Author: nepal one

काठमाडौँ, ६ जेठः नेपाल कम्युनिष्ट पार्टी (माओवादी केन्द्र)का सांसद माधव सापकोटाले वर्तमान प्रधानमन्त्री पुष्पकमल दाहाल ‘प्रचण्ड’ले अघिल्लो पटकभन्दा बढी विश्वासको मत प्राप्त गर्ने बताउनुभएको छ । प्रतिनिधिसभाको आजको बैठकपछि सञ्चारकर्मी संक्षिप्त प्रतिक्रिया दिँदै उहाँले तत्कालका लागि सरकार तलमाथि हुने र सत्ता गठबन्धनमा समस्या नाउने समेत धारणा राख्नुभयो । प्रधानमन्त्री दाहालले यही जेठ ७ गते विश्वासको मत लिँदै हुनुहुन्छ ।

सांसद सापकोटाले भन्नुभयो, “यसपटक पनि विश्वासको मत बढ्छ, घटेर जादैन । तत्कालका लागि सरकार तलमाथि हुने र सत्ता गठबन्धनमा गडबढी हुने स्थिति पनि छैन ।” उहाँले उपप्रधान तथा गृहमन्त्री रवि लामिछानेले सदनमा व्यक्त गर्नुभएको अभिव्यक्ति सरकार छाडनेसँग सम्बन्धित नभएको स्पष्ट पार्नुभयाे । “उपप्रधान एवं गृहमन्त्री लामिछानेले सदनमा सैद्धान्तिक रुपमा भनाइ राख्नुभएको हो । वर्तमान सरकारलाई विश्वासको मत दिने र सरकार अघि बढाउने कुरासँग धेरै प्रभावित हुन्छ भन्ने मलाई लाग्दनै”, उहाँले भन्नुभयो ।

राष्ट्रिय स्वतन्त्र पार्टी (रास्वपा)का सहप्रवक्ता एवं प्रतिनिधिसभा सदस्य मनिष झाले उपप्रधान एवं गृहमन्त्री रवि लामिछानेको सदनमा सम्बोधनपछि प्रमुख प्रतिपक्षबाट सदन गतिरोध नहुने अपेक्षा व्यक्त गर्नुभयो । “रास्वपा सभापति एवं गृहमन्त्री लामिछानेले आफनै तरिकाले कार्यादेश बनाउन र निष्पक्ष अभ्यासका लागि स्वतन्त्रता दिन्छौ भनेर बोलिसक्नुभयो”, उहाँले भन्नुभयो, “समिति गठनपछि प्रतिपक्षबाट सदन अवरुद्ध हुँदैन भन्नेमा विश्वास छ ।”

देउखुरी (दाङ), जेठ ६- नेकपा (एमाले)का महासचिव शङ्कर पोखरेलले राष्ट्र निर्माण र समृद्धिको यात्रा एमालेको सङ्कल्प भएकोे बताउनुभएको छ । नेत्रलाल पौडेलको ४१औँ स्मृति दिवस तथा एमाले जिल्ला कमिटी दाङको १४औँ जिल्ला अधिवेशनलाई आज सम्बोधन गर्दै उहाँले विगतका कामको समीक्षा गर्दै आगामी कार्यदिशासहित पार्टी नेतृत्व अगाडि बढेको छ भन्नुभयो । उहाँले भन्नुभयो, “नेपाललाई बदल्ने हो भने धेरै राजनीतिक दल होइन, बलियो राजनीतिक दल चाहिएकोे छ ।”

एमाले पोलिटव्युरो सदस्य शान्ता चौधरी, एमाले केन्द्रीय सदस्य चेतनारायण आचार्य, पूर्वराष्ट्रियसभा सदस्य विष्णु पौडेल, लुम्बिनी प्रदेश एमाले सचिव लक्ष्मण आचार्य, नेकपा (माओवादी केन्द्र) दाङका संयोजक हरिमान पुन, एमाले रोल्पा अध्यक्ष अमित बुढालगायतले धारणा राख्नुभएको थियो । जिल्ला अध्यक्ष हुकुमबहादुर बस्नेतको अध्यक्षतामा भएको कार्यक्रममा उपाध्यक्ष राममणि पाण्डेले स्वागत गर्नुभएको थियो । दुईदिने जिल्ला अधिवेशनले नयाँ नेतृत्व चयन गर्नेछ ।

झापा, ६ जेठः कोशी प्रदेशका मुख्यमन्त्री हिक्मतकुमार कार्कीले चलचित्र क्षेत्रको समृद्धिका लागि प्रादेशिक चलचित्र विकास बोर्ड बनाउने प्रतिबद्धता व्यक्त गर्नुभएको छ ।

विर्तामोडमा आजदेखि सुरु कोशी चलचित्र महोत्सवको उद्घाटन समारोहमा उहाँले कला, साहित्य, संस्कृति र पर्यटकीय क्षेत्रमा धनी रहेको कोशी प्रदेशसँग चलचित्र छायाङ्कनका लागि नेपाली र भारतीय चलचित्रकर्मीलाई आकर्षण गर्न सक्ने सामथ्र्य भएको बताउनुभयो । उहाँले कोशी प्रदेश सरकारले आगामी आर्थिक वर्षको बजेटमा चलचित्र छायाङ्कनका लागि ‘आउटडोर’ र ‘इन्डोर’ छायाङ्कनस्थल निर्माण गर्न बजेट छुट्याउने आश्वासन दिनुभयो । मौलिक कला र संस्कृतिलाई जगेर्ना गर्दै पर्यटकीय प्रवद्र्धनमा टेवा पुर्याउने चलचित्र निर्माण गर्न उहाँले आग्रह गर्नुभयो ।

