Author: nepal one

एयरबसले आफ्नो ए–३२० परिवारअन्तर्गतका करिब छ हजार विमानमा तत्काल सफ्टवेयर परिवर्तन आवश्यक परेको चेतावनी जारी गरेपछि विश्वभरका एयरलाइन्सहरूले शनिबार थप उडान रद्द तथा ढिलाइको घोषणा गरेका छन् । अक्टोबरमा जेटब्लूको एक उडानमा देखिएको प्राविधिक खराबीको मूल्याङ्कनपछि एयरबसले आफ्ना ग्राहकहरूलाई ‘तत्काल सावधानी अपनाउन’ अनुरोध गरेको थियो ।

एयरबसका अनुसार ‘तीव्र सौर्य विकिरणले उडान नियन्त्रण प्रणालीका महत्त्वपूर्ण डेटा बिगार्ने जोखिम’ देखिएको छ, जसले अहिले सेवामा रहेका ए–३२० परिवारका धेरै विमान प्रभावित हुनसक्ने बताइएको छ । सफ्टवेयर परिवर्तन अधिकांश विमानमा केही घण्टामै सकिने भए पनि लगभग एक हजार विमानमा यो प्रक्रिया हप्तौँ लाग्नसक्ने एक स्रोतले एएफपीलाई जानकारी दिएको छ ।

एयर फ्रान्सले शनिबार अतिरिक्त कति उडान रद्द हुनेछन् भन्ने गणना भइरहेको बताउँदै प्रभावित यात्रुहरूलाई एसएमएस तथा इमेलमार्फत व्यक्तिगत रूपमा सूचित गरिँदैछ भनेर जनाएको छ । यसले शुक्रबार मात्र ३५ उडान रद्द गरेको थियो । कोलम्बियाली एयरलाइन्स एभियाङ्काले आफ्नो करिब ७० प्रतिशत फ्लीट सफ्टवेयर समस्याबाट प्रभावित रहेको जनाएको छ ।

युरोपियन युनियन एभियसन सेफ्टी एजेन्सी (इएएसए) ले एयरबसले समस्या सूचित गरेपछि आवश्यक सुरक्षा उपायहरू लागू गर्ने जानकारी दिएको छ । “यी कदमहरूले उडान तालिकामा केही समय अवरोध ल्याउन सक्छन्, तर यात्रु सुरक्षा नै पहिलो प्राथमिकता हो”, इएएसएले भनेको छ ।

उडान नियन्त्रण कम्प्युटर निर्माण गर्ने थेल्स कम्पनीले उपकरणहरू एयरबसका प्राविधिक विशिष्टताअनुसार पूर्ण रूपमा मिल्दो रहेको र इएएसए र एफएएबाट प्रमाणित भएको स्पष्ट पार्दै समस्या परेको सफ्टवेयर आफूअन्तर्गत नपर्ने बताएको छ । एयरबसले सिफारिसका कारण यात्रु तथा ग्राहकलाई परेको असुविधाबापत क्षमायाचना गर्दै व्यावहारिक अवरोध स्वीकार गरेको छ ।

अक्टोबर ३० मा जेटब्लूद्वारा सञ्चालित ए–३२० विमानमा कम्प्युटर त्रुटि देखिएपछि नियन्त्रण कठिन बनेको र क्यानकुन–नेवार्क मार्गमा उडान गरिरहेकै अवस्थामा विमान अचानक तल झरेको थियो । पाइलटहरूले आपतकालीन रूपमा फ्लोरिडाको टाम्पामा अवतरण गराउनुपरेको थियो । केही यात्रु घाइते भएको स्थानीय अधिकारीहरूको उद्धरण गर्दै अमेरिकी मिडियाले जनाएको छ ।

