Author: nepal one

खोटाङ, ११ असार : जिल्लाका दशवटै स्थानीय तहले आगामी आर्थिक वर्ष २०८२/८३ का लागि नीति तथा कार्यक्रम र बजेट पारित गरेका छन् । जिल्लाका दुई नगरपालिका र आठ गाउँपालिकाले आगामी आवका लागि रु पाँच अर्ब ५५ करोड सात लाख २४ हजार २५१ बराबरको नीति तथा कार्यक्रम सार्वजनिक गरेका हुन् ।

जिल्लाको सबैभन्दा ठूलो स्थानीय तह दिक्तेल रुपाकोट मझुवागढी नगरपालिकाले रु एक अर्ब दुई करोड ९२ लाख ३४ हजार ३९१ को नीति तथा कार्यक्रम ल्याएको छ । पन्ध्र वडा रहेको यो नगरपालिकाले कृषि, पर्यटन, शिक्षा क्षेत्र सुधार, स्वास्थ्य क्षेत्रको गुणस्तर, स्थानीय गौरवका आयोजना, विपद् व्यवस्थापन, श्रमदानलाई प्रोत्साहन गर्ने, रोजगारी वृद्धि गर्ने, स्थानीय कृषि उत्पादन वृद्धि र बजारीकरण गरी स्वावलम्बी र आत्मनिर्भर नागरिक बनाउनेजस्ता कार्यक्रमलाई प्राथमिकता दिएर नीति तथा बजेटमा समावेश गरिएको नगरप्रमुख तीर्थराज भट्टराईले जानकारी दिनुभयो ।

त्रिधार्मिकस्थलमा पर्ने हलेसी तुवाचुङ नगरपालिकाले रु ८० करोड १८ लाख ८१ हजार ७१९ को नीति तथा कार्यक्रम ल्याएको छ । एघार वडा रहेको यो नगरपालिकाले भौतिक पूर्वाधारबाहेक खानेपानी योजना, पर्यटन विकास तथा कृषि उत्पादनमा मात्रै रु छ करोड ४७ लाख ९४ हजार ११९ बजेट विनियोजन गरेको छ ।

जिल्लाको दक्षिणी क्षेत्रमा पर्ने खोटेहाङ गाउँपालिकाले आर्थिक वर्ष २०८२/८३ का लागि रु ५५ करोड ४८ लाख ९९ हजार ८१९ बराबरको वार्षिक बजेट ल्याएको छ । गाउँपालिकामध्ये सबैभन्दा ठूलो नौ वडा रहेको यो गाउँपालिकाले आर्थिक विकास, सुशासन तथा संस्थागत विकास, वन वातावरण तथा विपद व्यवस्थापन, पूर्वाधार विकास र सामाजिक विकासलाई प्राथमिकता दिएर नीति तथा कार्यक्रम बनाइएको गाउँपालिका प्रमुख उदिमबहादुर राई ‘मुक्ति’ले जानकारी दिनुभयो ।

कृषि व्यवसायका लागि जिल्लाको सबैभन्दा उर्वर क्षेत्रमा पर्ने रावाबेंसी गाउँपालिले रु ३८ करोड ५६ लाख ५६ हजार ८४३ को अनुमानित बजेटको नीति तथा कार्यक्रम ल्याएको छ । भौतिक पूर्वाधार र कृषिलाई प्राथमिकता दिएर आगामी आव २०८२/८३ को बजेट ल्याएको गाउँपालिका प्रमुख फटिककुमार श्रेष्ठले जानकारी दिनुभयो ।

दिप्रुङ चुइचुम्मा गाउँपालिकाले आगामी आर्थिक वर्ष २०८२/८३ का लागि रु ५६ करोड दुई लाख ६८ हजार ५८९ बजेट ल्याएको छ । पूर्वाधार विकास, शैक्षिक गुणस्तर अभिवृद्धि, कृषि क्षेत्रको आधुनिकीकरण, गुणस्तरीय स्वास्थ्य सेवा, खानेपानी, सरसफाइ तथा स्वच्छता व्यवस्थापन, भ्रष्टाचार नियन्त्रण, आन्तरिक रोजगारीमा जोड, लैङ्गिक तथा समावेशीकरण, सूचना प्रविधिमा आधारित सेवा प्रवाह, विपद् व्यवस्थापनलगायत क्षेत्रमा आधारित रहेर आगामी आवको नीति तथा कार्यक्रम निर्माण गरिएको गाउँपालिका प्रमुख लोकेन्द्र राईले जानकारी दिनुभयो ।

जिल्लाको उत्तरी क्षेत्रमा ऐंसेलुखर्क गाउँपालिकाले रु ४९ करोड ७० लाख ९३ हजार ८८ बजेट प्रस्तुत गरेको छ । भौतिक पूर्वाधार निर्माणका योजनालाई पहिलो प्राथमिकतामा राखेर वार्षिक नीति तथा कार्यक्रम निर्माण गरेर सार्वजनिक गरिएको गाउँपालिका प्रमुख गिरेन्द्रबहादुर राईले जानकारी दिनुभयो ।

बराहपोखरी गाउँपालिकाले रु ३८ करोड ४० लाख ५६ हजार ७७० बजेट ल्याएको छ । बजेट कार्यान्वयनलाई जिम्मेवार र जवाफदेही बनाउन आगामी आवबाट कार्यसम्पादन सम्झौता गर्नेगरी नीति तथा कार्यक्रम ल्याइएको गाउँपालिका प्रमुख सालिकराम बञ्जाराले जानकारी दिनुभयो ।

जन्तेढुङ्गा गाउँपालिकाले रु ४४ करोड ३७ लाख ३४ हजार बजेट सार्वजनिक गरेको छ । आयआर्जन र रोजगारी सिर्जना हुने मुख्य कृषि र पशुपालन भएको भन्दै निर्वाहमुखी कृषि प्रणालीबाट व्यवसायीकरणतर्फ उन्मुख गराउन विभिन्न कार्यक्रम सञ्चालन गर्ने नीतिलाई निरन्तरता दिइएको गाउँपालिका प्रमुख अरुणादेवी राई ‘दिक्षा’ले जानकारी दिनुभयो ।

केपिलासगढी गाउँपालिकाले रु ५० करोड सात लाख ५९ हजार ३७३ बराबरको नीति तथा कार्यक्रम र बजेट सार्वजनिक गरेको छ । भौतिक पूर्वाधार विकास तथा कृषि उत्पादनलाई प्राथमिकतामा राखेर वार्षिक नीति तथा कार्यक्रम ल्याइएको गाउँपालिका प्रमुख समीर राईले जानकारी दिनुभयो ।

