Author: Reporter

बीबीसी । विद्रोहीहरु सिरियाको राजधानी दमास्क नजिक पुग्दा त्यहाँ अन्योल र त्रास बढेको छ । राष्ट्रपति बशर अल–असद परिवारको शक्तिका प्रतीकका रूपमा रहेका दमास्कस वरपरका कैयौँ उपनगरहरूमा तोडफोड वा ध्वस्त भएका छन् ।

त्यहाँको आन्तरिक मामिला मन्त्रालयले राजधानी वरिपरि बलियो रक्षात्मक घेरा निर्माण गरिरहेको जनाएको छ । तर देशभरका विद्रोही समूहहरूले कब्जामा लिएका सहर,नगर र गाउँहरूमा सरकारी सेनाले त्यस्तो कुनै पनि सुरक्षा प्रदान गर्न असफल भएको प्रस्टसँग देखिन्छ ।

यतिबेला राष्ट्रपति बशर अल–असद कहाँ छन् भन्ने हल्ला चासोपूर्वक चलिरहेको छ र त्यो थाहा पाउन मानिसहरूले दमास्कस आउजाउ गर्ने उडानहरूको निगरानी गरिरहेका छन् ।

सबैजना अशद देशमै छन् वा छैनन् भन्ने जान्न खोजिरहेका छन् । राष्ट्रपति अशदको कार्यालयले त्यस्ता सबै खबरको खण्डन गर्दै उनी अझै दमास्कसमै रहेको र नियमित रूपमा आफ्नो काम गरिरहेको जनाएको छ।

तर त्यसको सङ्केत भने देखिएको छैन । सिरिया यतिखेर एक विभाजित देशका रूपमा छ, जहाँ वर्षौँ लामो गृहयुद्धको गहिरो घाउ अझै निको हुन सकेको छैन ।

त्यहाँ करिब डेढ साता अघिसम्म झण्डै चार वर्षदेखि कायम गरिएको एकखाले गतिरोध र यथास्थिति थियो । देशमा चलिरहेको गृहयुद्धबीच राष्ट्रपति असदको आफ्ना अरब नेताहरूसँगको सम्बन्ध क्रमशः सुधार भए तापनि सिरियाभित्र युद्धपछिको अवस्थामा जनताको सुखद भविष्य निर्माण गर्ने दिशामा कुनै प्रगति भएको देखिएको छैन ।

दोहा । अमेरिकी राष्ट्रपतिमा डोनाल्ड ट्रम्प निर्वाचित भएपछि गाजामा युद्धविराम र बन्धक आदानप्रदान सम्झौतालाई मजबुत बनाउने उद्देश्यका साथ वार्ता गर्ने समय फेरि भएको कतारका प्रधानमन्त्रीले बताएका छन् ।

राजनीतिक संवादका लागि दोहा फोरममा कतारका प्रधानमन्त्री शेख मोहम्मद बिन अब्दुलरहमान बिन जसिम अल थानीले भने, “अमेरिकी निर्वाचनपछि हामीले युद्धविराम वार्ताको आवश्यकता महसुस गरेका छौँ र यो समय फेरि आउँदैछ।”

कतारी प्रधानमन्त्रीले भने, ‘कार्यकाल सकिँदै गरेको र नयाँ आउन लागेको अमेरिकी प्रशासनको सम्झौताप्रतिको दृष्टिकोणमा ‘केही भिन्नता’ भए पनि ‘युद्ध अन्त्य गर्ने लक्ष्यमा कुनै असहमति देखेका छैनौँ ।”

संयुक्त राज्य अमेरिका र इजिप्टसँग मिलेर कतारले गाजामा युद्धविराम र बन्धक रिहाइका लागि महिनौंदेखिको असफल वार्ताका लागि मध्यस्थता गरेको थियो । वार्ताको उद्देश्य र युद्धरत पक्षबीचको बुझाइमा एकरूपता आउन नसक्दा कतारले तत्कालका लागि मध्यस्थताको औचित्यता सकिएको निष्कर्ष निकाल्दै जिम्मेवारीबाट पछि हटेको थियो ।