जेटब्लूले घटनाबारे प्रत्यक्ष टिप्पणी नगरे पनि ए–३२० तथा ए–३२१ मोडेलमा आवश्यक परिवर्तन सुरु गरिसकेको जनाएको छ । अमेरिकन एयरलाइन्सले पनि चेतावनीपछि सफ्टवेयर अद्यावधिक प्रक्रिया अघि बढाएर करिब ३४० प्रभावित विमानमध्ये ‘धेरैजसो’ शनिबारसम्ममा नियमित सेवामा फर्कने अपेक्षासहित ‘धेरै ढिलाइ’ हुने चेतावनी दिएको छ ।

युनाइटेड एयरलाइन्सले समेत सुरुमा आफू प्रभावित नभएको बताएको भए पनि पछि छवटा विमानमा समस्या देखिएको र केही उडान प्रभावित हुने जानकारी दिएको छ । डेल्टा एयर लाइन्सले आवश्यक अद्यावधिक शनिबार बिहानसम्म पूरा गर्ने जनाएको छ ।

एयर इन्डिया, एभियाङ्का, फिलिपिन्स एयरलाइन्स तथा सेबु प्यासिफिकलगायत क्यारियरहरूले समेत उडान ढिलाइ, रद्द र पुनःबुकिङका जानकारी क्रमशः सार्वजनिक गरिरहेका छन् । फिलिपिन्समा मात्र शनिबार ४० भन्दा बढी घरेलु उडान रद्द गरिएको थियो ।सन् १९८८ देखि उत्पादन हुँदै आएको ए–३२० एयरबसको सबैभन्दा बढी बिक्री हुने विमान हो । सेप्टेम्बरसम्म एयरबसले करिब १२ हजार २५७ विमान बिक्री गरेको छ । यो सङ्ख्या बोइङ ७३७ सँग उस्तै स्तरमा रहेको छ ।

अमेरिकी राष्ट्रपति डोनाल्ड ट्रम्पले शनिबार भेनेजुएलामाथि तथा त्यस वरपरको हवाई क्षेत्रलाई ‘पूर्ण रूपमा बन्द’ मान्नुपर्ने कडा चेतावनी जारी गर्नुभएको छ । वामपन्थी नेता निकोलस मदुरोसँगको लामो समयदेखि चलिरहेको राजनीतिक तथा कूटनीतिक गतिरोधमा यो नवीनतम वृद्धि मानिएको छ ।

ट्रम्पले आफ्नो ट्रुथ सोसल नेटवर्कमा लेख्दै अनुरोध गर्नुभयो, “सबै एयरलाइन्स, पाइलटहरू, लागुऔषध व्यापारीहरू तथा मानव बेचबिखनकर्ताहरूका लागि, कृपया भेनेजुएलाको आकाश र वरपरको आकाशलाई यसको सम्पूर्ण क्षेत्रमा बन्द भएकोजस्तै विचार गर्नुस् ।” उहाँले आफूले दिएको चेतावनीको कारण वा सम्भावित कदमबारे थप विस्तृत विवरण भने प्रस्तुत गर्नुभएको छैन ।

यसबीच, अमेरिकी प्रशासनले क्यारिबियन क्षेत्रमा विश्वकै सबैभन्दा ठूलो विमानवाहक जहाजसहित ठूलो सैन्य शक्ति तैनाथ गर्दै भेनेजुएलामाथि दवाव बढाइरहेको अवस्थामा ट्रम्पको यस्तो अभिव्यक्ति आएको हो । वासिङ्टनले यो सैन्य गतिविधि लागुऔषध तस्करी रोक्नका लागि गरिएको दाबी गर्दै आएको छ, तर काराकासले भने यो बहानामार्फत शासन परिवर्तन नै अन्तिम लक्ष्य रहेको आरोप दोहो¥याउँदै आएको छ ।