जिल्लाको सबैभन्दा सानो स्थानीय तह (पाँचवटा मात्रै वडा रहेको) साकेला गाउँपालिकाले आव २०८२/८३ का लागि रु ३९ करोड ३० लाख ३९ हजार ६५९ बजेट ल्याएको छ । गाउँसभामा गाउँपालिका प्रमुख रविप्रकाश राईले ‘नवजात शिशु बचत’ योजनालगायत नयाँ नीति तथा कार्यक्रम घोषणा गर्नुभएको थियो ।

चितवन, ११ असारः अत्यधिक गर्मी बढेसँगै अण्डाको उत्पादन घटेपछि माग बढेर मूल्यवृद्धि भएको छ । विगतको तुलनामा २५ प्रतिशत हाराहारी उत्पादन घटेसँगै मूल्य बढेको हो ।

कृषि तथा वन विज्ञान विश्वविद्यालय रामपुरका उपप्राध्यापक डा अनन्त दाहालका अनुसार गर्मीका कारण कुखुराले दाना कम खाँदा अण्डा उत्पादन पनि कम भएको छ । पच्चीस प्रतिशत हाराहारी उत्पादन घटेको छ । यो मौसममा रोग देखिने गर्दछ, पानी परेर आद्रता बढ्दा कुखुरालाई गर्मीको तनाव झन् बढ्छ । जसले उत्पादन घटाउँछ ।

नेपाल लेयर्स कुखुरापालक सङ्घका केन्द्रीय अध्यक्ष विनोद पोखरेलका अनुसार उत्पादन घटेपछि माग धान्न कठिन भएको छ । सङ्घले आजबाट लागू हुनेगरी समर्थन मूल्य तोकेको छ । बढेको समर्थन मूल्यअनुसार चितवनको फार्म मूल्य ठूलो प्रतिक्रेट रु चार सय ८० र मझौला रु चार सय ५० कायम गरिएको छ । दुवैमा प्रतिक्रेट रु ३० वृद्धि भएको हो ।

व्यवसायीहरूले यसलाई होलसेल मूल्यमा प्रतिकार्टुन (सात क्रेट)को ठूलो रु तीन हजार ५४० र मझौला रु तीन हजार ३३० मा बिक्री गर्ने पोखरेलले बताउनुभयो । चार महिनाअघि दैनिक ४० हजार कार्टुन अण्डा उत्पादन हुनेमा अहिले २८ देखि ३० हजारमा झरेको पोखरेलले बताउनुभयो । गर्मीसँगै दानाको मूल्य बढेको र अण्डाको मूल्य कम हुँदा धेरै किसानले कुखुरा बेचे र नयाँ चल्ला राख्न सकेका छैनन् । विद्यालय, क्याम्पस खुलेर र पर्यटक बढेपछि बजारमा अण्डाको माग बढेको उहाँ बताउनुहुन्छ । अण्डाको मूल्य घट्दा धान्न नसकेर धेरैले माउ कुखुरा बिक्री गरेकाले पनि उत्पादन घटेको हो ।

धेरै किसान विस्थापितसमेत भएको उहाँ बताउनुहुन्छ । गत वर्ष प्रतिक्रेट रु पाँच सय २५ सम्म पुगेको अण्डाको मूल्य घटेर रु तीन सय ५० मा झरेको थियो । नेपालमा अण्डाको लागत मूल्य प्रतिगोटा १६ रुपैयाँ ५६ पैसा छ ।

राष्ट्रिय पन्छी रोग अन्वेषण प्रयोगशाला भरतपुरका प्रमुख डा विजयकुमार श्रेष्ठका अनुसार चितवन र आसपासका जिल्लाबाट यहाँ ल्याइएका नमूना हेर्दा ५० फार्ममा एच ९ (एचनाइन) रोगको सङ्क्रमण देखिएको छ । यससँगै गम्बारो, साल्मोनेलाजस्ता समस्या छन् । जसले गर्दा अण्डाको उत्पादन घटेको उहाँ बताउनुहुन्छ । वर्षात्को समयमा चर्काे गर्मीसँगै ढुसीजन्य आहारका कारण रोग बढ्ने र उत्पादन घट्ने उहाँ बताउनुहुन्छ ।

दमौली (तनहुँ), ११ असारः तनहुँको भिमाद नगरपालिका–९ को भानुमति जौपानीको १०० रोपनी क्षेत्रफलमा सामूहिक अबकरे खुर्सानीखेती सुरु गरिएको छ । मुख्यमन्त्री जलवायुमैत्री नमुना कृषक समूहमार्फत अकबरे खुर्सानीखेती गरिएको भानुमति कृषक समूहका अध्यक्ष इमान थापाले जानकारी दिनुभयो ।

कृषि उत्पादन बढाई वडा नं ८ का स्थानीय बासिन्दालाई आत्मनिर्भर बनाउन खुर्सानीखेती सुरु गरेको उहाँको भनाइ छ । उक्त जग्गामा एक लाख अकबरे खुर्सानीको बिरुवा रोपिएको छ । खुर्सानीखेतीबाट किसानले वार्षिक दुई लाख ५० हजार केजी खुर्सानी उत्पादन तथा वार्षिक रु छ करोड २५ लाख आम्दानीको लक्ष्य लिइएको छ ।

यहाँ उत्पादन भएको खुर्सानी पोखरा, भिमाद, खैरेनीटारका बजारमा बिक्री गर्ने योजना छ । हाल बजारमा प्रतिकेजी रु ३०० देखि रु ५०० थोक मूल्य रहेको छ । खुर्सानीको बिरुवा उत्पादनका लागि वडा नं ९ ले रु एक लाख अनुदान दिएको थियो ।

उक्त वडाका आठ वटा टोल मोहरीया, पाइमी, कटनछाप, पाथर्दी, थामडाँडा, सखेप, जौपानी र आस्पाग्दी भाडडाँडामा अकबरे खुर्सानी उत्पादनका लागि पकेट क्षेत्र बनाइने भएको छ । सो वडामा समुदायको आर्थिक वृद्धिका लागि अकबरे खुर्सानी सँगसँगै कफीखेतीका लागि पनि सम्भाव्यता अध्ययन भइरहेको छ ।