गत नोभेम्बरमा दोहाले हमास र इजरायलले ‘इच्छा र गम्भीरता’ देखाएपछि मध्यस्थता पुनः सुरु गर्ने घोषणा गरेको थियो ।

शेख मोहम्मदले भने, “राष्ट्रपति कार्यालय आउनुभन्दा पहिले नै सम्झौता हासिल गर्नका लागि आगामी प्रशासनबाट धेरै प्रोत्साहन प्राप्त भएको छ, यसले विगत दुई हप्तामा वार्तालाई ‘ट्रयाकमा फर्काउने’ कतारी निर्णयलाई बल मिलेको छ । “हामी जतिसक्दो चाँडो काम सम्पन्न गर्ने आशा राख्छौं हाम्रो सबै पक्षहरूको सद्भावमा संलग्न हुने इच्छा जारी रहनेछ।”

संयुक्त राज्य अमेरिकाको समर्थनमा सन् २०१२ देखि कतारले हमासका लागि उसको राजनीतिक ब्युरोलाई राख्न दिएको बिषयलाई लिएर कतारले थप दबाब को सामना गर्नुपर्ने सम्भावना रहेको भन्ने भनाइलाई पनि प्रधानमन्त्रीले खण्डन गरेका छन् ।

कार्यालयलाई ‘विभिन्न पक्षबीच भेला हुने मञ्च’ को संज्ञा दिँदै कतारले प्यालेस्टिनी लडाकूविरुद्ध अन्य समाधान खोज्ने अपेक्षा नगरिएको’ उनले बताए ।

सन् २०२३ को अक्टोबर ७ मा दक्षिणी इजरायलमा हमासले गरेको आक्रमणका क्रममा लडाकूहरूले २५१ जनालाई अपहरण गरेका थिए, जसमध्ये ९६ जना गाजामै छन् । गाजामा रहेका भनिएकामध्ये पनि ३४ जनाको मृत्यु भएको पुष्टि इजरायली सेनाले गरेको छ ।

अमेरिकाका नवनिर्वाचित राष्ट्रपति डोनाल्ड ट्रम्पले यसै साताको सुरुमा सामाजिक सञ्जालमार्फत आफूले कार्यभार सम्हाल्ने बेलासम्म बन्धक बनाइएकाहरूलाई रिहा नगरे गम्भीर परिणाम भोग्नुपर्ने चेतावनी दिएका थिए । ट्रम्पले इजरायललाई कडा समर्थन गर्ने प्रतिबद्धता व्यक्त गरेका छन् ।

बेरुत । लेबनानको हिजबुल्लाह समूहले सिरियामा दुई हजार लडाकू पठाएको उक्त समूहनिकट एक स्रोतले बताएको छ ।

सन् २०११ देखि सिरियाली युद्धमा राष्ट्रपति बसर अल असदको सेनासँग मिलेर लडेको इरान समर्थित समूहले लेबनानी सीमा नजिकैको कुसेर क्षेत्रमा दुई हजार लडाकू पठाएको समूह सम्बद्ध स्रोतले एएफपीलाई जानकारी दिएको छ ।

स्रोतका अनुसार गत हप्ता इस्लामवादी नेतृत्वको विद्रोहीआक्रमण सुरु भएयता हिजबुल्लाहले युद्धमा सक्रिय सहभागिता जनाएको छैन ।

सिरिया–लेबनान सीमामा पर्ने पहाडमा समूहका लडाकुलाई ‘आफ्नो स्थानको र ा ागर्न’ पठाइएको र हिजबुल्लाहले अहिलेसम्म कुनै पनि लडाइँमा भाग नलिएको स्रोतले जनाएको छ ।