अमेरिकी सेनाले सेप्टेम्बरको सुरुदेखि क्यारिबियन सागर तथा पूर्वी प्रशान्त क्षेत्रमा भेनेजुएलासँग जोडिएका २० भन्दा बढी लागुऔषध तस्करीमा संलग्न मानिएका जहाजहरूलाई लक्ष्य गरी कारबाही गरेको थियो, जसमा ८० भन्दा बढी व्यक्तिको मृत्यु भएको बताइएको छ । तर वासिङ्टनले यी जहाजहरू वास्तवमै लागुऔषध तस्करीमा प्रयोग गरिएको वा अमेरिकामाथि खतरा बनेको ठोस प्रमाण सार्वजनिक गर्न सकेको छैन ।

विस्तारित सैन्य अभियान र लगातार भइरहेका कारबाहीका कारण क्षेत्रीय तनाव झन् चुलिन पुगेको छ । यसैबीच न्युयोर्क टाइम्सले शुक्रबार प्रकाशित गरेको एक रिपोर्टअनुसार राष्ट्रपति ट्रम्प र राष्ट्रपति मदुरोबीच गत हप्तामात्रै फोन वार्ता भएको र सम्भावित रूपमा संयुक्त राज्य अमेरिकामा प्रत्यक्ष भेटबारे पनि प्रारम्भिक छलफल भएको उल्लेख छ ।

ट्रम्पले भेनेजुएलाबाट आउने लागुऔषध तस्करी रोक्न लागिएको प्रयास ‘महत्त्वपूर्ण चरणमा आइपुगेको’ भन्दै काराकाससँगको तनावलाई सार्वजनिकरूपमा बढाएको एक दिनपछि दुवै नेताबीचको फोन संवादबारेको यो समाचार सार्वजनिक भएको हो ।

अफ्रिकी युनियन (एयु) ले गिनी–बिसाउमा हालै भएको सैन्य कूलाई असंवैधानिक परिवर्तनका रूपमा व्याख्या गर्दै उक्त राष्ट्रलाई सङ्गठनबाट निलम्बन गर्ने निर्णय गरेको छ । एयुले असंवैधानिक कदमप्रति आफ्नो शून्य सहिष्णुता दोहो¥याउँदै संवैधानिक शासन पुनःस्थापित नहुञ्जेलसम्म गिनी–बिसाउलाई सबै गतिविधिबाट यथाशीघ्र निलम्बन गर्नुपर्ने निष्कर्ष निकालेको हो ।

शुक्रबार एयु शान्ति तथा सुरक्षा परिषद्ले पारित गरेको प्रस्ताव अनुसार ‘सरकारका असंवैधानिक परिवर्तनहरूमा शून्य सहिष्णुता’ नीति पुनः पुष्ट्याइयो । सोही आधारमा गिनी–बिसाउ गणतन्त्रलाई एयु, यसको अङ्गसंस्था तथा निकायहरूका सबै कार्यक्रम र निर्णय प्रक्रियामा सहभागी हुन नदिने निर्णय तत्क्षण प्रभावसहित लागू गरिएको परिषद्को भनाइ छ ।

विश्वका अत्यन्तै गरिब राष्ट्रहरू मध्ये पर्ने गिनी–बिसाउ पछिल्लो पाँच दशकदेखि निरन्तर कू र कू प्रयासले अस्थिर रहँदै आएको छ । पोर्चुगलबाट स्वतन्त्रता प्राप्त गरेको करिब ५० वर्षपछि पनि देशमा राजनीतिक अस्थिरता गहिरिँदै गएको विज्ञहरूको आकलन छ । करिब २२ लाख जनसङ्ख्या रहेको यो देश ल्याटिन अमेरिका र युरोपबीचको लागुपदार्थ तस्करीको मुख्य मार्गका रूपमा परिचित भइरहेको छ, जसले राजनीतिक सङ्कटलाई झनै बढाएको विश्लेषण गरिन्छ ।