नेपाल चलचित्र निर्माता सङ्घका अध्यक्ष नवल खड्काले चलचित्र मनोरञ्जन प्रदान गर्ने माध्यम मात्र नभएर २१औँ शताब्दीमा देशको राष्ट्रिता, कला र संस्कृतिको पहिचान बोक्ने शक्तिशाली माध्यम भएको बताउनुभयो । उहाँले प्रदेशस्तरमा महोत्सवको आयोजना गर्ने कोशी पहिलो प्रदेश भएको जनाउँदै यस क्षेत्रको विकासका लागि प्रादेशिक विकास बोर्ड गठन हुनुपर्ने माग गर्नुभयो ।

यही जेठ ११ गतेसम्म सञ्चालन हुने कोशी चलचित्र महोत्सवको आयोजना कोशी प्रदेशको आन्तरिक मामिला तथा कानुन मन्त्रालयले गरेको हो । यसको व्यवस्थापन कोशी चलचित्रकर्मी सङ्घले गरेको छ । प्रदेशका भाषाभाषी र जातजातिको मौलिक चलचित्रहरु महोत्सवका क्रममा प्रदर्शन हुने भएका छन् । महोत्सवमा चलचित्रसम्बन्धी कार्यशाला, गोष्ठी र सांस्कृतिक झाँकी प्रस्तुत हुने भएका छन् । विर्तामोड, विराटनगर, इटहरीलगायत सहरमा छानिएका चलचित्रहरु महोत्सवमा प्रदर्शन गरिने चलचित्रकर्मी सङ्घ कोशी प्रदेश समितिका महासचिव रमेश तिवारीले बताउनुभयो ।

विराटनगर, ६ जेठः विराटनगर महानगरपालिकाका प्रमुख नागेश कोइरालाले नियम विपरीत सञ्चालित सहकारीमाथि कारबाही हुने बताउनुभएको छ । महानगरले आयोजना गरेको पाँचदिने सहकारी लेखा तथा पल्र्स तालिमको आज भएको समापन कार्यक्रममा उहाँले जनताले गाँस काटेर जम्मा गरेको पैसा हिनामिना गर्नेविरुद्ध कडा कारबाही गर्ने स्पष्ट पार्नुभयो ।

उहाँले नगर क्षेत्रमा सञ्चालित प्रत्येक सहकारीको गतिविधि र क्रियाकलापलाई महानगरले सूक्ष्मरुपमा अध्ययन गरिरहेको समेत बताउनुभयो । “महानगरको क्षेत्राधिकारमा रहेका सहकारी संस्थाले बदमासी गरे निर्ममतापूर्वक कारबाही गर्छौं”, प्रमुख कोइरालाले भन्नुभयो ।

तालिममा ह्रास कट्टी, जोखिम ऋण व्यवस्थापन, तिर्नुपर्ने रकम, ब्याज मुल्तबी, अन्तिम मालशेष, पाउनुपर्ने रकम, कारोबारको सम्पुष्टि र तयारी विधि, मुख्य खाता, सहायक खाता र प्रयोजनगत लगतहरू, अन्तिम खाता, पर्ल्सको उपयोग, पर्ल्सको परिचय, पर्ल्सको महत्व, वित्तीय सहकारीमा यसको उपयोगितालगायतका विषयमा प्रशिक्षण दिइएको सहकारी शाखाकी प्रमुख सुशीला अधिकारीले जानकारी दिनुभयो । तालिममा सहकारीविज्ञ रामचन्द्र गौतम र लक्ष्मी सापकोटाले सहजीकरण गर्नुभएको थियो भने ३५ जना लेखा कर्मचारीको सहभागिता थियो । विराटनगर महानगरको क्षेत्राधिकारभित्र एक सय ७३ वटा सहकारी सञ्चालनमा छन् ।

काठमाडौँ, ६ जेठः नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी सङ्घको अध्यक्षमा दीपक थापा निर्वाचित हुनुभएको छ । सङ्घको आज बिहान सम्पन्न निर्वाचनमा दुई प्रतिस्पर्धीलाई पराजित गर्दै थापा अध्यक्षमा निर्वाचित हुनुभएको हो ।

सङ्घको प्रथम उपाध्यक्षमा विनोदजङ्ग केसी, द्वितीय उपाध्यक्षमा हर्कबहादुर लिम्बू, तृतीय उपाध्यक्षमा सेमन्तराज न्यौपाने र महासचिवमा महेशकुमार बस्नेत, सचिवद्वयमा तुलसीराम पुरी र राज लामा, कोषाध्यक्षमा हिमा गुरुङ र सहकोषाध्यक्षमा लिलबहादुर तामाङ निर्वाचित हुनुभएको छ ।