तुलसीपुर (दाङ), ११ असारः दाङको शान्तिनगर गाउँपालिकाले पालिकाबासीको विद्युत् महसुल तिर्ने भएको छ । पालिकाले मङ्गलबार सार्वजनिक गरेको आगामी आर्थिक वर्ष २०८२/८३ को नीति तथा कार्यक्रम एवं बजेटमा पालिकाबासीको न्यूनतम विद्युत् महसुल तिरिदिने घोषणा गरेको हो ।

पालिका अध्यक्ष प्रमोद बस्नेतका अनुसार न्यूनतम २० युनिटसम्मको विद्युत् महशुल पालिकाले तिरिदिने भएको हो । “पालिकाबासीको मागका आधारमा यो नीति ल्याएका हौँ, यो लुुम्बिनी प्रदेशकै नयाँ कार्यक्रम हो”, अध्यक्ष बस्नेतले भन्नुभयो ।

‘शान्तिनगर बासीको रहरः उज्यालो शान्तिनगर’ भन्ने अभियान स्वरुप उक्त नीति ल्याएको उहाँले बताउनुभयो । शान्तिनगर गाउँपालिकाका सम्पूर्ण ग्राहकको न्यूनतम शुल्क गाउँपालिकामार्फत नेपाल विद्युत् प्राधिकरणमा रकम दाखिला गर्ने व्यवस्था मिलाउने नीतिमा समावेश गरिएको छ । यसले सबै नागरिकको उर्जामा पहुँच पुग्ने अपेक्षा लिइएको अध्यक्ष बस्नेतले बताउनुभयो ।

त्यस्तै पालिकाभित्रका चिकित्साशास्त्र, चिकित्सक, पाइलट अध्ययन गर्ने विद्यार्थीलाई निश्चित मापदण्डका आधारमा प्रोत्साहन रकम उपलब्ध गराइनेछ । खेलकुद क्षेत्रमा युवाहरुको आकर्षण वृद्धि गर्न राष्ट्रिय स्तरमा छनोट हुने खेलाडीलाई प्रोत्साहन रकम उपलब्ध गराइने बजेटमा उल्लेख छ ।

गलकोट (बागलुङ), १० असारः बागलुङ नगरपालिकाले आज रु एक अर्ब ३० करोड ९५ लाखको बजेट प्रस्तुत गरेको छ । आगामी आर्थिक वर्षका लागि नगर उपप्रमुख राजु खड्काले अनुमानित आय, आन्तरिक राजस्व तथा बैंक रकमलाई आधार मानेर बजेट प्रस्तुत गर्नुभएको हो । बजेट पर्यटन, शिक्षा र पूर्वाधारलगायतमा केन्द्रित भएको छ ।

सोमबार नगरप्रमुख वसन्तकुमार श्रेष्ठले प्रस्तुत गर्नुभएको नीति तथा कार्यक्रम छलफलपछि बजेट प्रस्तुत गरिएको थियो । नीति तथा कार्यक्रममा भने केही वडासदस्यले विरोध जनाएका थिए ।

नगरसभामा उपप्रमुख राजु खड्काले नेपाल सरकारबाट प्राप्त हुने वित्तीय समानीकरण अनुदानतर्पm रु १५ करोड ३७ लाख, सशर्त अनुदानतर्पm रु ७२ करोड २४ लाख, समपूरक अनुदानतर्पm रु दुई करोड २४ लाख, विशेष अनुदान चालुतर्फ रु एक करोड ३० लाख, प्रदेश सरकारबाट प्राप्त हुने समानीकरण अनुदानतर्पm रु दुई करोड १६ लाख ८२ हजार, शसर्त अनुदान पुँजीगततर्फ रु दुई लाख, समपूरक र विशेष अनुदान रु एक करोड विनियोजन गरिएको छ ।

यस्तै सङ्घ, प्रदेश र स्थानीय तहको राजस्व बाँडफाँट रु १५ करोड १२ लाख ६० हजार, तथा आन्तरिक राजस्व र अनुमानित बैंक मौज्दातसहित रु २१ करोड २९ लाख १५ हजार गरी रु एक अर्ब ३० करोड ९५ लाख ५८ हजार आय अनुमान गरी बजेट प्रस्तुत गरिएको उपप्रमुख खड्काले जानकारी दिनुभयो ।

नगरपालिकाले आर्थिक विकासतर्फ रु दुई करोड ९७ लाख, पूर्वाधार विकासतर्फ रु ३९ करोड ५१ लाख ३९ हजार, सामािजक विकासतर्फ रु ६४ करोड ४१ लाख ३९ हजार, सुशासन तथा अन्तरसम्बन्धित क्षेत्रमा रु छ करोड ८१ लाख विनियोजन गरेको छ ।

यस्तै नगरपालिकाले बालमैत्री दिगोपनामा रु २० लाख, न्यायिक समितिलाई रु १५ लाख, आयुर्वेदलाई रु १० लाख, फोहोर व्यवस्थापनलाई रु १२ लाख, स्वास्थ्य क्षेत्रलाई रु १६ लाख, शिक्षालाई रु २८ करोड पाँच लाख बजेट विनियोजन गरेको छ । नगरपालिकाले कृषिलाई रु १५ लाख, पशु विकासलाई रु १० लाख, सामी परियोजनालाई रु तीन लाख र महलिा तथा बालबालिकालाई रु २० लाख विनियोजन गरेको छ ।

बालमैत्री कार्यक्रम नगरपालिकाको सफल कार्यक्रम रहेको बताउँदै दिगोपानाका लागि रु २० लाख बजेट विनियोजन गरेको उहाँले बताउनुभयो । बालमैत्री घोषणापश्चात् सूचकहरु घट्दै गएकामा चिन्ता व्यक्त भइरहेको सन्दर्भमा नगरपालिकाले दिगोपनालाई चासो नदिएको बजेटबाट प्रष्ट भएको देखिएको छ । बालमैत्री घोषणा कार्यक्रमकै करिब रु सात लाख रकम भुक्तानी गर्न अझै बाँकी रहेको छ ।

नगरपालिकाले सङ्घीय सरकारबाट हस्तान्तरण भएर आएको कार्यक्रममा नेपाली कांग्रेस बागलुङको भवन निर्माणमा रु ७० लाख विनियोजन गरेको छ । संघीय सरकारले हस्तान्तरण गरेको कार्यक्रममा बागलुङ–३ मा विपि स्मृति भवन निर्माणका लागि रु ७० लाख विनियोजन भएको छ । कांग्रेस पार्टी कार्यालयको भवनलाई विपी स्मृति भवनको नाममा स्थानीय पालिकाले समेत यसअघि बजेट राखेका थिए ।

