काठमाडौं । साउदीका लागि प्रस्तावित राजदूत गिरिबहादुर सुनारको ओसो तपोवनमा भेट हुन्छ– एक जना महिलासँग, जसको श्रीमान् अमेरिकामा हुन्छन् ।

यता ती महिलासँग गिरिबहादुरको सम्बन्ध निकै घनिष्ठ हुन्छ । गिरिबहादुर र ती महिलाको लगातार भेट पुरानो शेर्पा मलको बाहिरपट्टि हुन्छ ।

कतिसम्म भने ती महिलाका श्रीमान् सन् २०१२ मा अमेरिकादेखि नेपाल आउँछन् र श्रीमती लगेर जान्छन् । श्रीमतीले अमेरिका पुगेपछि छोरी जन्माउँछिन् । यता नेपालदेखि गिरिबहादुर भन्छन् – छोरीको बाउको नाम मेरो राख्नू ।

यता गिरिबहादुरले आफ्नी श्रीमतीसँग सम्बन्ध विच्छेद गरेको हुँदैनन् । तर, ओसो तपोवनमा भेटिएकी महिलासँग सम्बन्ध राखेर अमेरिकामा छोरी जन्माउँदा बुबाको नाम मेरो राख्नु भन्न भ्याउँछन् ।

त्यति मात्रै होइन, ती महिलालाई आफ्ना पतिसँग सम्बन्ध विच्छेद गर्न गिरिबहादुरले दबाब दिन्छन् । यदि आफूले भनेको नमाने ती महिलाको श्रीमानलाई जे पनि गरिदिने सम्मको धम्की दिन्छन् । यो विषय साउदीका लागि प्रस्तावित राजदूत गिरिबहादुर सुनारविरुद्ध परेको उजुरीमा छ ।

उजुरी अनुसार ती महिलाको परिवारलाई गिरिबहादुरले अन्तरंग सम्बन्धका तस्बिरहरुसमेत पठाएका थिए ।

गिरिबहादुरले अति नै गरेपछि प्रहरी परिसर ललितपुरमा उजुरी पर्‍यो । गिरिबहादुरले आफ्ना गम्भीर गल्तीप्रति क्षमा मागे । दुवै पक्षबीच मेलमिलाप भयो ।

अहिले यस सम्बन्धी फाइल बोधनारायण श्रेष्ठ नेतृत्वको संसदीय सुनुवाई समितिले मगाएर अध्ययन गर्दै गरिरहेको छ ।

अर्को, हाल रास्वपा सांसद रहेका तर महिलाको रगत खाने भनेको अडियो काण्ड बाहिरिएपछि बदनाम भएका खगेन्द्र सुनारले धाकधम्की दिँदै उठाएको पैसा साउदीका लागि प्रस्तावित राजदूत गिरिबहादुरले व्यवस्थापन गरेको आरोप उजुरीमा छ ।

यति मात्रै होइन, नेपाल प्रहरीको प्रहरी नायव महानिरीक्षक (डीआईजी) बढुवामा खगेन्द्र र गिरिबहादुर मिलेर ३३ लाख उठाएको आरोप पनि उजुरीमै छ ।

जबकि, राजदूतका लागि सिफारिस भएका व्यक्ति उच्च नैतिकवान हुनुपर्छ । सामाजिक छवि उच्च हुनुपर्छ । तर, परेका उजुरीलाई आधार मान्दा साउदीका लागि प्रस्तावित राजदूत गिरिबहादुर सुनारको छवि पूरै धमिलो देखिन्छ ।

छवि राम्रो नभएको मान्छेलाई राजदूतमा सिफारिस गर्दा सम्बन्धित देशले एग्रिमो नपठाउन सक्छ र देशकै अन्तर्राष्ट्रियस्तरमा छवि बिग्रिन सक्छ । यसबारे रास्वपा पनि सचेत भएको बताइएको छ ।

उसो त रास्वपाबाट परराष्ट्रमन्त्री भएका शिशिर खनालले एकदमै क्षमतावान, कूटनीतिज्ञ र नेपालको वृहत्तर स्वार्थ अनुसार काम गर्न सक्नेहरूलाई राजदूत छनोट गरेको दाबी गरेका थिए । तर, उनले दाबी गरे जस्तो देखिएको छैन ।