काठमाडौं । कास्कीको पोखरामा स्कुल बस दुर्घटना हुँदा मृत्यु भएका पाँच जनामध्ये चार जनाको पहिचान खुलेको छ। दुर्घटनामा घाइते भएका १२ जनाको अस्पतालमा उपचार भइरहेको छ।

मृत्यु हुनेमा १५ वर्षीया ममता तिवारी, १३ वर्षीय असिम कँडेल, ६५ वर्षीय बाबुराम तिवारी र १५ वर्षीया सुवेच्छा तिवारी रहेका छन्। अर्की अन्दाजी १५ वर्षीया किशोरीको पहिचान खुल्न बाँकी छ।

त्यस्तै, दुर्घटनामा परेका १७ जनालाई उद्धार गरी पश्चिमाञ्चल क्षेत्रीय अस्पताल पुर्‍याइएको थियो। अस्पतालका अनुसार पाँच जनालाई मृत अवस्थामा ल्याइएको थियो भने १२ जनाको उपचार भइरहेको छ।

घाइतेमध्ये १६ वर्षीया अस्मी कँडेलको सघन उपचार कक्ष (आईसीयू) मा उपचार भइरहेको छ।

अन्य घाइतेमा १३ वर्षीया सोनिया तिवारी, १४ वर्षीया स्नेहा खत्री, १३ वर्षीय अंकित पराजुली, १५ वर्षीया स्मृति खत्री, १४ वर्षीया सुप्रिया आचार्य, १५ वर्षीया मेरिना तिवारी र १४ वर्षीया आकृति बुढाथोकी रहेका छन्।

साथै, ३१ वर्षीय अर्जुन शाही, १६ वर्षीय यमन मगर र ५७ वर्षीय तुलबहादुर गुरुङको पनि अस्पतालमा उपचार भइरहेको छ।