Author: nepal one

सोलोमन टापुले सन् २०१९ मा चीनसँग कूटनीतिक सम्बन्ध स्थापना गर्ने सही निर्णय गरेको प्रधानमन्त्री मनसेह सोगाभारेले बताउनु भएको छ ।स्थानीय सञ्चारमाध्यम तभुली न्युजसँगको भर्खरैको अन्तर्वार्तामा सोगाभारेले आफ्नो सरकारको वैदेशिक सम्बन्ध ‘सबैसँग मित्रता’ नीतिमा आधारित रहेको बताउनु भएको छ ।

सन् १९७१ मा संयुक्त राष्ट्रसंघको महासभाले प्रस्ताव २७५८ पारित गरी संयुक्त राष्ट्रसंघमा जनवादी गणतन्त्र चीनका सबै वैधानिक अधिकारहरू पुनर्स्थापित गरेको र त्यहाँको सरकारका प्रतिनिधिहरूलाई चीनको एकमात्र वैधानिक राष्ट्रसंघीय प्रतिनिधिको रूपमा मान्यता दिएको उल्लेख गर्दै सोगाभारेले संयुक्त राष्ट्रसंघका प्रत्येक सदस्य राष्ट्रको प्रतिनिधित्व गर्ने कुरामा जोड दिनु भएको छ। प्रस्तावको सम्मान गर्न र ताइवानलाई चीनको अभिन्न अङ्गको रूपमा मान्यता दिन बाध्य रहेको उहाँको धारणा छ ।

सोलोमन टापु सानो देश भए तापनि चीनलगायत केही देशका नेताहरूले समान व्यवहार गरेको उहाँले बताउनु भएको छ ।सोलोमन टापुहरूले हालका वर्षहरूमा कोभिड-१९ र दङ्गाजस्ता गम्भीर चुनौतीहरूको सामना गर्दा चीन र अन्य विकास साझेदारहरूले सक्रिय रूपमा सहयोग उपलब्ध गराएको उहाँले स्मरण गराउनु भएको छ ।

“प्यासिफिक टापु देशहरूसँगको शिखर सम्मेलनमा, अमेरिकी नेताले अरूलाई एक घण्टाको व्याख्यान सुनाउने तर अरूलाई मात्र तीन बोल्न दिने गर्छन् जो स्वीकार्य छैन। यो पनि एक सार्वभौमसत्ता सम्पन्न देश हो, हामी समानता चाहान्छौं” उहाँले भन्नुभयो ।

टर्कीको सबैभन्दा ठूलो शहर इस्तानबुलमा रहेको इटालियन चर्चमा आइतबार भएको सशस्त्र आक्रमणमा एकजनाको मृत्यु भएको छ ।

टर्कीका गृहमन्त्री अली येर्लिकायाले सामाजिक सञ्जाल एक्समा उल्लेख गरे अनुसार दुई जना मुखौटा लगाएका व्यक्तिले शहरको युरोपेली तर्फको सरियर जिल्लाको सान्ता मारिया चर्चमा आक्रमण गरेका थिए । घटनाबारे अनुसन्धान थालिएको मन्त्रीले जनाकारी दिनु भएको छ ।

बङ्गलादेशका नोबेल पुरस्कार विजेता मोहम्मद युनुसले आफ्नो वातावरणीय र आर्थिक नीति हासिल गर्न राजनीतिबाट प्रेरित भएको भन्दै अदालती मुद्दाको सामना गर्ने प्रतिबद्धता व्यक्त गर्नुभएको छ ।

“हाम्रो सपना नयाँ संसार सिर्जना गर्नु हो,” मानव अधिकार समूहहरूले व्यापक रूपमा आलोचना गरेको मुद्दामा छ महिनाको जेल सजायविरुद्ध गरिएको अपिलमा औपचारिक रूपमा जमानत पाएपछि ८३ वर्षीय युनुसले अदालत बाहिर पत्रकारहरूलाई भने।

युनुसलाई आफ्नो अग्रणी माइक्रोफाइनान्स बैंकमार्फत लाखौंलाई गरिबीबाट माथि उकास्ने श्रेय दिइन्छ तर उहाँको बङ्गलादेशको लामो समय प्रधानमन्त्री रहेकी शेख हसिनासँगको सम्बन्ध तनावपूर्ण रहेको देखिँदै आएको छ ।

