काठमाडौं। श्रम तथा व्यवसायजन्य सुरक्षा विभागले श्रमिकलाई अनिवार्य रूपमा चाडपर्व खर्च उपलब्ध गराउन सबै रोजगारदाता तथा प्रतिष्ठानलाई निर्देशन दिएको छ।

चाडपर्व खर्च नपाएको भन्दै विभिन्न श्रमिकबाट गुनासो आउन थालेपछि विभागले यस्तो निर्देशन दिएको हो।

श्रम ऐन, २०७४ को दफा ३७ मा प्रचलित धर्म, संस्कृति तथा परम्पराअनुसार मनाइने चाडपर्वका लागि प्रत्येक श्रमिकले वर्षमा एकपटक आफूले खाइपाइ आएको एक महिनाको आधारभूत पारिश्रमिकबराबरको रकम चाडपर्व खर्चका रूपमा पाउने व्यवस्था छ।

ऐनले तोकेको सुविधा उपलब्ध नगराउने रोजगारदाता तथा प्रतिष्ठानविरुद्ध सम्बन्धित श्रमिकले आफ्नो कार्यक्षेत्र पर्ने श्रम तथा रोजगार कार्यालय वा श्रम तथा व्यवसायजन्य सुरक्षा विभागमा उजुरी तथा निवेदन दिन सक्ने विभागले जनाएको छ।

विभागले श्रमिकलाई इमेलमार्फत उजुरी, गुनासो तथा सुझाव पठाउन आग्रह गर्दै त्यसका लागि क्यूआर कोडको समेत व्यवस्था गरेको छ।

विभागका प्रवक्ता मणिनाथ गोपले कतिपय रोजगारदाता तथा प्रतिष्ठानले चाडपर्व खर्च उपलब्ध नगराएको गुनासो आइरहेको बताए।

उनले श्रमिकलाई कानुनअनुसारको सुविधा अनिवार्य उपलब्ध गराउन निर्देशन दिइएको र त्यसको पालना नगर्ने रोजगारदाता तथा प्रतिष्ठानमाथि श्रम ऐनअनुसार कारबाही गरिने स्पष्ट पारे।