त्यसैगरी सदस्यमा देवीप्रसाद गिरी, शालिकराम अधिकारी, दीपककुमार राय, सौरभ आचार्य, विद्यालक्ष्मी बज्राचार्य, अभिनभमानसिंह बस्नेत, राजेश्वर यादव, सविताकुमारी सिंह, रोशना निरौला र महेशकुमार श्रेष्ठ निर्वाचित हुनुभएको छ । सङ्घमा देशभरका चार सयभन्दा बढी व्यवसायी आबद्ध छन् ।

भेरीगङ्गा (सुर्खेत) – श्रम, रोजगार तथा सामाजिक सुरक्षामन्त्री डोलप्रसाद अर्यालले कर्णाली प्रदेश प्राकृतिक स्रोतको धनी भए पनि गरिब भनेर बनाइएको भाष्य बदल्न लाग्नुपर्ने बताउनुभएको छ ।

कर्णाली प्रदेशको राजधानी वीरेन्द्रनगरमा आयोजित कार्यक्रममा उहाँले कर्णालीमा रहेका ढुङ्गा बेचेरै प्रशस्त आम्दानी लिन सकिने सम्भावना रहे पनि त्यसको उपयोग नगरी विगतदेखि नै गलत भाष्य निर्माण गरिएको बताउनुभयो । उहाँले भन्नुभयो, “नकारात्मकरूपमा कर्णालीलाई व्याख्या गर्नेभन्दा पनि सकारात्मक पक्षतर्फ पनि ध्यान दिऔँ, यहाँको सम्भावनातर्फ सबैले ध्यान दिएर त्यहीअनुसार योजना बनाउनुपर्छ । कर्णालीको ढुङ्गा बेचेर पनि हजारौँलाई रोजगारी दिन सकिने सम्भावना छ ।”

रोजगारीका लागि विदेशिनुपर्ने बाध्यतालाई कम गर्न स्वदेशमै रोजगारीका अवसर सिर्जना गर्नेगरी आफूले योजना बनाएको पनि उहाँको भनाइ थियो । “अहिले देशमा केही हुँदैन भन्ने निराशा बढ्दो छ, त्यो निराशालाई आशामा बदल्नेगरी मैले केही योजना ल्याएर सुरुआत गरिसकेको छु”, मन्त्री अर्यालले भन्नुभयो, “स्वदेशमै रोजगारीका प्रशस्त सम्भावना छन् । अब स्वदेशमै रोजगारीका अवसर सिर्जना गर्छौँ, त्यसका लागि हामीले केही नयाँ सोच र जोशका साथ कामको थालनी गरेका छौँ ।”

उहाँले प्रधानमन्त्री रोजगार कार्यक्रमको नाममा अहिलेसम्म धेरै रकम खर्च भए पनि उपलब्धि हासिल हुन नसकेकाले सो कार्यक्रमको काम परिवर्तन गर्न लागिएको बताउनुभयो । आगामी वर्षदेखि प्रधानमन्त्री रोजगार कार्यक्रमबाट धेरै प्रतिफलप्राप्त हुने उहाँको दाबी थियो । यसैगरी उहाँले भारततर्फ रोजगारीमा जानेहरूको समेत तथ्याङ्क राख्नेगरी काम भइरहेको जानकारी दिनुभयो ।

यसैबीच मन्त्री आर्यालले आफ्नो पार्टी सभापति एवम् गृहमन्त्री रवि लामिछानेमाथि लागेको आरोप शतप्रतिशत गलत रहेको दाबी गर्नुभयो । संसदीय छानबिन समितिका नाममा संसदीय क्रियाकलाप प्रभावित बनाइएको पनि उहाँको भनाई थियो । आफूहरू समाजको स्वरुप फेर्नेगरी आएको बताउँदै उहाँले केही पार्टी सत्ताबाहिर रहँदा छटपटाइरहेको आरोप लगाउनुभयो ।

यसैबीच श्रम तथा रोजगार मन्त्रालयले जेठ २५ र २६ गते सुर्खेतमा रोजगार मेला आयोजना गर्ने भएको छ । आन्तरिक रोजगारीलाई प्रवर्द्धन गर्ने उद्देश्यले सुर्खेतको वीरेन्द्रनगरमा दुइदिने रोजगार मेला आयोजना गरिएको मन्त्रालयका सहसचिव दीपक नेपालले जानकारी दिनुभयो ।-

धरान (सुनसरी)-नेपाल कम्युनिष्ट पार्टी (एमाले)का वरिष्ठ उपाध्यक्ष तथा पूर्वउपप्रधानमन्त्री ईश्वर पोख्रेलले अबको एमाले जनताको जीवनसँग गासिएको हुनुपर्ने बताउनुभएको छ। नेकपा (एमाले) सुनसरीको आठौँ जिल्ला अधिवेशनको इटहरीमा उद्घाटन गर्दै उहाँले एमाले इतिहासका गौरवगाथा गाएर बाँच्न नसक्ने भन्दै अब जनताका सरोकार र जीवनमा परिवर्तन ल्याउन भूमिका खेल्नुपर्ने बताउनुभयो ।