नगरपालिकाले पहिलो वर्ष नै रु २० लाख बजेट विनियोजन गरेको थियो । नगरपालिकाले प्राथमिकतामा राखिएको बालमैत्री, कुकुर होस्टेलजस्ता कार्यक्रमलाई उपेक्षा गरिएको छ । बालमैत्रीका आवश्यक सूचक घोषणामा पूरा भए पनि दिगोपनामा पछिल्लो चार महिनायता शून्य गतिविधिले सूचक घट्दै गएको छ ।

कर्णाली, १० असारः कर्णाली प्रदेशको राजधानी रहेको वीरेन्द्रनगर नगरपालिकाले आगामी आर्थिक वर्ष २०८२÷८३ का लागि रु चार अर्ब ३८ करोड २७ लाख १५ हजारको बजेट विनियोजन गरेको छ ।

नगरपालिकाको १७औँ नगरसभामा आज उपप्रमुख नीलकण्ठ खनाले उक्त बजेट सार्वजनिक गर्नुभएको हो । विनियोजित बजेटमा पुँजीगततर्फ रु दुई अर्ब ७८ करोड ८४ लाख ८५ हजार (६३ दशमलव ६३ प्रतिशत) र चालुतर्फ रु एक अर्ब ५९ करोड ४२ लाख ३० हजार (३६ दशमलव ३७ प्रतिशत) रहेको छ । उपप्रमुख खनालका अनुसार आगामी वर्षको बजेटमा कर्मचारीको तलबभत्ता तथा कार्यालय सञ्चालनका लागि रु ३२ करोड ६५ लाख बजेट विनियोजन गरिएको छ ।

आगामी आवको खर्च बेहोर्ने स्रोत सङ्घीय वित्तीय समानीकरण अनुदानबाट प्राप्त रु २४ करोड २४ लाख, नगरपालिकाले सङ्घीय सरकारबाट प्राप्त गर्ने रु अर्ब २० करोड आठ लाख, ससर्त अनुदान तथा सङ्घीय राजस्व बाँडफाँटबाट प्राप्त रु २० करोड ५७ लाख ९३ हजार, प्रदेश सरकार वित्तीय समानीकरण अनुदानबाट प्राप्त रु तीन करोड ३४ लाख ५३ हजार रहेको जनाइएको छ ।

त्यसैगरी खानेपानी, सुशासन तथा पूर्वाधार प्रवद्र्धन कार्यक्रम (म्याचिङ फन्ड भेरी पम्पिङ आयोजना) सञ्चालन, व्यवस्थापन एवं सहकार्यका निम्ति रु ११ करोड ६० लाख, वडास्तरीय योजना तथा कार्यक्रमका लागि रु १९ करोड २८ लाख र नगरस्तरीय क्षेत्रगत कार्यक्रम सञ्चालनका लागि रु एक अर्ब २५ करोड ९२ लाख ७९ हजार विनियोजन भएको उपप्रमुख खनालले बताउनुभयो ।

प्रदेश सशर्त अनुदानबाट प्राप्त हुने रु ३७ करोड ६१ लाख ३६ हजार, घरजग्गा, रजिस्ट्रेशन तथा मनोरञ्जन करबाट प्राप्त रु १५ करोड, दहत्तर बहत्तर शुल्कबाट प्राप्त रु दुई करोड ५० लाख र आन्तरिक आयबाट रु ५१ करोड ६३ लाख ५० हजार आगामी वर्षको नीति तथा कार्यक्रम कार्यान्वयनका लागि स्रोत व्यवस्थापन हुने अनुमान नगरपालिकाले गरेको छ ।

नगरपालिकाले चालु आव २०८१÷८२ का क्रमागत आयोजना तथा सर्न सक्ने बैंक मौज्दात रु ४१ करोड २७ लाख ८३ हजार तथा सामाजिक सुरक्षा अनुदानबाट प्राप्त रु ४० करोडलाई आगामी वर्षको खर्च धान्ने स्रोतका रुपमा राखेको छ । नगपालिकाले आगामी आवमा उपमहानगरपालिकाका लागि पहल गर्ने जनाएको छ ।

आवको बजेट कार्यान्वयन गर्न विगतको अथक प्रयासबाट प्राप्त उपलब्धिलाई संस्थागत गर्दै नगर क्षेत्रमा अति आवश्यक पूर्वाधार निर्माण, सामाजिक न्याय, खेलकुद तथा क्षमता विकास, आधारभूत शिक्षा एवं स्वास्थ्य सेवामा पहुँच बढ्ने र सहरी सौन्दर्यमा टेवा पुगी नगरपालिकाको दिगो एवं सन्तुलित विकासमा सहयोग पुग्ने विश्वास लिइएको नगर प्रमुख मोहनमाया ढकालले जानकारी दिनुभयो ।

कञ्चनपुर, १० असारः यहाँका नौ वटै स्थानीय तहले आगामी आव २०८२÷८३ को बजेट सार्वजनिक गरेका छन् । स्थानीय तहहरुले सार्वजनिक गरेको बजेटमा शिक्षा, स्वास्थ्य, कृषि, पर्यटन, रोजगारी, खेलकुद, विपद् व्यवस्थापन लगायतका कार्यक्रमलाई प्राथमिकतमा राखेका छन ।

शुक्लाफाँटा नगरपालिकाको ९२ करोड ७८ लाख बजेट

शुक्लाफाँटा नगरपालिकाले आगामी आर्थिक वर्ष २०८२÷८३ का लागि रु ९२ करोड ७८ लाख ५३ हजार ६३१ बराबरको बजेट पारित गरेको छ । नगरपालिकाको २० औँ नगरसभामा नगर उपप्रमुख कल्पना पन्तले आगामी आर्थिक वर्षका लागि प्रस्तुत गर्ने भएको बजेट नगरसभा सदस्यले ध्वनि मतले पारित गरेका हुन् ।

प्रस्तुत बजेटअनुसार नगरपालिकाको चालु खर्च रु ६७ करोड ७१ लाख १४ हजार ५६६ र पुँजीगत खर्च रु २५ करोड सात लाख ३६ हजार ३४ रहेको छ । नगरसभामा प्रस्तुत आयतर्फ आन्तरिक आय रु दुई करोड ४२ लाख ८४ हजार, मालपोतबाट ७३ लाख, सङ्घीय सरकार राजस्व बाँडफाँटबाट रु १३ करोड छ लाख ५६ हजार ६६१ र प्रदेश सरकार राजस्व बाँडफाँटबाट ५१ लख ६४ हजार रहेको छ ।