पश्चिम अफ्रिकी क्षेत्रीय ब्लक ‘इकोवास’ ले पनि बिहीबार गिनी–बिसाउलाई संवैधानिक शासन पुनःस्थापना नहुँदासम्म निर्णय तहहरूबाट निलम्बन गरेको थियो । राष्ट्रपति तथा विधायी चुनाव सम्पन्न भएको केही दिनपछि बुधबार सैन्य अधिग्रहण भएको थियो । सो चुनावपछि वर्तमान राष्ट्रपति उमरो सिसोको एम्बालो र विपक्षी नेता फर्नान्डो डायस दुवैले आफू विजयी भएको दाबी गरेका थिए, जसले राजनीतिक तनावलाई अझ चर्काएको बताइन्छ ।

राष्ट्रपति एम्बालो सेनेगल सरकारले भाडामा उपलब्ध गराएको उडानमार्फत बिहीबार छिमेकी सेनेगल आइपुग्नुभएको थियो । कूपछि गिनी–बिसाउको सैन्य उच्च कमान्डले पूर्व सेना प्रमुख जनरल होर्टा इन्टा–ए–लाई सैन्य सरकार प्रमुखका रूपमा औपचारिक रूपमा स्थापित गरेको राज्य टेलिभिजनले प्रसारण गरेको छ । उहाँको नेतृत्वमा एक वर्ष लामो सङ्क्रमणकाल सञ्चालन गरिने बताइएको छ ।

अस्ट्रेलियाका प्रधानमन्त्री एन्थोनी अल्बानिज शनिबार राष्ट्रिय राजधानी क्यानबेरास्थित आफ्नै आधिकारिक निवास ‘द लज’ मा अत्यन्त गोप्य र आत्मीय वातावरणमा आफ्नी प्रिय पार्टनर जोडी हेडनसँग वैवाहिक जीवनमा प्रवेश गर्नुभएको छ ।

अस्ट्रेलियाको सङ्घीय सरकार गठन भएको १२४ वर्षको इतिहासमा कार्यरत प्रधानमन्त्रीको हैसियतमै विवाह गर्ने अल्बानिज पहिलो नेता बन्नुभएको हो ।

दिउँसो द लजको हरियाली मैदानमा सम्पन्न उक्त समारोहमा केही क्याबिनेट मन्त्रीहरूसहित करिब ६० जना विशिष्ट पाहुना उपस्थित रहेका थिए । नागरिक सेलिब्रेन्टद्वारा सम्पन्न विवाह समारोह प्रायः गोप्य राखिएको थियो र घटना सम्पन्न नहुँदासम्म कुनै पनि मिडिया संस्थालाई जानकारी दिइएको थिएन ।

दम्पतीले जारी गर्नुभएको विज्ञप्तिमा भनिएको छ, “हामी हाम्रो परिवार तथा निकटतम प्रियजनहरूको सामुन्ने हाम्रो प्रेम, प्रतिबद्धता र भविष्यको संयुक्त जीवनलाई साझा गर्न पाउँदा अनन्त खुशी छौँ। ” दुवैले आफ्ना प्रतिज्ञास्वरूपका शब्दहरू स्वयं लेख्नुभएको थियो । साथै, उहाँहरूको कुकुर ‘टोटो’ औँठी वाहकको भूमिकामा आकर्षक रूपमा प्रस्तुत भएको र जोडी हेडनकी पाँच वर्षीय भतिजी एला फूलको माला लगाएर सहभागी भएकी उल्लेख गरिएको छ ।

६२ वर्षीय अल्बानिज पहिले वैवाहिक सम्बन्धविच्छेद भोगिसक्नुभएका व्यक्ति हुनुहुन्छ र उहाँको एक वयस्क छोरा छन् । गत वर्ष भ्यालेन्टाइन डेका दिन उहाँले द लजमै ४६ वर्षीय हेडनलाई विवाहको प्रस्ताव राख्नुभएको थियो ।

यस वर्ष मे महिनामा सम्पन्न सङ्घीय चुनावअगाडि ठूलो मात्रामा विवाह समारोह आयोजना गर्ने प्रारम्भिक योजना भए पनि प्रधानमन्त्रीले एक रेडियो कार्यक्रममा भन्नुभए अनुसार उहाँले क्यानाडाका पूर्वप्रधानमन्त्री तथा व्यक्तिगत मित्र जस्टिन ट्रुडोलाई समेत आमन्त्रित गर्ने विचार राख्नुभएको थियो ।