कार्यक्रममा एमाले स्थायी कमिटी सदस्य तथा कोशी प्रदेशका पूर्वमुख्यमन्त्री शेरधन राईले (एमाले)भित्र गुटउपगुट सिर्जना हुनुमा पार्टी नेतृत्व नै जिम्मेवार रहेको बताउनुभयो । उहाँले पार्टीको मूलमर्मका रूपमा रहेको जनताको बहुदलीय जनवाद नबुझ्दा र त्यसलाई आत्मसात् नगर्दा अन्योलता सिर्जना भएको बताउनुभयो ।एमाले सुनसरीको अधिवेशनलाई गुटउपगुटभन्दा पर राखेर आफ्नो हैसियतअनुसार पार्टी नेताले भूमिका निर्वाह गर्नुपर्नेमा नेता राईको जोड थियो ।

उहाँले कसैको प्रभाव र दबाबमा नपरी आजको चुनौती सामना गर्न र मिसन ८४ को लक्ष्य पूरा गर्न जिम्मेवार भूमिका निर्वाह गर्न सबैले लाग्नुपर्ने उहाँको भनाइ छ ।

काठमाडौँ-नेकपा (एकीकृत समाजवादी) का सम्मानित नेता एवम् पूर्वप्रधानमन्त्री झलनाथ खनालले पूँजीवादी सामाजिक–आर्थिक ढाँचालाई परिवर्तन गर्न वैज्ञानिक समाजवादको कार्यान्वयन गर्नुपर्ने बताउनुभएको छ ।पार्टी निकट एकीकृत स्वास्थ्यकर्मी सङ्गठन नेपालको चौथो पूर्ण बैठक तथा प्रशिक्षण कार्यक्रममा उहाँले नेपाली समाजको ठोस् वस्तुगत अवस्था पूँजीवादी भएकाले त्यसको विकल्पमा समाजवादी क्रान्ति र आर्थिक रूपान्तरण कायम गर्नुपर्नेमा जोड दिनुभयो ।

कुनै पनि समाजमा क्रान्तिको स्वरूप वस्तुगत अवस्थाले मात्र निर्धारण गर्ने बताउँदै उहाँले भन्नुभयो, “अझै पनि कतिपय वामपन्थी साथीहरू अहिले नै समाजवादी कार्यक्रम अघि सार्न तयार हुनुहुन्न, यो क्रान्तिकारी कार्यदिशाबाट दक्षिणपन्थी दिशा तिर भड्किएको चिन्तन हो । यस्तो चिन्तनले वस्तुगत यथार्थलाई देख्दैन ।”

समाजलाई अग्रगतितर्फ लैजान विचार चिन्तनलाई पनि वर्ग दृष्टिकोण कै आधारमा विश्लेषण गर्नुपर्नेमा जोड दिँदै उहाँले सामाजिक अवस्था, वस्तुगत स्थिति तथा क्रान्तिका प्रक्रियामा यथार्थपरक अध्ययन गरी दृष्टिकोण निर्माणको खाँचो औँल्याउनुभयो । विगतमा जनताको अग्रगति र प्रगतिको मुख्य बाधक नै निरंकुश राजतन्त्र र सामन्तवाद रहेको बताउँदै उहाँले नेपाली समाजको आधारभूत पक्षमा नै परिवर्तन आएकाले अब समाजवादी कार्यक्रमका माध्यमबाट जनता र राष्ट्रलाई अग्रगतितर्फ लैजानपर्ने उल्लेख गर्नुभयो ।

पूर्वप्रधानमन्त्री रहनुभएका नेता खनालले विगतमा अघि सारेका नयाँ जनवाद, राष्ट्रिय जनवाद, जनताको जनवाद वा जनताको बहुदलीय जनवादका कार्यक्रम तत्कालीन वस्तुगत परिस्थितिका आवश्यकता भए पनि राजनीतिक उपलब्धिका रूपमा प्राप्त अहिलेको लोकतान्त्रिक व्यवस्था अनुकूल नयाँ धरातल, नयाँ औचित्य र नयाँ आवश्यकताका आधारमा अब समाजवादी कार्यक्रमअघि सार्नुपर्ने विचार व्यक्त गर्नुभयो ।

काठमाडौँ- नेपाली कांग्रेस प्रमुख सचेतक रमेश लेखकले मुलुकलाई अगाडि बढाउन कांग्रेसले नेतृत्वदायी भूमिका निर्वाह गर्नुपर्ने बताउनुभएको छ ।नेपाली कांग्रेस काठमाडौँ क्षेत्र नं ६ प्रदेश (२)ले आयोजना गरेको ‘दोस्रो प्रदेश क्षेत्रीय सम्मेलन तथा प्रोफाइल लोकार्पण’ कार्यक्रममा उहाँले अस्थिरताको बीचमा फसेको देशलाई बाहिर निकाल्न कांग्रेसले नेतृत्वदायी भूमिका खेल्नुपर्ने बताउनुभयो । पार्टीभित्र देखिएका मतान्तर आक्रोश समस्यालाई थाँती राखेर मुलुकलाई अगाडि बढाउन कांग्रेस अगाडि बढ्नुपर्ने उहाँको भनाइ थियो ।

त्यसैगरी उहाँले हाल देशमा देखिएका समस्या समाधानमा सत्तापक्ष जिम्मेवार हुनुपर्नेसमेत बताउनुभयो । “मुलुक राजनीतिक दलबीचको द्वन्द्व, संसद्को अवरोध, अस्थिरताको कुचक्रमा फस्दा जनतामा नकारात्मक सन्देश गएको छ, यसलाई चिर्न सरकारपक्ष जिम्मेवार बन्नुपर्छ”, उहाँले भन्नुभयो । नेता लेखकले लोकतान्त्रिक पार्टी नेपाली कांग्रेसले पार्टीभित्रको आलोचनालाई विशेष स्थान दिएर अगाडि बढेको बताउनुभयो ।