सिरियामा विद्रोही गठबन्धनले सिरियाका दुई मुख्य शहर (उत्तरको अलेप्पो र मध्यभागको हामा) मा कब्जा जमाइसकेको छ ।

हिजबुल्लाह र इजरायलबीचको युद्धमा युद्धविराम लागू भएको दिन नोभेम्बर २७ मा उनीहरूले आफ्नो आक्रमण सुरु गरेका थिए, युद्धविरामले लेबनानी समूहलाई कमजोर बनाएको छ ।

रिरियाली युद्ध अनुगमनकारी संस्था –सिरियन अब्जरभेटरी फर ह्युमन राइट्स वार मोनिटर) का अनुसार शनिबार विद्रोही सेना सिरियाली मध्य शहर होम्सको प्रवेशद्वारमा थिए र राजधानी दमास्कसतर्फ अघि बढिरहेका थिए ।

स्रोतका अनुसार हिजबुल्लाहले सिरियाली सेनालाई शहरको र ा ागर्ने निर्णय गरेमा सहयोग गर्न होम्सलाई १५० सैन्य सल्लाहकार पठाएका थिए ।

हिजबुल्लाहले सन् २०१३ देखि नै असदको सेनालाई खुलेर समर्थन गर्दै आएको छ ।

हिजबुल्लाहका लडाकुहरूले सन् २०११ मा सरकार विरोधी प्रदर्शनको दमनपछि सुरु भएको गृहयुद्धमा गुमेको क्षेत्र फिर्ता लिन असदलाई सहयोग गरेका थिए ।

लेबनानी समूहले सन् २०१३ मा सिरियाली सरकारी फौजलाई विद्रोहीको कब्जाबाट कुशायर शहरबाट फिर्ता लिएको थियो भने हिजबुल्लाहले पछि त्यहाँ सैन्य आधार र प्रशिक्षण शिविर स्थापना गरेको थियो ।

तर गत हप्तासम्म सिरियामा जारी युद्ध सुषुप्त अवस्थामा रहेकाले हिजबुल्लाहले ‘विगत दुई वर्षमा आफ्ना अधिकांश लडाकूलाई फिर्ता बोलाएको छ,” स्रोतले भनेको छ ।

स्रोतले भन्यो, “हिजबुल्लाहले अलेप्पो र हामामा सैन्य सल्लाहकारहरू राखेको थियो, हालैका दिनहरूमा विद्रोही सेनाले यी दुई शहरहरू कब्जा गर्नुअघि उनीहरू त्यहाँबाट भागेका थिए वा थिएनन् भन्ने कुरा निर्दिष्ट गरिएको छैन ।”

रुस र इरानले पनि असदको शासनलाई समर्थन गर्न युद्धमा हवाई हस्तक्षेप गरेका छन् ।

तेहरानले नोभेम्बर २८ मा अलेप्पोमा भएको झडपमा रिभोलुसनरी गार्डका एक जनरलको मृत्यु भएको घोषणा गरेको थियो ।

बेरुत । सिरियाली विद्रोही हयात तहरीर अल–शाम (एचटीएस) र सहयोगी समूहले सिरियाको सरकारी नियन्त्रणमा रहेको राजधानी दमास्कसलाई घेरेर आक्रमण केन्द्रित गरिएको बताएका छन् ।

सन् २०११ मा सिरियाली राष्ट्रपति बसर अल असदले प्रजातान्त्रिक प्रदर्शनमा दमन गरेसँगै सुरु भएको सिरियाको गृहयुद्ध सुषुप्त अवस्थामा पुगेपछि नोभेम्बर २७ देखि एचटीएस नेतृत्वको गठबन्धनले राष्ट्रपति बशर अल असदको सत्ताका लागि सबैभन्दा ठूलो खतराको प्रतिनिधित्व गरेको छ ।

विद्रोही कमाण्डर हसन अब्देल घानीले सरकारविद्धको लडाई सफल भइरहेको दावी गर्दै भने, “हाम्रा सेनाले राजधानी दमास्कसलाई घेर्ने अन्तिम चरण सुरु गरेका छन् ।”