यसैगरी नेपाल सरकार अन्तरसरकारी वित्तीय हस्तान्तरण रु ४३ करोड ३२ लाख, प्रदेश सरकार अन्तरसरकारी वित्तीय हस्तान्तरण रु चार करोड ३६ लाख २६ हजार, अनुमानित आन्तरिक आय अल्या रु दुई करोड ७५ लाख, क्षेत्रीय सहरी विकास कार्यक्रम रु २० लाख ६० हजार, सडक बोर्डबाट रु ४० लाख र सामाजिक सुरक्षातर्फ रु २५ करोड रहेको छ ।

नगरपालिकाले आर्थिक विकास क्षेत्रतर्फ रु एक करोड १२ लाख ४६ हजार २७१, सामाजिक विकासतर्फ रु २६ करोड ४६ लाख १५ हजार ३२५ विनियोजन गरेको छ । यसैगरी पूर्वाधार विकासतर्फ रु २४ करोड ८६ लाख ३६ हजार ३५, सुशासन तथा अन्तर सम्बन्धित क्षेत्रतर्फ ७६ लाख र कार्यालय सञ्चालनतर्फ रु ११ करोड ५४ लाख ५० हजार बजेट विनियोजन गरिएको छ ।

भीमदत्त नगरपालिकाको बजेट एक अर्ब ९३ करोड २३ हजार

भीमदत्त नगरपालिकाले आगामी आव २०८२÷८३ का लागि नीति, कार्यक्रम तथा बजेट सार्वजनिक गरेको छ । नगरपालिकाको १७ औँ नगरसभाबाट आगामी वर्षका लागि रु एक अर्ब ९३ करोड ८३ लाख २३ हजार ३१९ बराबरको बजेट पारित गरेको छ ।

प्रस्तुत बजेटअनुसार पुँजीगत वित्तिय समानीकरण वडागत पुँजीतर्फ रु १२ करोड सात लाख, विषयगत शाखातर्फ रु २० लाख, नगरस्तरीय पुँजीगत योजना रु पाँच करोड ८३ लाख ८६ हजार ६८१, सवारी साधन मर्मत रु ५३ लाख ७३ हजार ३१९ बजेट विनियोजन गरिएको छ ।

यसैगरी पुँजीगततर्फ रु पाँच करोड ६४ लाख, सशर्त अनुदान खर्च रु ५४ करोड ९० लाख, विशेष अनुदान खर्च रु दुई करोड ३८ लाख, सामाजिक सुरक्षा रु ५७ करोड, सडक बोर्ड रु एक करोड, सहरी विकास आयोजना रु २० लाख गरेर रु एक अर्ब ९३ करोड ८३ लाख २३ हजार ३१९ बराबरको बजेट नगरपालिकाले पारित गरेको छ ।

नगरपालिकाको आन्तरिक आयतर्फ रु २४ करोड ९२ लाख ३६ हजार ६८१, वडा कार्यालय चालुतर्फ रु ६६ लाख ५० हजार, विषयगत शाखा कार्यक्रमतर्फ रु दुई करोड २० लाख, नगर विकास कोषतर्फ रु एक करोड, भारतीय दूतावास म्याचिङतर्फ रु दुई करोड, नगरस्तरीय पुँजीगत रु एक करोड दुई लाख १३ हजार ३००, सवारीसाधन मर्मत रु ५४ लाख, विभिन्न कोषतर्फ रु दुई करोड ६५ हजार विनियोजन गरिएको छ ।

नगरपालिकाले आउँदो आवदेखि महिलाकोे उच्च शिक्षालाई प्राथमिकतामा राख्दै छोरीबुहारी उच्च शिक्षा अध्ययन कार्यक्रम सञ्चालन गर्न बजेटमा व्यवस्था मिलाएको छ । नगर प्रमुख पदम बोगटीले आउँदो वर्ष कार्यक्रम सञ्चालन गर्नका लागि कार्यविधि बनाएर लागू गरिने बताउनुभयो ।

कृष्णपुर नगरपालिकाको एक अर्ब एक करोड ११ लाखको बजेट

कृष्णपुर नगरपालिकाले आर्थिक वर्ष २०८२÷८३ का लागि रु एक अर्ब एक करोड ११ लाख ८२ हजार ४५१ बराबरको बजेट पारित गरेको छ । प्रस्तुत बजेटअनुसार आन्तरिक आय रु आठ करोड, सङ्घीय सरकारको वित्तीय समानीकरण शीर्षकबाट रु १५ करोड ९९ लाख र प्रदेश सरकारबाट रु एक करोड ४९ लाख १३ हजार रकम प्राप्त हुने अनुमान गरिएको छ ।

यसैगरी सङ्घीय राजस्व बाँडफाँटबाट रु १५ करोड ३० लाख ९३ हजार ४५१ र प्रदेश राजस्व बाँडफाँटबाट रु ४७ लाख २१ हजार, सामाजिक सुरक्षाका लागि रु २५ करोड, सङ्घीय सशर्त अनुदानमार्फत रु २५ करोड एक लाख र प्रदेश सशर्त अनुदानबाट रु एक करोड ९६ लाख ५५ हजार आय हुने बताइएको छ ।

सङ्घीय समपूरक अनुदानबाट रु ८३ लाख र प्रदेशबाट रु दुई करोड १० लाख तथा सङ्घीय विशेष अनुदानबाट रु चार करोड ५५ लाख र प्रदेश विशेष अनुदानबाट रु ४० रकम प्राप्त हुनेछ । नगरपालिकाले बजेटमा पूर्वाधार विकास, शिक्षा, स्वास्थ्य, कृषि तथा रोजगारी, खानेपानी, खेलकुदलाई प्राथमिकता दिएको छ ।

नगर प्रमुख हेमराज ओझाले आगामी आवमा शिक्षा भौतिक पूर्वाधार र सामाजिकतर्फ नयाँ कार्यक्रम सञ्चालनका लागि बजेटमा व्यवस्था गरिएको बताउनुभयो । नगरपालिका क्षेत्रकै राना थारु समुदायबाट पहिलो मन्त्री हुनुभएका स्वर्गीय लबरु राना थारुका नामबाट उच्च शिक्षा छात्रवृत्ति कार्यक्रम सञ्चालन गर्नका लागि आवश्यक बजेट विनियोजन गरिएको उहाँले बताउनुभयो ।