“आलोचना लोकतन्त्रको सुन्दर पक्ष हो, यसले पार्टीलाई बलियो बनाउँछ, आलोचनात्मक चेतलाई कांग्रेसले संस्थागत गरेको छ”, नेता लेखकले भन्नुभयो । प्रधानमन्त्रीले १८ महिनाका बीचमा चौथोपटक विश्वासको मतको लिनु देशलाई अस्थिरतातिर धकेल्नुभएको उहाँको भनाइ थियो ।

नेपाली कांग्रेसका नेता एवम् पूर्वसांसद भीमसेनदास प्रधानले पार्टीभित्र देखिएका गुटले धेरै स्थानमा कांग्रेसले पराजय भोग्नुपरेको बताउनुभयो । उहाँले पार्टीलाई एकढिक्का बनाउने सङ्कल्प नगरेसम्म पार्टी अगाडि बढ्न नसक्ने उल्लेख गर्नुभयो ।

कार्यक्रममा नेपाली कांग्रेसका नेता जगदीश्वरनरसिंह केसीले कांग्रेसभित्र निष्ठा र आदर्श गुम्दै गएकाप्रति शीर्ष नेता नै गम्भीर बन्नुपर्ने आवश्यकता औँल्याउनुभयो ।कांग्रेस नेत्री एवम् बागमती प्रदेशसभा सदस्य हरिप्रभा खड्गीले केन्द्रले प्रदेशलाई अधिकार नदिँदा सोचेजस्तो काम गर्न नसकिएको गुनासो गर्नुभयो । कांग्रेस काठमाडौँ क्षेत्र नं ६ का क्षेत्रीय सभापति श्यामकृष्ण खड्गीले पार्टीभित्र एकअर्कालाई स्वीकार गर्न नसकेकाले पार्टीले हार व्यहोरेको बताउनुभयो ।

काठमाडौँ, ५ जेठ : नेपाली कांग्रेसका महामन्त्री विश्वप्रकाश शर्माले संसदको गतिरोधलाई राजनीतिक सङ्कटका रूपमा व्याख्या गर्न नहुने बताउनुभएको छ । कश्यपप्रसाद पौडेलको कथा सङ्ग्रह ‘आरनको आगो’ विमोचन समारोहमा आज यहाँ उहाँले देशभित्र राजनीतिक सङ्कटको स्थिति नभएको स्पष्ट पार्दै आर्थिक र सामाजिक रुपान्तरणबाट समृद्धि हासिल गर्न सबै एकजुट हुनुपर्ने बताउनुभयो ।

देशभित्र आर्थिक सङ्कट वास्तविक चुनौतीका रूपमा रहेकाले यसको समाधान गर्न सबै राजनीतिक दललाई एकठाउँमा आउन उहाँले आग्रह गर्नुभयो । “देशमा राजनीतिक सङ्कट छैन । राजनीतिक सङ्कट त्यसबेला हुन्छ जब हिंसात्मक द्वन्द्व चलिरहेको हुन्छ । ति सङ्कटसँग सामना गरेर हामी एउटा बाटोमा आइसक्यौँ । काम गर्नका लागि प्रतिस्पर्धाको मनोविज्ञान बनाउनुपर्छ”, महामन्त्री शर्माले भन्नुभयो,“जुनसुकै दल र आस्था भए पनि अब सोच्ने साझा कुरा भनेको आर्थिक र सामाजिक रुपान्तरण नै हो । त्यसका लागि हामी एकमत हुन आवश्यक छ ।”

पुस्तकको विमोचन गर्दै उहाँले विमोचित पुस्तकले देशको आर्थिक र सामाजिक अवस्थाको चित्रण गरेको उल्लेख गर्नुभयो । राजनीतिक व्यक्तित्वलाई लेखन र साहित्यको अभ्यासले सरल मान्छे बन्न सहयोग गर्ने धारणा राख्दै महामन्त्री शर्माले राजनीतिक व्यक्तिले अध्ययनशील बन्न र लेखन अभ्यास गर्न जोड दिनुपर्छ भन्नुभयो ।

लेखक पौडेलको आफ्ने दोस्रो कृतिका रूपमा रहेको यस सङ्ग्रहमा २१ कथा समेटिएका छन् । कथाहरूमार्फत समाजमा सकारात्मक सन्देश दिने प्रयास गरिएको उहाँको भनाइ छ । “विशेषगरी हराउँदै जान थालेका गाउँघरतिरका परम्परागत कुरामा सञ्जीवनी छर्कँदै वर्तमान पुस्तालाई हस्तान्तरण गर्ने प्रयास गरको छु”, उहाँले भन्नुभयो, “मैले सबै कथामा हाम्रो सामाजिक परिवेश र विषम परिस्थितिको पिँधमा रहेर सुनेको, जानेको र भोगेको कुरा सकभर मर्न नदिइ जीवन्त बनाउने प्रयास गरेको छु ।”