उहाँलाई गरिबहरूको ‘रगत चुसेको’ आरोप बङ्गलादेशको संस्थापन पक्षले लगाउने गरेको छ । विपक्षीले बहिष्कार गरेको चुनावमा भारी मतान्तरले विजयी भएपछि यसै महिना पाँचौं कार्यकालका लागि शपथ लिएकी हसिनाले सन् २००६ को नोबेल शान्ति पुरस्कार विजेता यूनिसको पटकपटक आलोचना गर्नुभएको छ ।

भ्रष्टाचारको प्रमुख आरोपहरू पनि समावेश भएका कम्तिमा १७० अन्य मुद्दाहरूको सामना गरेका युनुसविरूद्ध जनवरी १ मा श्रम कानून उल्लङ्घनसँग सम्बन्धित मुद्दामा पनि जोडिएको थियो ।

उहाँले आफूमाथि लागेका सबै आरोपहरूको खण्डन गर्दै आउनुभएको छ ।युनुसले भावुक हुँदै आफूले आफ्नो जीवन सबैभन्दा बढी खाँचोमा परेकाहरूलाई सहयोग गर्न समर्पित गरेको र आफ्नो कामलाई निरन्तरता दिन प्रतिबद्ध रहेको बताउनुभयो ।

उहाँको ‘थ्री जिरो’ योजनाको उद्देश्य कार्बन उत्सर्जन घटाउनु, बेरोजगारी अन्त्य गर्नु र गरिबी घटाउनु हो ।युनुसले कसैको नाम उल्लेख नगरिकन भन्नुभयो, “हामीले एउटा सपना पूरा गरेका छौँ र यो सपनाको पछि लाग्दा हामीले कसैको चित्त दुखाएका हुनसक्छौँ।”

पछिल्लो घटनामा युनुस र ग्रामीण टेलिकमका तीन सहकर्मीमाथि श्रम कानूनको उल्लङ्घन गरेको आरोप लागेको थियो युनुसले यो मुद्दा सरकारी विभागले ल्याएको आरोप लगाए पनि यातायातमन्त्री ओबैदुल कादिरले भन्नुभयो, “यो मुद्दा कामदारले दायर गरेका हुन् ।”हसिनाले युनुसलाई माफी दिन गरिएको आग्रह अस्वीकार गर्दै आफ्ना कर्मचारीसँग माफी माग्नुपर्ने बताउनुभएको छ ।

बिहारका मुख्यमन्त्री तथा जनता दल (युनाइटेड)का अध्यक्ष नितिश कुमारले आइतबार पटनास्थित राजभवन पुगेर राज्यपाल राजेन्द्र अर्लेकरलाई आफ्नो राजीनामा बुझाउनुभभएको छ ।

राजभवनमा राज्यपाललाई भेटेर नितिशले भन्नुभयो, “हामीले राज्यमा महागठबन्धनसँग सम्बन्ध तोड्ने निर्णय गरेका छौं । नितिशले भाजपा नेतृत्वको राष्ट्रिय जनतान्त्रिक गठबन्धन (एनडीए) मा पुनः सामेल हुने र राज्यमा ‘महागठबन्धन’ शासनको अन्त्य गर्ने चर्चा चलिरहेकै बेला यो घटना भएको हो ।

पूर्व मुख्यमन्त्री तथा राष्ट्रिय जनता दल (आरजेडी) प्रमुख तथा पूर्व मुख्यमन्त्री लालु यादवकी छोरी रोहिणी आचार्यले सामाजिक सञ्जालमार्फत् जारी एक पोस्टमा उहाँले जेडियूमाथि कटाक्ष गर्दै भन्नुभयो, “समाजवादी पार्टीले आफूलाई प्रगतिशील समूहको रूपमा प्रस्तुत गर्छ, तर यसको विचारधारा बदलिँदो वायुको ढाँचासँग परिवर्तन हुन्छ । नितिशको यो निर्णयले उहाँको सत्ता समिकरणका लागि चौँथो अभ्यास (गठबन्धन) हुनेछ ।

कूल २४३ सदस्यीय बिहार विधानसभामा आरजेडीसँग ७९ विधायक छन् भने भाजपासँग ७८ विधायक छन् । विधानसभामा जेडीयू ४५, काङ्ग्रेस १९, भाकपा (एम–एल) १२, हिन्दुस्तानी अवाम मोर्चा (सेक्युलर) को चार र सीपीआई (एम) र भाकपाको एक÷एक सदस्य छन् ।

