काठमाडौं। अडियो काण्डबाट अहिले निकै बदनाम छन्– खगेन्द्र सुनार । अडियोमा उनको बोली सुन्दा ‘माननीय सांसद’ भन्न पनि धिक्कार्नुपर्ने खालको छ । उनी कसरी माननीय भए ? जो माननीयको गरिमा र मर्यादासमेत राख्न सक्दैनन् । जुन कुरा हालै जनआस्थाले सार्वजनिक गरेको अडियो काण्डले पुष्टि गर्छ ।

अडियो सुन्दा उनको बोली पूरै आपराधिक लाग्छ । अश्लिल लाग्छ । धम्कीपूर्ण लाग्छ । त्यसैले उनी काण्ड र आतंकका पहिलो नाम भइसकेका छन् ।

किनभने बागमती प्रदेशका एक जना पूर्वराज्यमन्त्री रहेकी महिला नेतालाई उनले उक्त अडियोमा तेरो रगत खान्छु भनेका छन् । रगत खान्छु भन्नु कुनै पनि हालतमा प्रेमको भाषा होइन । बरु, राक्षसी भाषा हो ।

त्यही अवतारमा प्रकट भएर उनले जसरी एक महिला नेताको जीवनमा आतंक मच्चाउँछन् र उनका कलिला छोरामाथि अपराधको भाषा बोल्छन्, त्यसलाई आधार मान्दा उनी कानुन निर्माताका रुपमा सांसद हुन योग्य हुँदै होइनन् ।

कम्तिमा सांसदको बोलीले समाजलाई बाटो देखाउनुपर्छ । तर सार्वजनिक भएको अडियोमा सुनिएको भाषा ठीक विपरीत छ । जुन सांसद पदको मर्यादा र जवाफदेहिताहीन अभिव्यक्ति हो ।

उनी कुनै समय दलित अधिकारका लागि आवाज उठाउँथे । उनले दलित समुदायको प्रतिनिधित्वको मुद्दा उठाउँदै तत्कालिन सरकारलाई नेल लगाएर सोधे– ‘दलितलाई खोई ?’

यो देशमा सयौँ वर्षदेखि हेपिएका, थिचिएका र पेलिएका दलितका लागि न्यायको आवाज बोल्नु ठीक थियो । त्यसमा विवाद छैन । बोल्नुपर्छ ।

तर प्रश्न उठ्छ– दलित अधिकारको आवाज उठाउने व्यक्तिले महिलाको सम्मान गर्नुपर्दैन ? अरूलाई न्याय माग्ने व्यक्तिले आफ्नो बोली र व्यवहारमा न्याय देखाउनुपर्दैन ? सांसद जस्तो मान्छेले आपराधिक बोली बोल्न मिल्छ?

उसो त खगेन्द्रले विवादित अडियोलाई एआईबाट बनाएको दाबी गरेका छन् । उनले त्यसको दोष प्रहरी प्रमुख दानबहादुर कार्कीमाथि थोपरेका छन् र आफूलाई फसाउन खोजिएको भन्दै पत्यार नलाग्ने जवाफ दिइरहेका छन् । यस्तोमा उनले जो चोर, उसकै ठूलो स्वरको शैलीमा भनेका छन्– कठघरामा उभिन तयार छु।’

तर, खगेन्द्रले भने जस्तो एआईले थेत्तरो भएर छाडा बोल्दैन । आपराधिक भाषा त बोल्दै बोल्दैन । किनभने यस्तो बोल्नलाई एआई मान्छे होइन । त्यसमा पनि यस्तो बोल्न आपराधिक मनोवृत्तिले भरिएका व्यक्ति हुनुपर्छ । सभ्य मानिसको बोली यस्तो हिंसाप्रेरित हुँदैन ।

र, यदि खगेन्द्रको दाबी अनुसार परीक्षण गर्दा उक्त विवादित अडियो एआईबाटै सिर्जित भएको ठहरिए जनआस्थालाई कारबाही गर्नुपर्छ । होइन भने खगेन्द्र कारबाहीको भागिदार बन्नुपर्छ । यसमा रास्वपाले २४ घण्टा कुनुपर्ने कुनै कारण छैन ।

र, अघिल्लो संसदमा ढाकाकुमार श्रेष्ठलाई एउटा विवादित अडियोलाई लिएर जसरी समानुपातिक सांसदबाट हटाउन सभापति रवि लामिछानेले अतिरिक्त सक्रियता देखाए, अहिले खगेन्द्र सुनारको हकमा पनि त्यस्तै होस् ।