कार्यक्रममा नेपाल प्रज्ञा प्रतिष्ठानका पूर्वसदस्यसचिव डा तुलसी भट्टराईले लेखक पौडेलको यस कथा सङ्ग्रहका अधिकांश कथाले समयको सत्य उजागर गर्न सामाजिक यथार्थमा आधारित भएको चर्चा गर्नुभयो । उहाँले भन्नुभयो, “लेखक पौडेलको कथामा माओवादीको सशस्त्र द्वन्द्वको विषय छ, सामाजिक विकृति छ र विदेश जाने मोह पनि छ । कतिपय कथामा प्रेमलाई च्वास्स छोइएको छ । त्यसकारण पनि यसभित्रका अधिकांश कथाले समयको उजागर गरेको छ ।”

कथा सङ्ग्रहबारे समीक्षा गर्दै लेखक एवम् पत्रकार लक्ष्मण अधिकारीले वर्तमान कथा लेखन शैलीमा अलि फरक धारका विषयवस्तु समेटिएको बताउनुभयो । उहाँले भन्नुभयो, “यस कथा सङ्ग्रहमा वर्तमान पुस्तालाई रोचक र कौतुहलपूर्ण लाग्ने ग्रामीण क्षेत्रका लुप्त हुन लागेका चलन एवम् परम्परालाई पुर्नजीवन दिने प्रयत्न गरिनुका साथै सामाजिक विकृति र विसङ्गतिविरुद्ध रापिलो मुस्लो ओकल्ने प्रयत्न पनि गरिएको छ ।”

काठमाडौँ, ५ वैशाखः उद्योग, वाणिज्य तथा आपूर्तिमन्त्री दामोदर भण्डारीले धरासयी अवस्थाबाट गुज्रिरहेका उद्योगी तथा व्यवसायीका पक्षमा नीतिगत सुधारको एक सुत्रीय अभियानमा लागेको बताउनुभएको छ । नेपाल उद्योग तथा व्यवसायी महासङ्घद्धारा आज यहाँ आयोजित कर्पोरेट परिषद्को प्रथम भेलामा उहाँले उद्योग व्यवसायको नीतिगत सुधार नभएसम्म समृद्धि नआउने बताउनुभयो ।

मन्त्री भण्डारीले भन्नुभयो, “उद्योगी व्यवसायीका लागि सरकारले नीतिगत सुधार मात्रै गरे उद्योग व्यवसाय फस्टाउँछ, नीतिगत जटिलताले देशका उद्योग कलकारखाना सञ्चालन गर्न गाह्रो छ, म एक्लै भए पनि एक सुत्रीय अभियान नै बनाएर उद्योगी व्यवसायीका पक्षमा नीतिगत सुधारका लागि लड्छु ।”

निजी क्षेत्रलाई अगाडि बढाउनुपर्नेमा जोड दिँदै उहाँले उद्योग मन्त्रालयबाट गर्नुपर्ने कानुन सुधारका कामका लागि सुझाव दिन उद्योगी व्यवसायीसँग माग गर्नुभयो । उहाँले भन्नुभयो, “उद्योगी व्यवसायीले सरकारसित धेरै ठूलो केही मागेका छैनन्, केवल नीतिको सुधारको माग छ ।”

उद्योग मन्त्रालय अहिले उद्योग व्यवसाय सञ्चालनका लागि भइरहेका जटिलता हटाउनका लागि विभिन्न ऐन संशोधनमा जुटेको उहाँले जानकारी गराउनुभयो । रुग्ण उद्योग सञ्चालनका लागि सरकारले कार्यविधि बनाउन लागेको जानकारी गराउँदै मन्त्री भण्डारीले त्यसका लागि मन्त्रालयमा छलफल भइरहेको बताउनुभयो ।

उहाँले खानी तथा खनिजजन्य उद्योग सञ्चालनको अनुमति लिएर सञ्चालनका प्रक्रिया नगरी ओगटेर राख्ने उद्योगलाई छिट्टै मन्त्रालयले खारेजका लागि पहल गर्ने जनाउनुभयो । मन्त्री भण्डारीले भन्नुभयो, “खानी तथा खनिजजन्य उद्योग सञ्चालनका लागि अनुमति लिइसकेपछि निश्चित अवधि तोकेर सञ्चालनमा नल्याए खारेज गर्न विधि प्रक्रिया आवश्यक छ ।”

गण्डकी, ५ जेठः गण्डकी प्रदेशका मुख्यमन्त्री खगराज अधिकारीले बेगनास तालको पर्यटकीय उपयोगका लागि पूर्वाधार विकासमा जोड दिनुपर्ने बताउनुभएको छ ।

बेगनास ताल धार्मिक तथा पर्यटन विकास संस्थाको चौथो वार्षिक साधारणसभाको आज उद्घाटन गर्दै उहाँले बेगनास तालको संरक्षणसँगै आवश्यक पूर्वाधार विकास गरी धार्मिक पर्यटकीय गन्तव्यकारूपमा अघि प्रदेश सरकारको पनि साथ रहने बताउनुभयो । “बेगनास ताल र आसपासका क्षेत्रमा पूर्वाधार विकासका कामहरू अघि बढिरहेका छन् । यसलाई धार्मिक धार्मिक पर्यटकीय गन्तव्यकारूपमा विकास गर्न थप काम गर्नुपर्ने आवश्यकता छ । विकासक्रममा आइपर्ने समस्यासँग डराएर नभै समाधान गर्दै अघि बढ्नुपर्छ । त्यसमा हाम्रो पनि साथ छ”, मुख्यमन्त्री अधिकारीले भन्नुभयो ।

