गोरखा। बुढीगण्डकी नदीमा आएको बाढीले क्षतिग्रस्त गोरखाको सोती बजारलाई पुरानै अवस्थामा फर्काउन स्थानीय जुटेका छन्।

गत असोज २५ गतेको बाढीले घर तथा व्यापारिक संरचनामा लेदो, ढुंगा र माटो थुपारेपछि स्थानीय अहिले सरसफाइ र पुनःस्थापनामा लागेका हुन्।

आरुघाट गाउँपालिका–३ स्थित सोती बजारका घरभित्र पसेको लेदो हटाउने, सडकमा थुप्रिएको माटो र भग्नावशेष पन्छाउने तथा क्षतिग्रस्त संरचनाको अवस्था बुझ्ने काम भइरहेको छ। स्थानीयको प्रयासमा नेपाली सेनाले पनि साथ दिइरहेको छ।

बाढीका कारण सोतीका करिब १५ घर तथा व्यापारिक संरचनामा क्षति पुगेको छ। केही परिवार घर छाडेर आफन्तकोमा तथा सामुदायिक भवनमा आश्रय लिन बाध्य भएका छन्। घरभित्र थुप्रिएको लेदो सफा गरेर सुरक्षित रूपमा बसोबास गर्न सक्ने अवस्था बनाउनु उनीहरूका लागि तत्कालको चुनौती बनेको छ।

बाढीले सोती र मान्बु जोड्ने बुढीगण्डकी नदीमाथिको आरुघाट गाउँपालिका–२ र ३ जोड्ने मोटरेबल पुलसमेत बगाएको छ। पुल बगेपछि स्थानीयको आवागमन प्रभावित भएको छ। मनास्लु पदमार्गमा जाने पदयात्री तथा धार्चे र चुमनुब्री क्षेत्रका बासिन्दाको आवतजावतमा समेत समस्या परेको छ।

बजार क्षेत्रमा थुप्रिएको लेदो र भग्नावशेषका कारण सडकमा यातायात सञ्चालन गर्न कठिनाइ भइरहेको छ। सडक सफा गर्ने काम जारी रहे पनि घरबास र व्यापारिक संरचनामा पुगेको क्षतिले सोतीको जनजीवन सहज हुन समय लाग्ने देखिएको छ।

बाढीको चोट सहेर बसेका स्थानीय अहिले आफैँ जुटेर बजार सफा गर्दै सामान्य जीवन फर्काउने प्रयासमा छन्।

उनीहरूका लागि पहिलो आवश्यकता घर सुरक्षित बनाउनु, सडक खुलाउनु र विस्थापित परिवारलाई पुनः बसोबासको वातावरण तयार गर्नु बनेको छ।