एआईएमआईएम अन्य दुई सिट र एक स्वतन्त्र सदस्य रहेका छन् । आचार्यले एक नयाँ पोस्टमा साम्प्रदायिक शक्तिविरुद्ध आफ्नो संघर्ष मृत्युपर्यन्त जारी रहने बताउनुभएको छ । “साम्प्रदायिक शक्तिविरुद्ध हाम्रो लडाइँ सास रहेसम्म जारी रहनेछ,” उहाँले ट्वीटरमा लेख्नुभएको छ ।

सन्दिग्ध सोमालियाली समुद्री डाकुहरूले हिन्द महासागरमा डुङ्गामा सवार चालक दलका छ सदस्यसहित डुङ्गालाई अपहरण गरेको कोलम्बोको नौसेनाले आइतबार जनाएको छ ।

श्रीलङ्काली नौसेनाका प्रवक्ता गायन विक्रमासूरियाले लोरेन्जो पुथा–४ लाई सोमालियाली राजधानी मोगादिसुबाट करिब ८४० नटिकल माइल दक्षिणपूर्वमा शनिबार नियन्त्रणमा लिइएको जानकारी दिनुभयो ।

यमनको इरान समर्थित हुथी विद्रोहीसमूहले प्यालेस्टाइनी लडाकू समूह हमासविरुद्ध इजरायलले गरेको युद्धको प्रतिक्रियास्वरूप रेड सी र एडेनको खाडीमा इजरायलसम्बद्ध जहाजहरूलाई लक्षित गरी सयौं आक्रमणहरू गरेका छन् ।

सन् २०१७ को डिसेम्बरमा सोमाली समुद्री डकैतीको पहिलो सफल घटना रेकर्ड भएपछि अन्तर्राष्ट्रिय नौसैनिक बललाई एडेनको खाडीबाट उत्तरतर्फ रेड सीमा डाइभर्ट गरिएको छ ।

“श्रीलङ्काले संयुक्त समुद्री सेनालाई सचेत गराएको छ,” विक्रमासूरियाले अन्तर्राष्ट्रिय समुद्री डकैती विरोधी गठबन्धनलाई सङ्केत गर्दै एएफपीलाई बताउनुभयो ।

उहाँका अनुसार छिमेकी मुलुक भारतको नौसेनाले अनुसन्धानका लागि युद्धपोत पठाइसकेको छ भने श्रीलङ्काको नौसेनाले पनि उक्त क्षेत्रमा तैनाथ गर्नका लागि युद्धक जहाज तयार गरिरहेको छ ।

सन् २०११ मा सोमालियाली तटमा समुद्री डाकूहरूको आक्रमण चरम बिन्दुमा पुगेको थियो र बन्दुकधारीहरूले हिन्द महासागरको सोमाली तटबाट तीन हजार ६५५ किलोमिटर (दुई हजार २७० माइल) टाढासम्म आक्रमण गरेका थिए ।

विदेशस्थित रूसी सम्पत्ति र सम्पत्ति जफत गर्ने पश्चिमा मुलुकहरूको कुनै पनि प्रयासको जवाफ रूसले दिने रूसी विदेश मन्त्रालयले आइतबार जनाएको छ ।

“हामीले विदेशमा रूसी सम्पत्तिको सम्बन्धमा पश्चिमा देशहरूले एकतर्फी रूपमा चालेका दमनकारी कदमहरूको अवैधानिकताको बारेमा धेरै पटक बोलेका छौँं ।

“रूसी महासङ्घको सम्पत्ति जफत गर्नु गैरकानुनी हो र यसले राष्ट्रहरूको सार्वभौम समानतालगायत अन्तर्राष्ट्रिय कानुनका आधारभूत सिद्धान्त र मान्यताको उल्लङ्घन गरेको हामीले बारम्बार उल्लेख गरेका छौं,” रूसी मन्त्रालयलाई उद्धृत गर्दै आरआईए नोभोस्तीले उल्लेख गरेको छ ।

यस्तो कार्य ‘सार्वभौम अचल सम्पत्तिमाथिको घोर अतिक्रमण र राज्यहरूको एक समूहले अर्को समूहको सम्पत्तिको सरासर चोरी’ गरेको मन्त्रालयले जनाएको छ ।

मन्त्रालयले भनेको छ, “‘पश्चिमी गठबन्धन’ देशहरूले रूसी अचल साथै अन्य सम्पत्तिजफत गर्ने उनीहरूको कुनै पनि प्रयासले अनिवार्य रूपमा पर्याप्त र प्रभावकारी प्रतिक्रिया पाउनेछ भनी उनीहरूले बुझेका हुनुपर्छ ।”

