काठमाडौं । आफ्नै सांसद खगेन्द्र सुनारको आपराधिक अभिव्यक्तियुक्त अडियो सार्वजनिक भएपछि राष्ट्रिय स्वतन्त्र पार्टी (रास्वपा) ले अनुशासनको प्रक्रिया अघि बढाएको छ ।

पार्टीले छानबिन निष्कर्षमा नपुग्दासम्म सुनारलाई सार्वजनिक पदको हैसियतमा औपचारिक कार्यक्रममा सहभागी नहुन निर्देशन दिएको छ ।

सुनारबारे सार्वजनिक भएका विषयले पार्टीभित्रै छानबिनको आवश्यकता देखिएको रास्वपाको निर्णयबाट स्पष्ट हुन्छ । यद्यपि, पार्टीले यसलाई औपचारिक कारबाही नभई सत्यतथ्य पत्ता लगाउने प्रक्रियाका रूपमा अघि बढाएको छ ।

पार्टीका महामन्त्री विपिनकुमार आचार्यले जारी गरेको विज्ञप्तिअनुसार, केन्द्रीय अनुशासन आयोगलाई तत्काल आन्तरिक छानबिन अघि बढाउन निर्देशन दिइएको छ । अनुसन्धान प्रक्रिया प्रभावित नहोस् र पदीय नैतिकता कायम रहोस् भन्ने उद्देश्यले सुनारलाई औपचारिक कार्यक्रममा सहभागी नहुन भनिएको हो ।

विज्ञप्तिमा महिलाको मर्यादा र सम्मानमा आँच पुर्‍याउने कार्य, अनुचित दबाब, अवाञ्छित धम्की तथा शंकास्पद आर्थिक लेनदेनजस्ता विषयमा पार्टीको शून्य सहनशीलताको नीति रहेको उल्लेख छ । तर, यी विषयमा सुनार दोषी ठहर भइसकेका छैनन् । छानबिनको निष्कर्ष आउन बाँकी छ ।

रास्वपाले राज्यका सम्बन्धित निकायबाट हुने स्वतन्त्र र निष्पक्ष अनुसन्धानमा सहयोग गर्ने प्रतिबद्धता पनि जनाएको छ । कानुन उल्लङ्घन गर्ने वा पदीय आचरणविपरीत काम गर्नेलाई राजनीतिक संरक्षण नदिने पार्टीको भनाइ छ ।

सुनार प्रकरणमा अब रास्वपाको आन्तरिक छानबिन कति निष्पक्ष हुन्छ र त्यसको निष्कर्षका आधारमा पार्टीले कस्तो निर्णय लिन्छ भन्ने प्रश्न महत्त्वपूर्ण बनेको छ । सार्वजनिक रूपमा सुशासन र जवाफदेहिताको पक्षमा उभिने पार्टीका लागि आफ्नै सांसदसम्बन्धी विषयमा लिने निर्णय पनि परीक्षाको विषय बनेको छ ।