संस्थाका अध्यक्ष ध्रुबनाथ अधिकारीले लेखनाथ क्षेत्रका सात तालमध्ये ठूलो बेगनास ताल जल सम्पदा, प्राकृतिक सुन्दरता, जैविक विविधता एवम् साधनस्रोतका दृष्टिबाट महत्वपूर्ण सप्पदा भएकाले यसको संरक्षणमा सबैको सहयोग हुनुपर्ने बताउनुभयो । तालसँगै यहाँस्थित बराह मन्दिर र लक्ष्मीनारायण मन्दिरलाई समेटेर धार्मिक पर्यटकीय गन्तव्य बनाउने गरी पूर्वाधार निर्माण कार्य अगाडि बढाइएको उहाँको भनाइ थियो । “यस क्षेत्रको समग्र विकासका लागि विसं २०७५ साल मंसिरमा सञ्चालित महायज्ञमा सङ्कल्प गरिएका अधिकांश कामहरू सम्पन्न भइसकेका छन् ।

स्थानीयवासी, तीन तहका सरकारसँगको समन्वय र सहकार्यमा यस क्षेत्रलाई महत्वपूर्ण धार्मिक पर्यटकीय गन्तव्य बनाउने सोच राखिएको छ । त्यसैले यहाँहरू सबैको सहयोगको अपेक्षा छ”, उहाँले भन्नुभयो ।कार्यक्रममा पोखरा महानगरपालिका वडा नं ३१ का वडा अध्यक्ष ढकनाथ कँडेल, पोखरा विश्वविद्यालयका पूर्वउपकुलपति प्राडा इन्द्रप्रसाद तिवारी, लेखनाथ उद्योग वाणिज्य संघका वरिष्ठ उपाध्यक्ष राजेन्द्र ओझालगायतले बेगनास ता, बराह क्षेत्रलगायत धार्मिक गन्तव्यलाई पर्यटनसँग जोड्नुुपर्ने आवश्यकता औंल्याउनुभयो ।

बागमती, ५ जेठ : बागमती प्रदेशसभाअन्तर्गत विषयगत समितिका सभापतिको नाम आज चयन गरिँदै छ । आज बस्ने प्रदेशसभा बैठकमा सभापतिको नाम निर्णायार्थ प्रस्तुत गरिने भएको छ ।

विषयगत समितिको सभापति चयन गर्न सभामुख भूवनकुमार पाठकले आज बिहान ११ बजे प्रदेशसभाको बैठक आह्वान गर्नुभएको छ । सभापति पदका लागि मनोनयन दर्ता सकिएको र आजको बैठकमा ती नाम निर्णायार्थ प्रस्तुत गरिने प्रदेशसभा सचिवालयका सचिव पूर्णबहादुर दर्जीले जानकारी दिनुभयो ।

प्रदेशसभाको पाँच वटा विषयगत समितिमध्ये चार समितिको सभापतिका लागि शुक्रबार मनोनयन दर्ता भएको छ । सार्वजनिक लेखा समिति र प्रदेश मामिला समितिको सभापति पदमा नेपाली कांग्रेसको तर्फबाट क्रमशः श्रीराम लामिछाने र छिरिङ दोर्जे लामाले मनोनयन दर्ता गराउनुभएको छ ।

यस्तै कृषि, शिक्षा, स्वास्थ्य समितिको सभापतिका लागि नेकपा (माओवादी केन्द्र) का तर्फबाट ठाकुरप्रसाद ढकाल र अर्थ तथा विकास समितिको सभापतिका लागि राष्ट्रिय प्रजातन्त्र पार्टीबाट नुरज बज्राचार्यले मनोनयन दर्ता गराउनुभएको प्रदेशसभा सचिवालयले जनाएको छ ।

प्रदेशसभाअन्तर्गतको उद्योग, पर्यटन तथा वातावरण समितिको सभापति पदमा भने कुनै उम्मेदवारी नपरेको प्रदेशसभा सचिवालयले जनाएको छ । सो समितिको सभापति नेकपा (एमाले)लाई दिने दलहरुबीच सहमति भएको बताइएको छ । यस्तै आजको प्रदेशसभा बैठकबाट प्रदेशसभाअन्तर्गतको विशेष समिति गठन गर्ने सहमति भएको सचिव दर्जीले बताउनुभयो ।

कर्णाली – कर्णाली प्रदेश सरकारका मुख्यमन्त्री यामलाल कँडेलको अध्यक्षतामा शुक्रबार सर्वदलीय बैठक बसेको छ । प्रदेशभासमा प्रतिनिधित्व गर्ने सबै दलहरुको सहभागी रहेको बैठकले सात वटा निर्णयसमेत गरेको छ ।

