काठमाडौं । अमेरिकी राष्ट्रपति डोनाल्ड ट्रम्पले आगामी नोभेम्बर ३ मा हुने मध्यावधि निर्वाचनअघि इरानमाथि सैन्य आक्रमण नगर्ने घोषणा गरेका छन्। उनले युद्ध अन्त्य गर्न अमेरिका र इरानबीच सकारात्मक वार्ता भइरहेको दाबी गरेका छन्।

ट्रम्पले सामाजिक सञ्जाल ‘ट्रुथ सोसल’ मा पोस्ट गर्दै निर्वाचनअघि इरानमाथि आक्रमण नगरिने बताएका हुन्।

गत फेब्रुअरीमा अमेरिका र इजरायलले इरानमाथि हवाई आक्रमण गरेपछि युद्ध सुरु भएको थियो। युद्धका कारण ट्रम्पको लोकप्रियता घटेको छ भने पेट्रोलको मूल्यवृद्धि र जीवनयापनको लागत अमेरिकी मतदाताका प्रमुख चिन्ता बनेका छन्

त्यस्तै, रोयटर्स-इप्सोसको सर्वेक्षणअनुसार ६० प्रतिशत अमेरिकी नागरिक इरानसम्बन्धी परिस्थितिलाई ट्रम्पले सम्हालेको तरिकाप्रति असन्तुष्ट छन्। यसले आगामी निर्वाचनमा बहुमत जोगाउन प्रयासरत रिपब्लिकन सांसदहरूलाई दबाबमा पारेको छ।

ट्रम्पले निर्वाचनपछि तेलको मूल्य घट्ने अपेक्षा गरे पनि युद्ध अन्त्य गर्ने विस्तृत योजना सार्वजनिक गरेका छैनन्। युद्ध रोक्न र ऊर्जा ढुवानीको प्रमुख जलमार्ग स्ट्रेट अफ हर्मुज खुलाउन अमेरिका र इरानबीच प्रस्ताव आदानप्रदान भए पनि उनले इरानको पछिल्लो प्रस्ताव अस्वीकार गरेका छन्।

यसैबीच, इरानले युरेनियम प्रवर्द्धन नछाड्ने र आफ्नो युरेनियम सञ्चय हस्तान्तरण नगर्ने जनाएको छ। इरानको आणविक ऊर्जा सङ्गठनका प्रमुखलाई उद्धृत गर्दै त्यहाँका सरकारी सञ्चारमाध्यमले यस्तो जानकारी दिएका हुन्।

अमेरिकी उपराष्ट्रपति जेडी भान्सले इरानको युरेनियम प्रवर्द्धन क्षमतामा अर्थपूर्ण कटौती गर्नुपर्ने बताएको केही दिनपछि तेहरानको यस्तो प्रतिक्रिया आएको हो। साथै, अमेरिका र इजरायलले इरानमाथि आणविक हतियार निर्माण गर्न खोजेको आरोप लगाउँदै आएका छन्। इरानले भने उक्त आरोप अस्वीकार गर्दै आएको छ।