भारतको राजधानी नयाँदिल्लीमा भक्तजनका लागि बनाइएको मञ्च एक्कासि भत्किँदा एक महिलाको मृत्यु हुनुका साथै १७ जना घाइते भएका छन् ।“आइतबार बिहानै हामीलाई कालकाजी मन्दिरको एउटा स्टेज भत्किएको खबर आयो । तत्काल उद्धार टोली घटनास्थलमा पुगेको छ,” स्थानीय प्रहरी अधिकारीले भने ।

घाइतेहरूलाई विभिन्न अस्पतालमा भर्ना गरिएको र उनीहरूको अवस्था स्थिर रहेको प्रहरीले जनाएको छ ।घटनापछि कार्यक्रमस्थलमा भागदौड मच्चिएको थियो र मानिसहरु भागेर आत्तिएर चिच्याइरहेका देखिन्थे ।प्रहरी अधिकारीलाई उद्धृत गर्दै स्थानीय सञ्चारमाध्यमले मन्दिरमा बिना अनुमति धार्मिक कार्यक्रम आयोजना गरिएको जनाएका छन् ।

कार्यक्रममा महिला र बालबालिकासहित एक हजार ६०० भन्दा बढीको सहभागिता रहेको थियो ।भिडिओमा घटनास्थल खचाखच भरिएको देख्न सकिन्छ । प्रारम्भिक अनुसन्धान अनुसार मान्छेको वजन धान्न नसकेर मन्दिरको अगाडि बनाइएको स्टेज भत्किएको थियो ।

दिल्लीका मुख्यमन्त्री अरविन्द केजरीवालले ती महिलाको निधनप्रति दुःख व्यक्त गर्दै घाइतेको शीघ्र स्वास्थ्यलाभको कामना गर्नुभएको छ । उहाँले यस्ता ठूला कार्यक्रम आयोजना गर्दा सुरक्षा नियम पालना गर्न आग्रह गर्नुभयो ।

इजरायली सैनिकहरूले खान युनिसमाथि आफ्नो परिचालन नियन्त्रणलाई बलियो बनाउँदै लगेको इजरायली रक्षा बलले बिहीबार बताएको छ । खान युनिस गाजाको दोस्रो ठूलो शहर हो र यसलाई हमास नेता याह्या सिनवारको व्यक्तिगत गढ पनि मानिन्छ । उनको परिवार त्यहाँ बस्ने गरेको अनुमान छ।

ओज ब्रिगेडका सिपाहीहरू, जसलाई “कमान्डो ब्रिगेड” भनेर पनि चिनिन्छ उनीहरूले शहरी युद्धमा विशेषज्ञ, स्नाइपर फायर, सटीक मिसाइलहरू र ट्याङ्क फायर प्रयोग गरेर थुप्रै आतङ्ककारी टोलीहरूलाई नष्ट गरेको दाबी गरिएको छ । साथै अन्य चार आतङ्ककारीहरू नजिकको लडाइँमा मारिएको बताइएको छ।

एउटा विशेष अपरेशनमा स्नाइपरहरूले थुप्रै आतङ्ककारीहरूलाई तिनीहरूको सुरुङबाट झुक्याएर मारेको बुझिएको छ ।ओज ब्रिगेडका अन्य एकाइका सिपाहीहरूले हमासको कमाण्ड र नियन्त्रण केन्द्रमा छापा मारेको र उनीहरूले ठूलो मात्रामा गोला बारूद, हतियार, रणनीतिक रेडियो, रात्रि दृष्टि उपकरण, नक्सा र महत्त्वपूर्ण खुफिया सामग्रीहरू राखेको पाइएको छ। प्यालेस्टिनी इस्लामिक जिहादको खुफिया कमाण्डरको छुट्टै कमाण्ड र नियन्त्रण केन्द्रमा पनि छापा मारिएको र थप हतियारहरू फेला परेको सेनाले जनाएको छ ।

गत अक्टोबर ७ मा गाजा सीमा नजिक इजरायली समुदायहरूमा हमासको आक्रमणमा कम्तिमा १ हजार २०० व्यक्तिको मृत्यु भएको थियो। गाजामा हमासले बन्दी बनाएर राखेका पुरुष, महिला, बालबालिका र सैनिकहरूको सङ्ख्या अहिले १३६ रहेको विश्वास गरिन्छ।