किनभने एक जना दुषित र आपराधिक मानसिकताधारी नेता कुहिएको आलुजस्तै हो, जसले बोराका अरु राम्रा आलुलाई पनि कुहाउन सक्छ । दलको छवि धुमिल्याउन सक्छ ।

त्यसैले एक महिला नेतृको रगत खान्छु भन्ने, पैसा दे भन्ने, नभए मार्छु भन्ने रास्वपा सांसद खगेन्द्रलाई तत्काल पक्राउ गरियोस् र निष्पक्ष अनुसन्धान गरियोस् । तर, अनुसन्धानमा बालेन सत्ताको छायाँ पर्नु भएन ।

भन्न त सांसद खगेन्द्रमाथि उनको दल रास्वपाले छानबिन थालेको भनिएको छ । जबकि, यो फौजदारी कसुरसँग सम्बन्धित घटना हो । त्यसैले यो अडियो काण्डको छानबिन प्रहरीले गर्नुपर्छ ।

र, खगेन्द्र सुनारको विगत पनि विवादमुक्त भने थिएन । यद्यपि, दलितलाई खै भन्दै दलितको अधिकारको मुद्दा उठाएपछि जेनजी विद्रोह लगत्तै प्रधानमन्त्री सुशीला कार्कीले मन्त्री बनाएर पुरस्कृत गर्न खोजिन् । तर, त्यहीबेला विगतमा उनले गरेका अपराधको शृङ्खलाबद्ध घटनाहरू बाहिरिए ।

नेपाली मिडिया ती आपराधिक घटनाहरूको समाचारले रंगिए । अन्ततः मन्त्री हुन दौरा सुरुवाल सिलाएर ठिक्क परेका उनी शपथ ग्रहणमा जान पाएनन् । मुखैमा आएको मन्त्री पद उम्कियो ।

सामाजिक सञ्जालमा पनि उनको चर्को विरोध भयो । अदालतका पक्राउ पुर्जी पनि मिडियाहरूमा छरपस्ट भए । काभ्रेमा विचाराधीन उनीविरुद्धको विधुतीय कारोबारसम्बन्धी मुद्दाले सञ्चारमाध्यमहरूमा चर्चा पायो । यसपछि तत्कालीन प्रधानमन्त्री कार्कीले मन्त्रीबाट उनको नाम हटाइन् ।

खगेन्द्रविरुद्ध २०८१ असारमा सुर्खेत जिल्ला अदालतमा स्वास्थ्य संस्था तोडफोड र स्वास्थ्यकर्मीमाथि हातपात गरेको आरोपमा फौजदारी मुद्दा दायर भएको थियो । गुर्भाकोटस्थित मेहेलकुना अस्पतालका प्रमुख डा. सोजन सापकोटाको जाहेरीपछि सरकारी वकिलले उनलाई प्रतिवादी बनाएका थिए । अदालतले सातदिने पक्राउ पुर्जी जारी गरेको र पछि उपस्थित गराउन दैलेख जिल्ला प्रहरी कार्यालयमा पत्राचार गरेको विवरण थियो। उक्त मुद्दा अदालत पुग्न भने बाँकी छ ।

यतिमात्र होइन, सुनारमाथि धम्की, गालीगलौज र ठगीसम्बन्धी उजुरी परेको, बहुविवाहको आरोपमा उनकी जेठी श्रीमतीले राष्ट्रिय महिला आयोगमा निवेदन दिएको तथा वैदेशिक रोजगारीसम्बन्धी ठगी प्रकरणमा पक्राउ परेर छुटेको विवरणसमेत सार्वजनिक भएको थियो।

उनी २०७७ सालको जेठमा रुकुम पश्चिमको सोतीमा नवराज विकसहितका ६ जना युवा जसरी अन्तरजातीय प्रेम सम्बन्धका कारण क्रुरतापूर्वक मारिए, उनीहरूको न्यायको आवाज बनेर खगेन्द्र चिनिएका पात्र हुन् । त्यसपछि दलित अभियन्ता बनेका उनी ६० लाख दलित समुदायको प्रतिनिधि भन्थे । तर, हालै सार्वजनिक फौजदारी कसुर आकर्षित हुने अडियो र त्यसअघिका घटनाहरूलाई आधार मान्दा उनी आपराधिक मनोवृत्ति भएको सांसद हुन् ।