कृष्णपुर स्वास्थ्यचौकीमा सर्पदंश उपचार केन्द्र स्थापना, शीतगृह सञ्चालन, दक्षिण कोरियाका सहयोगमा प्रदेशस्तरको टेक्निकल इन्सिच्युट स्थापना गरिने, कृषि एम्बुलेन्सको व्यवस्था गरिने, नगरपालिकामा तीन वटा रङ्गशाला निर्माण गरिनेलगायतका कार्यक्रम अघि सारिएको छ ।

बेदकोट नगरपालिकाको ९८ करोड ६५ लाख २१ हजार बजेट

बेदकोट नगरपालिकाको १७ औँ नगरसभाले रु ९८ करोड ६५ लाख २१ हजार ९२६ बजारको बजेट पारित गरेको छ । नगर प्रमुख भोजराज बोहराका अनुसार बजेटमा एक विद्यालय एक नर्स कार्यक्रम, शीतगृह निर्माण, अस्थायी करार ज्यालादारीमा लामो समयदेखि कार्यरत कर्मचारीलाई सामाजिक सुरक्षाकोषमा आबद्ध गर्ने, नगरको शान्ति सुरक्षाका लागि नगर प्रहरीको व्यवस्थापन गर्ने कार्यक्रम रहेको छ ।

यसैगरी आयुर्वेदिक स्वास्थ्य केन्द्रको स्थापना तथा सञ्चालनका लागि आवश्यक प्रबन्ध गर्ने, दैजीमा आँखा उपचार केन्द्र स्थापना गर्ने, दैनिक ज्यालादारीमा रहेका कर्मचारीलाई मासिक ज्यालादारीमा रुपान्तरण गर्न आवश्यक प्रबन्ध गर्ने रहेको छ ।

पुनर्वास नगरपालिकाको ७५ करोड ७७ लाख १८ हजार बजेट

पुनर्वास नगरपालिकाले आव २०८२÷८३ का लागि रु ७५ करोड ७७ लाख १८ हजार ६१ बरावरको बजेट नगरसभाबाट आज परित गरेको छ । प्रस्तुत बजेटअनुसार सङ्घीय सरकारबाट वित्तीय समानीकरण अनुदानतर्फ रु १४ करोड ९३ लाख, सशर्त अनुदानतर्फ रु २८ करोड ६८ लाख र राजस्व बाँडफाँटबाट रु १२ करोड ७० लाख १३ हजार ६१ प्राप्त हुने अनुमान गरिएको छ ।

यसैगरी प्रदेश सरकारबाट वित्तीय समानीकरणतर्फ रु एक करोड ४२ लाख तीन हजार, विशेष अनुदान रु ४५ लाख, समपूरक अनुदान रु ६९ लाख र सवारीसाधन कर बाँडफाँटबाट रु ८५ लाख दुई हजार प्राप्त हुनेछ । नगरपालिकाले आन्तरिक आयबाट रु चार करोड ३० लाख सङ्कलन हुने अनुमान गरिएको छ । नगरपालिकाले कृषि, शिक्षा, स्वास्थ्य, विपद् व्यवस्थापन, पर्यापर्यटन र पूर्वाधार विकासलाई प्राथमिकतामा राखेर बजेट विनियोजन गरेको छ ।

लालझाडी गाउँपालिकाको बजेट रु ४३ करोड ६५ लाख २२ हजार

लालझाडी गाउँपालिकाले आव २०८२÷८३ का लागि रु ४३ करोड ६५ लाख २२ हजारको बजेट परित गरेको छ । गाउँसभामा प्रस्तुत बजेटअनुसार चालू खर्चतर्फ रु २३ करोड ९९ लाख २६ हजार र पुँजीगत खर्चतर्फ रु १९ करोड ६५ लाख ९६ हजार रहेको छ । चालु खर्चतर्फ प्रशासनिक सञ्चालन, तलबभत्ता, सेवा प्रवाह, कार्यक्रम व्यवस्थापनजस्ता कार्यक्रममा बजेट विनियोजन गरिएको छ । पुँजीगततर्फ पूर्वाधार विकास, शिक्षा, स्वास्थ्य, कृषि, खानेपानी, सडक निर्माण, ऊर्जा र महिला सशक्तीकरणका कार्यक्रम राखिएका छन् ।

बेलडाँडी गाउँपालिकाको बजेट रु ५४ करोड ५० लाख ४४ हजार

बेलडाँडी गाउँपालिकाले आगामी आव २०८२÷८३ का लागि रु ५४ करोड ५० लाख ४४ हजारको बजेट ल्याएको छ । गाउँपालिका प्रमुख हरिशचन्द्र रानाका अनुसार १७ औँ गाउँसभाबाट बजेट परित गरिएको छ ।

बजेटअनुसार चालु खर्चतर्फ ३७ करोड ४३ लाख र पुँजीगत खर्चतर्फ रु १७ करोड सात लाख रहेको छ । आन्तरिक आयतर्फ रु एक करोड, राजस्व बाँडफाँटतर्फ रु सात करोड ९४ लाख ९० हजार रहेको छ भने वित्तिय हस्तान्तरण सङ्घीय सरकारबाट रु ३१ करोड १४ लाख, प्रदेश सरकारबाट रु दुई ४१ लाख ५४ हजार, सामाजिक सुरक्षातर्फ रु १२ करोड रहेको छ । गाउँपालिकाले कृषि, स्वास्थ्य, शिक्षा, रोजगार, पर्यापर्यटनका कार्यक्रमलाई प्राथमिकतामा राखेको छ ।

बेलौरी नगरपालिकाको ७४ करोड ७७ लाख बजेट

बेलौरी नगरपालिकाले आव २०८२÷८३ का लागि रु ७४ करोड ७७ लाख ८० हजारको बजेट नगरसभाबाट पारित बजेटमा शिक्षा, स्वास्थ्य, कृषि, रोजगारीलाई प्राथमिकतामा राखिएको छ । आगामी आवमा आन्तरिक राजस्व रु तीन करोड ७१ लाख ६८ हजार सङ्कलन गर्ने लक्ष्य राखिएको छ ।

नगर प्रमुख पोतिलाल चौधरीका अनुसार बजेटमा नगर गौरवका योजनालाई अगाडि बढाउने गरी बजेट विनियोजन गरिएको छ । विपद् व्यवस्थापनको कार्यलाई प्रभावकारी बनाउन विपद् व्यवस्थापन कोष स्थापना गर्नका लागि आवश्यक रकम विनियोजन गरिएको छ । ‘एक घर, एक बिमा’ कार्यक्रमलाई अघि सार्ने योजना बनाइएको छ । विद्यावारिधि गर्ने नगर क्षेत्रका विद्यार्थीलाई रु एक लाखसम्मको अध्ययन खर्च उपलब्ध गराउने योजना बजेटमा रहेको छ ।