तर सत्तारूढ केन्द्र–वामपन्थी लेबर पार्टीका रणनीतिकारहरूले जीवनयापन खर्च सङ्कटले जनजीवन प्रभावित भइरहेको समयमा भव्य समारोहले सरकारको दोस्रो कार्यकालमा जनसमर्थनमा नकारात्मक प्रभाव पर्न सक्ने मूल्याङ्कन गरेका थिए । त्यसैले चुनाव सम्पन्न नभएसम्म विवाह स्थगित गर्ने निर्णय गरिएको थियो । प्रधानमन्त्री अल्बानिजले आफ्नो सन् २०२५ भित्र विवाह हुने बताइसक्नुभएको भए पनि मिति भने गोप्य नै राख्नुभएको थियो ।

अन्ततः बिहीबार संसद्को कार्यकाल समाप्त भएको दुई दिनपछि दम्पतीले शान्त, सानो तर भावनात्मक समारोहमार्फत वैवाहिक जीवन प्रारम्भ गर्नुभएको हो । फाइनान्स क्षेत्रमा कार्यरत हेडनले सन् २०२० मा मेलबर्नमा आयोजित एक व्यापारिक रात्रिभोजमा पहिलोपटक अल्बानिजलाई भेट्नुभएको थियो ।

जुन महिनासम्मको एक वर्षमा आप्रवासनका लागि बेलायत पुग्ने व्यक्तिको सङ्ख्या ६९ प्रतिशतले घटेको छ । प्रधानमन्त्री किअर स्टार्मरको सरकारको एक प्रमुख नीति हो र यो सुधार उहाँको सरकारका लागि उत्कृष्ट प्रोत्साहन हो।

जब स्टार्मरको लेबर सरकार यस मुद्दामा कट्टर–दक्षिणपन्थी आप्रवासन–विरोधी रिफर्म यूके पार्टीबाट बढ्दो दबाबको सामना गरिरहेको समय आप्रबासनमा निरन्तर घट्दो प्रवृत्तिको समाचार सार्वजनिक भएको हो ।

यी तथ्याङ्कहरूमा साना डुङ्गा यात्राजस्ता अत्यधिक विवादास्पद अनियमित मार्गहरूबाट आएका आप्रवासीहरूको तथ्याङ्क समावेश छैन ।

राष्ट्रिय तथ्याङ्क कार्यालयका अनुसार, यसमा काम र अध्ययनका लागि बेलायत आउने गैर–युरोपेली सङ्घका नागरिक र उनीहरूका आश्रितहरूको सङ्ख्या कम हुनु र बेलायती नागरिकहरूको बसाइँसराइ बढ्नु समावेश छ।

हालैको अस्थायी बसाइँसराइको तथ्याङ्कले बेलायतमा आउने र बेलायतबाट जाने मानिसहरूको सङ्ख्याबीचको अन्तर करिब दुई लाखको हाराहारीमा देखिएको छ।

तथ्याङ्का अनुसार जुनसम्म अनुमानित आठ लाख ९८ हजार मानिसहरू भित्रिएका थिएभने छ लाख ९३ हजार स्थायी रूपमा बाहिरिएका थिए ।
यो सन् २०२१ यताको एक बर्षको सबैभन्दा कम तथ्याङ्क हो ।

मे महिनामा घोषणा गरिएको सन् २०२४ को वार्षिक कुल आप्रवासनको तथ्याङ्कले पनि चार लाख ३१ हजार व्यक्तिको ठूलो गिरावट देखाएको थियो । यद्यपि, यो सङ्ख्उा पछि संशोधन गरी तीन लाख ४५ भएको बताइएको थियो ।

