काठमाडौं । प्रहरीले काठमाडौंको नागढुंगा चेकप्वाइन्टबाट ४५ लाख भन्दाबढी मूल्यको सुनसहित एक भारतीय नागरिकलाई पक्राउ गरेको छ ।

काँकडभिट्टाबाट काठमाडौँतर्फ आइरहेको बा प्र ०३–००१–ख ३१३९ नम्बरको यात्रु बसमा सवार भारतीय नागरिक ३१ वर्षका महादेव सामन्तलाई जाँचका क्रममा बिहीबार पक्राउ गरिएको जिल्ला प्रहरी परिसर काठमाडौँका प्रवक्ता एसपी अपीलराज बोहराले जानकारी दिए ।

प्रहरी प्रभाग नागढुंगा र लागुऔषध नियन्त्रण ब्युरोबाट खटिएको संयुक्त टोलीले बसमा जाँच गरेको थियो । उनको साथबाट २७४.८३ ग्राम सुन बरामद भएको छ।

उक्त सुनको मूल्य ४५ लाख ६३ हजार ८ सय २६ रुपैयाँ रहेको प्रहरीले जनाएको छ । थप अनुसन्धान एवम् कारबाहीका लागि उनलाई त्रिभुवन अन्तर्राष्ट्रिय विमानस्थल भन्सार कार्यालय पठाइएको उनले बताए ।