सिरहा। प्रतिबन्धित लागुऔषध गाँजा मुद्दामा फरार रहेका राष्ट्रिय स्वतन्त्र पार्टी (रास्वपा) का एक नगर सभापति पक्राउ परेका छन्।

प्रहरीले सप्तरीको सुरुङ्गा नगरपालिका–५ निवासी ४७ वर्षीय मोहम्द साबीर अलीलाई बुधबार बिहान पक्राउ गरेको हो।

अली रास्वपाको सुरुङ्गा नगरपालिकाका सभापति रहेको खुलेको छ। जिल्ला प्रहरी कार्यालय सिरहाका सूचना अधिकारी डीएसपी रमेशबहादुर पालका अनुसार उनलाई रास्वपाको सुरुङ्गा नगरपालिकास्थित पार्टी कार्यालय कदमाहाबाट पक्राउ गरिएको हो।

इलाका प्रहरी कार्यालय लहानबाट खटिएको टोलीले सप्तरीको भेडिया इलाका प्रहरी कार्यालयको सहयोगमा उनलाई नियन्त्रणमा लिएको प्रहरीले जनाएको छ।

प्रहरीका अनुसार २०८१ मंसिर २९ गते सिरहाको धनगढीमाई नगरपालिका–१० जिरोमाइलस्थित पूर्व–पश्चिम राजमार्गमा भएको दुर्घटनापछि गाँजा तस्करीको घटना बाहिर आएको थियो। पूर्वबाट पश्चिमतर्फ जाँदै गरेको ना.३ ख ७५९१ नम्बरको ट्रकले राजमार्ग पार गर्दै गरेको बा.८ च ९९६३ नम्बरको कारलाई ठक्कर दिएको थियो।

दुर्घटनापछि कार छाडेर भागेका व्यक्तिहरूको खोजी तथा कारको खानतलासी गर्ने क्रममा पाँचवटा पोकामा राखिएको एक क्विन्टल ३० किलो गाँजा बरामद भएको प्रहरीले जनाएको छ।

सोही घटनासम्बन्धी लागुऔषध मुद्दामा अली फरार रहेको प्रहरीको भनाइ छ। उनलाई पक्राउ गरेसँगै प्रहरीले मुद्दासम्बन्धी थप कानुनी प्रक्रिया अघि बढाउने जनाएको छ।