इजरायलले अक्टोबर ७ मा हमासको आक्रमणमा थुप्रै कर्मचारीहरू संलग्न भएको आरोप लगाएपछि बेलायती सरकारले प्यालेस्टिनी शरणार्थीहरूका लागि संयुक्त राष्ट्रसंघको एजेन्सीलाई “अस्थायी रूपमा आर्थिक सहयोग रोक्न” सकिने उल्लेख गरेको छ।

“युएनआरडब्ल्यूए कर्मचारी इजरायल विरुद्धको अक्टोबर ७ मा भएको आक्रमणमा संलग्न रहेको आरोपले बेलायत स्तब्ध भएको छ,” विदेश कार्यालयले जनाएको छ ।”हामी यी आरोपहरूको समीक्षा गर्ने क्रममा सहायता रोकिने छौ”, कार्यालयले उल्लेख गरेको छ ।

भेनेजुएलाको सर्वोच्च अदालतले यस वर्षको निर्वाचनका लागि उम्मेदवार विपक्षी राष्ट्रपतिलाई अयोग्य ठहराएपछि अमेरिकाले शनिबार चेतावनी दिएको छ।

उमेद्वार मारिया कोरिना मचाडोमाथि शुक्रबारको प्रतिबन्धपछि संयुक्त राज्य अमेरिकाले भेनेजुएलामाथिको प्रतिबन्धको “हाल समीक्षा” गरिरहेको विदेश मन्त्रालयले जनाएको छ । मन्त्रालयलेपछिल्लो घटनाक्रम र प्रजातान्त्रिक विपक्षी उम्मेद्वारहरू र नागरिक समाजको हालको राजनीतिक गतिविधिको समीक्षा गरेको उल्लेख गरेको छ ।

पूर्वी रुवाण्डाको नदीमा डुङ्गा पल्टिँदा कम्तीमा ११ जनाको मृत्यु भएको छ भने ४ जना बेपत्ता भएका छन् ।रुवामागाना जिल्लाको मुगेसेरा नदीमा शुक्रबार साँझ डुङ्गा दुर्घटना भएको हो । किसानहरू न्गोमा जिल्लाको रुकुम्बेरी क्षेत्रमा लगाइएको बाली काटेर रवामागाना जिल्ला जाँदै गर्दा डुङ्गा पल्टिएको बताइएको छ ।

“जहाजमा ४६ जना यात्रु रहेको बुझएको थिए । शनिबार बिहानसम्म ११ जनाको शव निकालिएको छ भने ३१ जनाको उद्धार गरिएको जिल्लाका मेयर रदजब म्बोन्युमुवुनीले पत्रकारहरूलाई जनाकारी दिएका छन् ।

अझै चार जनाको खोजी जारी छ,” एमबोन्युमुवुनीले दुर्घटनाको कारण ओभरलोड भएको बुझिएको छ।किसानहरू बाली स्यारेर फर्किएकाले डुङ्गामा मकै, सिमीलगायतका कृषि उपजको भारी रहेको उनले बताएका छन् ।

इराकमा अमेरिकी नेतृत्वको अन्तरराष्ट्रिय गठबन्धन मिसन अन्त्य गर्ने विषयमा छलफल गर्न पहिलो चरणको वार्ता शनिबार शुरु गरिएको इराकी सरकारले जनाएको छ। इराकी प्रधानमन्त्री मोहम्मद शिया अल-सुदानीको सञ्चार कार्यालयले जारी गरेको विज्ञप्तिमा अल-सुदानीले वरिष्ठ इराकीहरू उपस्थित भएको बैठकको अध्यक्षता गरेको तस्विर प्रकाशित गर्दै पहिलो चरणको वार्ताको शुरु भएको उल्लेख गरेको छ ।

बिहीबार, इराकले इराकमा अमेरिकी नेतृत्वको अन्तरराष्ट्रिय गठबन्धनको मिसनको अन्त्यबारे छलफल गर्न उच्च सैन्य आयोग गठन गर्न संयुक्त राज्य अमेरिकासँग सहमत भएको जनाएको छ। इराकले उल्लेख गरेको छ- आयोगले इस्लामिक राज्यद्वारा उत्पन्न खतराको मूल्याङ्कन गर्ने र इराकी सुरक्षा बलहरूको क्षमताहरूको मूल्याङ्कन गर्नेछ । इराकमा अन्तरराष्ट्रिय गठबन्धन सल्लाहकारहरू क्रमशः घटाउने र गठबन्धनको सैन्य अभियानको अन्त्यको लागि स्पष्ट समयतालिका तयार गर्ने विषय पनि अगाडि सारिएको बताइएको छ ।