ललितपुर । दसैँ नजिकिँदै गर्दा ललितपुरको गुसिँगलमा दुर्गा भवानीको मूर्ति निर्माण र सजावटले तीव्रता पाएको छ ।

कलाकारहरू मूर्तिमा रङ भर्न, गहना सजाउन र देवीको आकर्षक स्वरूप तयार पार्न व्यस्त छन् ।

दसैँमा शक्तिकी प्रतीक दुर्गा भवानीको पूजा आराधना गरी मूर्ति स्थापना गर्ने परम्पराअनुसार यहाँ मूर्ति तयार पार्ने काम अन्तिम चरणमा पुगेको हो । कलाकारहरू देवीको मूर्तिलाई अन्तिम रूप दिन दिनरात खटिएका छन् ।

मूर्ति निर्माण र सजावटको चटारोसँगै गुसिँगल क्षेत्रमा दसैँको रौनक पनि बढ्न थालेको छ । चाड नजिकिएसँगै देवीको आराधना र उत्सवको तयारीले स्थानीय वातावरण दसैँमय बन्दै गएको छ ।