विपक्षी कन्जरभेटिभहरूले बिहीबार यो निरन्तर गिरावटको श्रेय लिएका छन्। उनीहरूका अनुसार यो सन् २०२४ जुलाईमा सत्ता गुमाउनुअघि तत्कालीन प्रधानमन्त्री ऋषि सुनकले लागू गरेका भिसा, आश्रित र विद्यार्थीसम्बन्धी सुधारहरूको परिणाम हो।

– आप्रवासनमा कडाइ –

यी तथ्याङ्कहरू स्टार्मरका लागि स्वागतयोग्य समाचार हुन सक्छन् तर यसले अनियमित आप्रवासनमा कुनै राहत प्रदान गर्दैन, जुन घटिरहेको छैन।

सङ्घर्षमा फसेका देशहरूबाट भागेर आएका धेरसहित कुल ३९ हजारभन्दा बढी मानिसहरू यस वर्ष साना डुङ्गाहरूमा बेलायत आइपुगेका छन् । यो सन् २०२४ को पूरै वर्षको भन्दा बढी हो, तर अन्तिम कन्जरभेटिभ प्रशासनको समयमा सन् २०२२ मा कायम भएको उच्च सङ्ख्याको तुलनामा कम हो।

ब्रेक्जिट पक्षधर नेता नाइजेल फराजको नेतृत्वमा रहेको रिफर्म युकेले यस वर्षको अधिकांश समय सर्वेक्षणमा लेबर पार्टीमाथि ख्यातिमा दोहोरो अङ्कको अग्रता कायम राखेको छ, किनकि उसले यस मुद्दामा निरन्तर अभियान चलाइरहेको छ।

गृहमन्त्री शाबना महमूदले यसै महिनाको सुरुमा कानुनी र अवैध दुवै आप्रवासनमाथि कडा कारबाहीको घोषणा गर्नुभएको थियो । यो प्रतिक्रिया आंशिक रूपमा फराजको पार्टीलाई बढ्दो समर्थन थियो।

सरकारले साना डुङ्गाहरूको आगमनलाई रोक्न फ्रान्ससँग सहमति भएको तथाकथित ‘एक भित्र, एक बाहिर’ योजनामा पनि आफ्नो आशा राखेको छ।
बिहीबार जारी गरिएको नयाँ तथ्याङ्कले यस पहल अन्तर्गत हालसम्म १५३ जनालाई फ्रान्सबाट फिर्ता पठाइएको छ र १३४ जना बेलायत आइपुगेका छन्।

‘एक भित्र, एक बाहिर’ योजना अन्तर्गत अवैध र शरण आवेदनका लागि अयोग्य ठहरिएर फ्रान्स फिर्ता पठाइएका प्रत्येक बेलायती आप्रवासीको सट्टा अर्को एक जनालाई ‘नयाँ सुरक्षित र कानुनी मार्ग’ मार्फत बेलायतमा प्रवेश गर्न दिइन्छ।

रुसले शुक्रबार मानव अधिकार अनुगमनका लागि स्थापित ‘ह्युमन राइट्स वाच’ लाई आफ्नो ‘अवाञ्छित’ संस्थाहरूको सूचीमा समावेश गरेको छ । प्रतिबन्धले न्यूयोर्कमा कार्यालय भएको उक्त दबाब समूहलाई आफ्नो भूभागमा सञ्चालन गर्न प्रभावकारी रूपमा प्रतिबन्ध लगाएको छ ।

रुसले यस निर्णयको कारण बताएको छैन । सन् २०२२ मा रुसमा आफ्ना कार्यालयहरू बन्द गर्न बाध्य भएको ‘ह्युमन राइट्स वाच’ले तत्काल कुनै टिप्पणी गरेको छैन।

फेब्रुअरी २०२२ मा रुसले युक्रेनमा आक्रमण सुरु गरेदेखि रूसी न्याय मन्त्रालयले क्रेमलिनको नीति वा युद्धमा मस्कोको व्यवहारको आलोचना गर्ने दर्जनौं समूहहरूलाई प्रतिबन्ध लगाएको थियो ।