कृषकको क्षमता अभिवृद्धि गरी उत्पादकत्व बढाउनका लागि व्यावसायिक खेतीमा संलग्नलाई प्रोत्साहित गर्न बीउबिजन, कृषियन्त्र, उपकरणमा अनुदान उपलब्ध गराउनका लागि बजेटमा व्यवस्था गरिएको नगर प्रमुख चौधरीले उल्लेख गर्नुभयो । उहाँका अनुसार केराको थामबाट धागो, डोरी, कागज उत्पादन गर्ने, उखुबाट गुड उत्पादन गर्ने उद्योगलाई प्रोत्साहित गरिने छ ।

दोधारा चाँदनी नगरपालिकाको बजेट रु ७५ करोड ३० लाख

दोधारा चाँदनी नगरपालिकाले आव २०८२÷८३ का लागि रु ७५ करोड ३० लाख ७८ हजारको बजेट नगरसभाबाट पारित गरेको छ । बजेटमा नगरपालिकाले किसानलाई आत्मनिर्भर बनाउने, शिक्षा, पूर्वाधार, स्वास्थ्य, युवालाई उद्यमका माध्यमबाट स्वरोजगार बनाउने कार्यका लागि आवश्यक बजेट विनियोजन गरेको छ ।

पर्यापर्यटन प्रवद्र्धन गर्ने र नगर क्षेत्रमा खाद्य डिपो सञ्चालन गर्ने नगरपालिकाको आगामी योजना रहेको छ । नगरको आन्तरिक आयमा वृद्धि गर्नका लागि करको दायरालाई फराकिलो बनाइने योजना बजेटमा समावेश गरिएको छ ।

धनुषा, १० असारः बर्दिवास नगरपालिकाले आगामी आर्थिक वर्ष २०८२÷८३ का लागि रु एक अर्ब २२ करोड ४० लाख १० हजारको बजेट प्रस्तुत गरेको छ । आज नगरसभाको १६ औँ अधिवेशनमा उपप्रमुख तारादेवी महतोले पूर्वाधार विकास, वडास्तरीय योजना र सामाजिक क्षेत्रलाई प्राथमिकता दिँदै बजेट सार्वजनिक गर्नुभएको हो ।

उक्त बजेटको स्रोत भने वित्तीय समानीकरण अनुदान सङ्घीय सरकारबाट रु ८७ करोड ४५ लाख ५८ हजार ५१० र प्रदेश सरकारबाट रु चार करोड ५३ लाख ६३ हजार ७२०, आन्तरिक आयतर्फबाट रु २५ करोड ४० लाख ८७ हजार ७७० प्राप्त हुने अनुमान तथा सङ्घीय सरकार र मधेस प्रदेश सरकार तथा नगरपालिकाको आन्तरिक आयबाट कूल चालु आव २०८१÷८२ बाट बचत भई अनुमानित मोज्दात रु पाँच करोड गरी अनुमानित बजेट पेस गरिएको छ ।

यस्तै चालु बजेटतर्फ नगरपालिकाको कार्यालय, वडा कार्यालय कार्य सञ्चालन तथा अन्य प्रशासनिक एवं पुँजीगत खर्चतर्फ रु २३ करोड ६३ लाख विनियोजन गरिएको छ भने बर्दिवास अस्पताल, स्वास्थ्यचौकी तथा आधारभूत स्वास्थ्य केन्द्रमा कार्यरत करार तथा ज्यालादारी कर्मचारीको तलब भत्ता एवं अन्य स्वास्थ्य उपकरण, औषधि खरिदलगायतका कार्यका लागि रु छ करोड ३२ लाख ७५ हजार विनियोजन गरिएको छ ।

त्यसैगरी पुँजीगत तथा विकास बजेटतर्फ नगरका विभिन्न सडक कालोपत्र ढलान तथा स्तरोन्नति गर्न सडक निर्माणतर्फ रु पाँच करोड छ लाख १५ हजार तथा सङ्घीय सरकारको समपूरकअन्तर्गतका योजनामा कार्यालयबाट लागत साझेदारी गर्न नगरपालिकाको ‘म्याचिङ फण्ड’मा रकम रु तीन करोड प्रस्ताव गरिएको छ ।

शिक्षातर्फमा रु दुई करोड ५० लाख, खेलकुदका लागि रु ४० लाख विनियोजन प्रस्ताव गरिएको छ । खानेपानी तथा सरसफाइतर्फ रु ८५ लाख, जलश्रोत तथा सिँचाइतर्फ रु ६८ लाख, पर्यटनतर्फ रु ४० लाख, भवन तथा सहरी विकासतर्फ रु दुई करोड विनियोजन गरिएको छ ।

यस्तै लैङ्गिक समावेशीकरण तथा सशक्तीकरणतर्फ रु एक करोड ७८ लाख, सहकारीतर्फ रु पाँच लाख, कृषि पशुपंक्षीतर्फ रु चार करोड, न्यायिक समितितर्फ रु १० लाख, विपद् व्यवस्थापनतर्फ रु ८१ लाख ७५ हजार, ऊर्जा तथा ग्रामीण विद्युतीकरणमा रु १२ करोड २५ लाख ४५ हजार विनियोजन गरिएको उपप्रमुख महतोले पेस गर्नुभएको बजेट वक्तव्यमा उल्लेख गरिएको छ ।

बजेटको सन्दर्भमा नगर प्रमुख प्रह्लादकुमार कार्कीले राजनीतिक दल, उद्योगी, व्यवसायी र नागरिक समाजसँगको बृहत् छलफल र सहमतिबाट बजेट निर्माण गरिएको बताउनुभयो । उहाँले यो बजेटले समृद्ध नगर बनाउने अभियानमा सघाउ पु¥याउने विश्वास व्यक्त गर्नुभयो ।

भद्रपुर (झापा), १० असारः आन्तरिक राजस्व कार्यालय भद्रपुरले चालु आर्थिक वर्ष २०८१÷८२ को ११ महिनामा रु दुई अर्ब ९१ करोड ९८ लाख ३६ हजार राजस्व सङ्कलन गरेको छ । उक्त रकम गत आव २०८०÷८१ को सोही अवधिको तुलनामा नौ दशमलव २४ प्रतिशतले बढी हो ।