यसअघि उनले दमास्कसको ग्रामीण इलाकामा रहेको सासा (सुरक्षा) शाखालाई सेनाले नियन्त्रणमा लिएको बताएका थिए ।

एचटीएसका नेता अबु मोहम्मद अल–जोलानीको सट्टा आफ्नो वास्तविक नाम अहमद अल–शरा प्रयोग गरी शनिबार टेलिग्राममा विद्रोही लडाकुहरूलाई सम्बोधन गर्दै भने, “दमास्कस तपाईंहरूलाई पर्खिरहेको छ ।”

– सेनाद्वारा खण्डन –

असदप्रति वफादार रहेको सिरियाली रक्षा मन्त्रालयले सेना आफ्नो स्थानबाट भागेको अस्वीकार गरेको छ ।

“दमास्कस ग्रामीण क्षेत्रमा रहेका हाम्रा सशस्त्र सेना फिर्ता भएको भन्ने समाचारमा कुनै सत्यता छैन,” विज्ञप्तिमा भनिएको छ ।

सिरियाली युद्ध अनुगमनकारी संस्था –सिरियन अब्जरभेटरी फर ह्युमन राइट्स वार मोनिटर) ले दमास्कसबाट करिब १० किलोमिटरको दूरीमा रहेको सहरबाट सरकारी सेना फिर्ता हुन लागेको जनाएको छ ।

अफगानिस्तान । अफगानिस्तानको तालिवान सरकारको श्रम तथा सामाजिक मामिला मन्त्रालयले विगत आठ महिनामा ६५ हजारभन्दा बढी श्रम स्वीकृति जारी गरेको मन्त्रालयका प्रवक्ता समिउल्लाह इब्राहिमीले बताएका छन् ।

शनिबार स्थानीय सञ्चारमाध्यम टोलोन्युजसँगको कुराकानीमा श्रम तथा सामाजिक मामिला मन्त्रालयले मार्चपछि महिला र केही विदेशी नागरिकसहित ६५ हजारभन्दा बढी व्यक्तिलाई ‘वर्क परमिट’ जारी गरेको ती अधिकारीले जानकारी दिए ।

अधिकारीले थप विवरणहरू प्रदान नगरी उल्लेख गरेका छन्, ‘अफगानिस्तानको तालिवान प्रशासनले थप रोजगारीको अवसर सिर्जना गर्न सक्दो प्रयास गर्नेछ ।’

थप विवरण उपलब्ध नगराइकन ती अधिकारीले भनेका छन्, ‘अफगान प्रशासनले गरिबीको चपेटामा परेको देशमा गरिबी निवारणका लागि रोजगारीका अवसर सिर्जना गर्न सक्दो प्रयास गर्नेछ ।’

स्थानीय आर्थिक पर्यवेक्षकहरूले ठूला विकास परियोजना सुरू गर्न र अफगान र विदेशी कम्पनीहरूलाई अफगानिस्तानमा लगानी गर्न प्रोत्साहित गर्दा राष्ट्रको गरीबी कम गर्न सकिने बताएका छन् ।

इस्लामाबाद । पाकिस्तानको सर्वोच्च अदालतले सन् २०२३, १० मेका घटनाहरूको अनुसन्धान गर्न न्यायिक आयोग गठन गर्न माग गर्दै पीटीआईका संस्थापक इमरान खानले दायर गरेको याचिकामा डिसेम्बर १० मा सुनुवाइ गर्ने समय तय गरेको छ ।

सर्वोच्च अदालतले शुक्रबार जारी गरेको कारण सूची अनुसार न्यायाधीश अमिनुद्दीन खानको नेतृत्वमा रहेको सात सदस्यीय संवैधानिक इजलासले मुद्दाको अध्यक्षता गर्नेछ ।