विश्वभरका सेना र सरकारहरूद्वारा गरिएका दुरुपयोगको अनुसन्धान र प्रतिवेदन प्रकाशित गर्ने ‘ह्युमन राइट्स वाच’ले युद्धको बारम्बार निन्दा गरेको छ र रुसी सेनालाई ‘उल्लङ्घनको लामो श्रृङ्खला’ सञ्चालन गरेको आरोप लगाएको छ । मस्कोले आरोपलाई अस्वीकार गर्दै आएको छ।

रुसमा ‘अवाञ्छित’ समूहको रूपमा आरोपित अन्य संस्थाहरू ‘वल्र्ड वाइल्डलाइफ फन्ड, ग्रीनपिस, ट्रान्सपरेन्सी इन्टरनेसनल र एल्टन जोन एड्स फाउन्डेसन’ हुन्।

यो आरोपले समूहसँग काम गर्ने वा उनीहरूलाई पैसा दान गर्ने जो कोहीलाई पनि रुसमा अभियोजनको लागि उत्तरदायी बनाउँछ।

संयुक्त राज्य अमेरिकाले यसको सामानमा लगाएको भन्सार शुल्कको बावजुद ब्राजिलको बेरोजगारी दरमा ऐतिहासिक रूपमा गिरावट जारी रहेको शुक्रबारको सार्वजनिक सरकारी तथ्याङ्कले देखाएको छ।

यो तथ्याङ्क अगस्टदेखि अक्टोबरसम्मको त्रैमासिक अवधिको हो । काम खोज्ने श्रमशक्तिको हिस्सा यस अवधिमा ५.४ प्रतिशतमा झरेको छ, जुन ब्राजिलको तथ्याङ्क सङ्कलन र लेखाजोखा राख्ने निकाय (आइबिजिई) स्थापना भएको सन् २०१२ पछिको हालको गणना विधि लागू भएयताकै सबैभन्दा कम हो ।

सन् २०२४ को सोही अवधिमा बेरोजगारी दर ६.२ प्रतिशत थियो।यद्यपि अनौपचारिक क्षेत्रमा रोजगारी गर्ने कार्यबलको हिस्सा ३७.८ प्रतिशतसहित उच्च अवस्थामा कायम रहेको छ।बेरोजगारीमा आएको यो निरन्तर गिरावट वामपन्थी राष्ट्रपति लुइज इनासियो लुला दा सिल्भाका लागि राम्रो खबर हो।

उहाँको सरकारले संयुक्त राज्य अमेरिकामा निर्यात गरिने धेरै ब्राजिलियाली उत्पादनहरूमा लगाइएको ४० प्रतिशत भन्सार शुल्कले ल्याटिन अमेरिकाको सबैभन्दा ठूलो अर्थतन्त्रमा पार्ने प्रभावलाई कम गर्ने प्रयास गरिरहेको छ।

अमेरिकी राष्ट्रपति डोनाल्ड ट्रम्पले ब्राजिलमाथि अगस्टमा दण्डात्मक भन्सार शुल्क लगाउनुभएको थियो । यो शुल्क उहाँको अति–दक्षिणपन्थी सहयोगी जैर बोल्सोनारोको मुद्दालाई लिएर लगाइएको आरोप अमेरिकामाथि ब्राजिलले लगाउँदै आएको छ । बोल्सोनारोले सन् २०२२ को चुनावपछि लुलालाई सत्ता सम्हाल्नबाट रोक्ने प्रयास गरेकोमा २७ वर्षको जेल सजाय भोगिरहनुभएको छ।

यसै महिनाको सुरुमा, देशहरूबीचको कूटनीतिक तनावमा कमी आएपछि वाशिङ्टनले गाईको मासु र कफीलाईजस्ता केही कृषि वस्तुहरूलाई भन्सार शुल्कबाट मुक्त गरेको थियो।