गत आव २०८०÷८१ को (साउन–जेठ)मा रु दुई अर्ब ६७ करोड २६ लाख ३१ हजार राजस्व सङ्कलन भएको कर अधिकृत एवं सूचना अधिकारी डोरराज सुनुवार जानकारी दिनुभयो । आन्तरिक राजस्व कार्यालयले चालु आव २०८१÷८२ मा रु चार अर्ब ६१ लाख राजस्व सङ्कलन गर्ने लक्ष्य राखेको उहाँले बताउनुभयो ।

गत आवको भन्दा राजस्व सङ्कलन बढेको भए पनि चालु आवको ११ महिनाको लक्ष्यको ८५ दशमलव ६१ प्रतिशत मात्रै राजस्व सङ्कलन भएको कर अधिकृत सुनुवारले बताउनुभयो । कार्यालयले ११ महिनामा आयकरबाट रु एक अर्ब रु २६ करोड ५२ लाख, ब्याजबापत रु आठ करोड १६ लाख, मूल्य अभिवृद्धि करबापत रु ९८ करोड २८ लाख ३१ हजार, अन्तःशुल्कबापत रु ५५ करोड १६ लाख ६७ हजार राजस्व सङ्कलन गरेको छ ।

“कार्यालयले राजस्व सङ्कलनको लक्ष्य हासिल गर्न निरन्तर बजार अनुगमन र निगरानी गरिरहेको छ, यसका साथै कर बक्यौता राख्ने करदाताको बैंक खाता रोक्का गर्ने, जग्गा रोक्का गर्नेलगायतका कानुनी कारबाही गर्ने गरिएको छ”, सूचना अधिकारी सुनुवारले भन्नुभयो ।

साथै कार्यालयमा दर्ता भएका मूल्य अभिवृद्धि करदातामध्ये एक हजार ५८८ करदातालाई निलम्बन गरिएको सूचना अधिकारी सुनुवारले जानकारी दिनुभयो । आन्तरिक राजस्व विभागले विगत छ महिना लगातार मूल्य अभिवृद्धि कर विवरण नबुझाएका ती करदातालाई निलम्बन गरेको उहाँले बताउनुभयो । कार्यालयका सूचना अधिकारी सुनुवारका अनुसार विवरण नबुझाएकालाई निलम्बन गरेसँगै ती संस्थाको कारोबार रोक्का गरिएको बारेमा उद्योग वाणिज्य सङ्घ, उपभोक्तालगायतलाई जानकारी गराइएको छ ।

खोटाङ, १० असारः दिक्तेल रुपाकोट मझुवागढी नगरपालिकाले आगामी आर्थिक वर्ष २०८२/८३ का लागि रु एक अर्ब दुई करोड ९२ लाख ३४ हजार तीन सय ९१ बजेट सार्वजनिक गरेको छ । दिक्तेलस्थित जिल्ला समन्वय समितिको सभाहलमा भएको १३औँ नगरसभा बैठकमा उपप्रमुख विशन राईले नीति तथा कार्यक्रम र बजेट प्रस्तुत गर्नुभएको हो ।

नगरपालिकाबाट आन्तरिक आय रु दुई करोड २० लाख, सङ्घीय सरकारअन्तर्गत राजस्व बाँडफाँडबाट रु १४ करोड ९३ लाख ९० हजार ६७८, सङ्घीय सरकारअन्तर्गत अनुदानबाट रु ६९ करोड २० लाख, प्रदेश सरकारबाट अनुदान शीर्षकमा रु आठ करोड ६८ लाख ४२ हजार र बाँकी अन्य स्रोतबाट खर्च व्यवस्थापन गरिने उहाँले जानकारी दिनुभयो ।

उपप्रमुख राईका अनुसार नगरपालिकाले कृषि, पर्यटन, शिक्षा क्षेत्र सुधार, स्वास्थ्य क्षेत्रको गुणस्तर, स्थानीय गौरवका आयोजना, विपद् व्यवस्थापन, श्रमदानलाई प्रोत्साहन गर्ने, रोजगारी वृद्धि गर्ने, स्थानीय कृषि उत्पादन वृद्धि र बजारीकरण गरी स्वावलम्बी र आत्मनिर्भर गाउँ बनाउनेलागयत विषयलाई बजेटले प्रथामिकता दिएको छ ।

व्यावसायिक कफीखेती प्रवर्द्धन गर्न रु एक करोड, स्थानीय उत्पादनको बजारीकरण गर्न रु १९ लाख, मुढेमा चिस्यान केन्द्र निर्माणका लागि रु २० लाख, बाँदरबाट हुने क्षति न्यूनीकरण गर्दै वैकल्पिक बाली प्रवर्द्धन गर्न रु ३० लाख, प्राङ्गरिक खेती प्रवर्द्धन गर्न रु दश लाख, बङ्गुर र बाख्रा प्रवर्द्धनमा रु १८ लाख, कृषि तथा पशुपक्षी विकास कार्यक्रमअन्तर्गत रु तीन करोड १२ लाख बजेट विनियोजन गरिएको छ ।

रोजगारी तथा लघु उद्यम, पर्यटन पूर्वाधार, सामाजिक विकास, शिक्षा, युवा तथा खेलकुद, स्वास्थ्य, खानेपानी, महिला तथा बालबालिका, ज्येष्ठ नागरिक, भाषा, संस्कार, संस्कृति प्रवर्द्धन तथा संरक्षण, पूर्वाधार, वन तथा वातावरण, विपद् व्यवस्थापन, सरसफाइ, सामाजिक सुरक्षा, संस्थागत विकास, सेवा प्रवाह तथा सुशासनका लागि पनि आवश्यक बजेट व्यवस्था गरिएको उपप्रमुख राईले बताउनुभयो ।

यसैबीच, दिक्तेल रुपाकोट मझुवागढी नगरपालिका–१ दिक्तेलका वडाध्यक्ष नवराज राई र वडा नं ८ का वडाध्यक्ष लीलाकुमार चौहानले नगरसभा बैठक बहिष्कार गर्नुभएको छ । नेतृत्वले आफूखुसी आफ्नो क्षेत्रमा मात्र बजेट ल्याएको भन्दै वडाध्यक्षद्वयले जनताको मागबमोजिम बजेट नआएकाले नगरसभा बहिष्कार गरेको प्रतिक्रिया दिनुभएको छ ।

नगरसभामा नगरप्रमुख तीर्थराज भट्टराईले आर्थिक वर्ष २०८२/८३ का लागि वार्षिक नीति तथा कार्यक्रम र बजेट प्रस्तुत गर्नुभएको थियो ।