा विभिन्न शैक्षिक योग्यता प्रदान गरिएको हो।

द ब्रिटिस कलेज (टीबीसी), ब्रिटिस इन्टरनेसनल कलेज, ब्रिटिस मोडल कलेज र ब्रिटिस प्रोफेसनल कलेजका स्नातक विद्यार्थी समारोहमा सहभागी थिए। टीबीसीको १२औँ दीक्षान्त समारोहलाई यसपटक समूहस्तरीय संयुक्त कार्यक्रमका रूपमा आयोजना गरिएको थियो।

समारोहमा व्यवस्थापन, कम्प्युटिङ, सूचना प्रविधि, लेखालगायत विषयका स्नातक तथा स्नातकोत्तर तहका विद्यार्थी सहभागी थिए। एक्जिक्युटिभ एमबीए, एमबीए, एमएससी आईटी, एमएससी एडभान्स्ड कम्प्युटर साइन्स, एमएससी प्रोफेसनल एकाउन्टेन्सी, एसीसीए, बीबीए, बीएससी (अनर्स) कम्प्युटिङ, बीएससी (अनर्स) साइबर सेक्युरिटी एन्ड डिजिटल फरेन्सिक्स तथा ए लेभलका विद्यार्थीले उपाधि तथा प्रमाणपत्र प्राप्त गरे।

विद्यार्थीहरूले लिड्स बेकेट युनिभर्सिटी, युनिभर्सिटी अफ द वेस्ट अफ इङ्ल्यान्ड, कील युनिभर्सिटी, युनिभर्सिटी अफ लन्डन, एसीसीए र क्याम्ब्रिज इन्टरनेसनलसँगको शैक्षिक साझेदारीअन्तर्गत विभिन्न उपाधि तथा योग्यता हासिल गरेका हुन्।

शैक्षिक जुलुसबाट सुरु भएको समारोहमा नेपाल र बेलायतको राष्ट्रिय गान बजाइएको थियो। त्यसपछि बीईजीका समूह प्रमुख कार्यकारी अधिकृत राजेन कंडेलले पानस बालेर कार्यक्रमको औपचारिक उद्घाटन गरे।

समारोहलाई सम्बोधन गर्दै कंडेलले दीक्षित विद्यार्थीहरू समूहको ठूलो पूर्वविद्यार्थी सञ्जालमा जोडिएको बताए। उनले आगामी अध्ययन, रोजगारी तथा व्यावसायिक यात्रामा अघि बढ्दा पनि शैक्षिक संस्थासँगको सम्बन्ध कायम राख्न आग्रह गरे। विद्यार्थीको मेहनतसँगै अभिभावक र प्राध्यापकको सहयोग महत्वपूर्ण रहेको उनले उल्लेख गरे।

कार्यक्रममा द ब्रिटिस कलेजका सल्लाहकार पल क्लिभ्स एमबीई र बेलायतस्थित भुटानका प्रथम मानार्थ महावाणिज्यदूत तथा टीबीसीका पूर्वसल्लाहकार माइकल रटल्यान्ड ओबीईले विद्यार्थीलाई आगामी शैक्षिक तथा व्यावसायिक यात्राका लागि शुभकामना दिए।

लिड्स बेकेट युनिभर्सिटीका वरिष्ठ प्रतिनिधि डेभ चेस्ली पनि समारोहमा सहभागी थिए। युनिभर्सिटी अफ द वेस्ट अफ इङ्ल्यान्डका उपकुलपति प्रोफेसर स्टिभ वेस्ट सीबीई, कील युनिभर्सिटीका उपकुलपति प्रोफेसर केभिन शेकशेफ र युनिभर्सिटी अफ लन्डनका साइमन क्लियरीले भिडियो सन्देशमार्फत दीक्षित विद्यार्थीलाई बधाई दिएका थिए।

समारोहमा विभिन्न विधामा उत्कृष्ट प्रदर्शन गर्ने विद्यार्थीलाई ‘एक्सलेन्स अवार्ड्स’ प्रदान गरिएको थियो। विद्यार्थी प्रतिनिधिले आफ्नो अध्ययन र दीक्षान्तसम्मको अनुभव पनि कार्यक्रममा सुनाएका थिए।

साथै, द ब्रिटिस कलेजका कन्ट्री डाइरेक्टर अरुण कंडेलले धन्यवाद ज्ञापन गरेपछि समारोह औपचारिक रूपमा सम्पन्न भएको थियो।