नेपाली कांग्रेस, नेकपा (माओवादी केन्द्र), नेकपा (एमाले), नेकपा (समाजवादी केन्द्र) र राष्ट्रिय प्रजातन्त्र पार्टी सहभागी रहेको बैठकमा बोल्दै मुख्यमन्त्री कँडेलले कर्णालीको विकास र समृद्धिको साझा मुद्दामा सबैको साझा सरोकार रहने बताउनुभयो । उहाँले भन्नुभयो, “सिद्धान्त र विचार फरक हुनुले फरक पार्दैन । सबैको सोच भनेकै कर्णालीको विकास, सुशासन र आर्थिक समृद्धि हो । सबै दलहरुको मूल उद्देश्य भनेकै कर्णाली बनाउने हो ।”

उक्त सर्वदलीय बैठकले राष्ट्रिय गौरवका आयोजना नभएको कर्णाली प्रदेशका नागरिकको जीवनस्तरसँग प्रत्यक्ष सरोकार राख्ने कर्णाली करिडोर (सुर्खेतदेखि हुम्लासम्म), भेरी करिडोर (सुर्खेतदेखि डोल्पासम्म), कर्णाली राजमार्ग (कालिकोटदेखि मुगु–रारा हुँदै नाक्चेनाग्लासम्म) जोड्ने राष्ट्रिय गौरवको आयोजना घोषणा गरी कार्यान्वयनका लागि छुट्टै संरचना तयार पारेर द्रुत गतिमा कार्य सम्पन्न गर्न पर्याप्त बजेट विनियोजनका लागि सङ्घीय सरकारसँग अनुरोध गर्ने पहिलो निर्णय गरेको छ ।

हाल सञ्चालनमा आइरहेको हवाई सेवालाई भरपर्दो र विश्वासिलो बनाउन प्रदेश राजधानी सुर्खेतको वीरेन्द्रनगरस्थित सुर्खेत विमानस्थलको विस्तार र थप पूर्वाधारको विकासका निम्ति सुर्खेतबाट कर्णालीका नौ जिल्ल्लाहरुमा नियमितरुपमा हवाई सेवा सञ्चालनका लागि सङ्घीय सरकारलाई अनुरोध गर्ने दोस्रो निर्णय बैठकले गरेको छ ।

त्यसैगरी, सङ्घीय सरकारको वार्षिक नीति तथा कार्यक्रममा वर्षेनी उल्लेख गरिने तर कार्यान्वयनमा नआएको प्रदेश प्रवेशद्वार कोहलपुर–सुर्खेत सडकलाई चार लेन बनाउने योजना कार्यान्वयनका लागि आवश्यक बजेटको व्यवस्था गर्न अनुरोध गर्ने, कर्णालीको प्राकृतिक स्रोतको रुपमा रहेको भेरी नदीबाट सञ्चालित भेरी बबई डाइभर्सन आयोजनाको प्रत्यक्ष लाभान्वित लुम्बिनी प्रदेशको बाँके र बर्दिया हुँदा आयोजनाबाट उत्पादन हुने बिजुलीको रोयल्टी कर्णाली प्रदेशले पाउने कानुनी र नीतिगत व्यवस्था गर्नसमेत सङ्घीय सरकारलाई अनुरोध गर्ने चौथो निर्णय भएको छ ।

भूकम्पबाट प्रभावित जाजरकोट र रुकुमपश्चिमका पीडितका लागि अस्थायी आवासको दोस्रो किस्ताको रकम पुग्न र पुनःनिर्माणको काम सुरु हुन नसकेकाले त्यहाँका नागरिक थप पीडित बन्दै गएकाले अस्थायी आवासको लागि छुट्ट्याइएको दोस्रो किस्ताको रकम तत्काल वितरण गर्न र पुनः निर्माणको काम तत्काल प्रभावकारी रुपमा सञ्चालन गर्न अनुरोध गर्ने निर्णय भएको छ ।

प्रदेश राजधानी सुर्खेतको वीरेन्द्रनगरमा खानेपानीको दीर्घकालीन समस्या समधान गर्न भेरी लिफ्टिङ्ग खानेपानी आयोजना कार्यान्वयनको प्रारम्भिक अवस्थालाई द्रुत गतिमा सञ्चालनका लागि कार्यान्वयनको प्रक्रिया बढाउन सङ्घीय सरकारलाई अनुरोध गर्ने र संस्थागत, पारदर्शी, परिणाममुखी हुने गरी योजना छनौट गर्न तथा कार्यान्वयन पक्षलाई बलियो बनाई बजेटको प्रभावकारी कार्यान्वयनमा सहयोग पुर्याउन प्रदेश सरकारको ध्यानाकर्षण गर्ने निर्णय भएको छ ।

सर्वदलीय बैठकमा नेपाली कांग्रेसका सभापति ललितजङ्ग शाही, महामन्त्री नीरञ्जन केसी, नेकपा (माओवादी केन्द्र)का केन्द्रीय सदस्य गोमा कुँवर, प्रदेश उपाध्यक्ष तथा प्रदेशसभा सदस्य कृष्ण जिसी, एमालेका प्रदेश अध्यक्ष गुलाबजङ्ग शाह, सचिव ध्रुवकुमार शाही, एकीकृत समाजवादीका प्रदेश अध्यक्ष तथा सङ्घीय सांसद अम्मरबहादुर थापा, प्रदेशसभा सदस्य कल्याणी खड्का र राप्रपाका केन्द्रीय सदस्य मातृका भुसाल, जिल्ला अध्यक्ष कविराम पुरीसहितका नेताहरुको सहभागिता रहेको थियो ।