याचिका दुई महत्त्वपूर्ण घटनाहरूको छानबिन गर्न न्यायिक आयोगहरूको लागि इमरान खानको मागसँग जोडिएको छ ।

बिहीबार पूर्वप्रधानमन्त्रीले आफ्नो आयोगको स्थापनाबारे पोष्ट गरेका थिए ।

सरकारसँग संलग्न हुन गठित वार्ता टोलीमा ओमर अयुब खान, अली अमीन गण्डापुर, साहिबजादा हमिद रजा, सलमान अक्रम राजा र असद कैसर रहेका छन् ।

शुक्रबार इमरानले यस विषयमा आफ्ना मागहरू दोहोर्याउँदै भने,“हाम्रा दुईवटा मागहरू छन् । घटनाहरूको स्वतन्त्र अनुसन्धान गर्न सर्वोच्च अदालतका सबैभन्दा वरिष्ठ न्यायाधीशहरूको नेतृत्वमा आयोग गठन गर्नुपर्छ । अन्यायपूर्वक थुनिएका राजनीतिक बन्दीहरूलाई रिहा गरिनुपर्छ ।”

इमरानले यी मागहरू पूरा नभएमा पीटीआईद्वारा ‘नागरिक अवज्ञा, रेमिट्यान्समा कमी र बहिष्कार आन्दोलन’ सुरु गर्ने चेतावनी दिए।

यस मुद्दाको अतिरिक्त, फेब्रुअरीको आम चुनावमा धाँधली भएको आरोप लगाउँदै पीटीआईका संस्थापकले दायर गरेको छुट्टै याचिकामा डिसेम्बर ११ मा अर्को सुनुवाइ हुनेछ ।

बीबीसी । सत्ताधारी दलका सांसदहरूको बहिस्कारपछि दक्षिण कोरियाका राष्ट्रपतिमाथिको महाभियोग प्रस्ताव विफल भएको छ ।

उक्त प्रस्ताव अनुमोदनका लागि २०० मत आवश्यक थियो। तर विपक्षी दलका सबै १९२ र सत्तारूढ दलका ३ सांसदले मात्रै त्यसको पक्षमा मतदान गरेका थिए ।

नेशनल एसेम्बलीका सभामुखले उक्त विधेयक अघि बढाउन पर्याप्त सङ्ख्या नपुगेकाले महाभियोग प्रक्रिया अघि बढ्न नसक्ने घोषणा गरेका थिए ।

‘मार्शल कानुन’ लगाएकोमा माफी मागेका राष्ट्रपति यून सुक यउललाई पदबाट हटाउन माग गर्दै दशौँ हजार संसद् भवनबाहिर जम्मा भएका थिए । तर महाभियोग प्रस्ताव पारित हुन आवश्यक सङ्ख्या नपुगेपनि उनीहरूले यूनलाई हटाउने प्रयास जारी रहने बताएका छन् ।

उनीहरूले राष्ट्रपति यूनको बहिर्गमनको माग गरेका छन्। त्यसअघि यूनले ‘मार्शल ल’ लागु गरेकोमा माफी माग्दै पुन यस्तो कदम नचाल्ने वाचा गरेका थिए । मंगलबार राति उनले घोषणा गरेको सैनिक शासन ६ घण्टामै त्यहाँको संसद्ले उल्ट्याइदिएको थियो। त्यसपछि उनले महाभियोगको सामना गरिरहेका छन् ।

मतदानमा विफल रहेपछि प्रतिक्रिया दिदैँ दक्षिण कोरियाको प्रमुख विपक्षी दल डेमोक्रयाटिक पार्टीले राष्ट्रपतिलाई महाभियोग लगाउने प्रयास जारी राख्ने बताएको छ । तर राष्ट्रपति यूनको पीपल्स पावर पार्टीले उसले यो सङ्कट समाधानका लागि महाभियोग भन्दा पनि ’सुव्यवस्थित र जिम्मेवार’ उपाय खोज्ने प्रतिक्रिया दिएको छ।