काठमाडौं । दसैँलाई लक्षित गर्दै सडक विभागले काठमाडौं उपत्यकाका सडकमा सफाइ तथा लेन मार्किङको कामलाई तीव्रता दिएको छ। यसैक्रममा कोटेश्वर-कलंकी सडकखण्डअन्तर्गत पर्ने कलंकी अन्डरपासको सफाइ र रङरोगनको काम अन्तिम चरणमा पुगेको छ।

चक्रपथको पहिलो खण्डका रूपमा रहेको कोटेश्वर-कलंकी सडक चीन सरकारको सहयोगमा निर्माण गरिएको हो। उक्त खण्डमा निर्मित अन्डरपास सञ्चालनमा आएपछि कलंकी क्षेत्रमा हुने सवारी जाम व्यवस्थापनमा सहयोग पुगेको छ।

यद्यपि, चक्रपथको दोस्रो खण्ड कलंकी–महाराजगञ्ज सडक विस्तारको काम भने अपेक्षित गतिमा अघि बढ्न सकेको छैन। विस्तार कार्यमा भइरहेको ढिलाइले चक्रपथको स्तरोन्नति तथा सवारी आवागमन व्यवस्थापनमा चुनौती कायमै रहेको छ।