काठमाडौं । सत्तारूढ राष्ट्रिय स्वतन्त्र पार्टी (रास्वपा) का सांसद अमरेशकुमार सिंहले सरकारसँग दुईतिहाइ बहुमत हुँदैमा सरकारले गर्ने हरेक निर्णय सही नहुने टिप्पणी गरेका छन्। उनले लोकतन्त्रमा बहुमतको सरकार भए पनि सरकारका निर्णय विधि, पद्धति, संवैधानिक व्यवस्था र राष्ट्रिय हितको कसौटीमा परीक्षण हुनुपर्ने बताएका छन्।

बिहीबार सामाजिक सञ्जालमार्फत आफ्नो धारणा सार्वजनिक गर्दै सांसद सिंहले सरकारले विभिन्न देशका लागि सिफारिस गरेका राजदूतलाई संसदीय सुनुवाइ समितिले अस्वीकार गरेको विषयलाई लिएर सरकारको निर्णयमाथि प्रश्न उठाएका हुन्। उनले संसदीय समितिले सरकारका सिफारिसमाथि प्रश्न उठाउनु र आवश्यक परे त्यस्ता सिफारिस रोक्नु लोकतान्त्रिक व्यवस्थामा संसदीय निगरानीको महत्त्वपूर्ण अभ्यास भएको उल्लेख गरेका छन्।

सिंहको टिप्पणीले सरकारसँग पर्याप्त संसदीय समर्थन रहेको अवस्थामा पनि सरकारका निर्णयमाथि निगरानी र समीक्षा आवश्यक रहने विषयलाई पुनः चर्चामा ल्याएको छ। उनका अनुसार बहुमत प्राप्त सरकारलाई शासन सञ्चालन गर्ने अधिकार भए पनि त्यसको अर्थ सरकारले गरेका सबै निर्णय स्वतः सही ठहरिनु होइन। लोकतन्त्रमा सरकारका निर्णयको औचित्य, पारदर्शिता र राष्ट्रिय हितसँगको सम्बन्धसमेत महत्त्वपूर्ण हुने उनको भनाइ छ।