Tag: बंगलादेश

ढाका । पूर्व प्रधानमन्त्री शेख हसिनामाथि बंगलादेशको अन्तर्राष्ट्रिय अपराध न्यायाधिकरणले सुनाएको मृत्युदण्डको सजायले देशभर ठूलो राजनीतिक भूकम्प ल्याएको छ । राजधानी ढाकादेखि संवेदनशील मानिएका जिल्लासम्म हिंसा, आगजनी र भिडन्तका लहर चलिरहेका छन् । भारतमा निर्वासनमा रहेकी हसिनाको सुपुर्दगीका लागि ढाकाले आधिकारिक पत्र पठाएपछि घटनाक्रम झनै तङ्गिएको छ ।

सोमबार सुनाइएको फैसलापछि विद्यार्थी समूहले पुनः धनमन्डी–३२ स्थित शेख हसिनाका पिता शेख मुजिबुर रहमानको ऐतिहासिक घरमा धावा बोले । बुलडोजरसहित घर भत्काउन पुगेको भीडलाई सुरक्षा बलले रोकेपछि झडप चर्कियो । लाठीचार्ज, ध्वनि–ग्रेनेड र बल प्रयोग हुँदा भीड छिन्नभिन्न भएको भए पनि दुई जनाको ज्यान गएको पुष्टि भएको छ । विभिन्न क्षेत्र गोपालगञ्ज, मौलभीबजार, गाजीपुर र आशुलियामा आगजनी, विष्फोट र राजनीतिक झडपका खबर आएका छन् । स्थानीय मिडियाका अनुसार फैसलाको २४ घण्टाभित्र मात्र करिब ५० सवारी साधनमा आगजनी गरिएको छ ।

मृत विद्यार्थीका परिवार तथा विपक्षी समर्थकहरूले यो फैसला ‘न्यायको जित’ भन्दै मिठाई बाँडेका छन् । तर, शेख हसिनाको पार्टी अवामी लिगले मुलुकभर बन्द आह्वान गरेको छ । गत वर्ष आरक्षणविरुद्धको विद्यार्थी आन्दोलनमा दमन गर्न हसिनाले सुरक्षा निकायलाई शक्ति प्रयोगको आदेश दिएको आरोपमा उनलाई मानवताको विरुद्धका अपराधमा दोषी ठहर गरिएको हो । पाँच मुद्दामध्ये दुईमा मृत्युदण्ड र एकमा आजीवन कारावास सुनाइएको छ । पूर्व गृहमन्त्री असदुज्जमान खान कमाललाई पनि मृत्युदण्ड, पूर्व प्रहरी महानिरीक्षक अब्दुल्लाह अल मानुनलाई पाँच वर्ष कैद सजाय तोकिएको छ ।

हसिना भारतमा निर्वासनमा रहेकी बेला ढाकाले नयाँ दिल्लीलाई दुवै दोषीको सुपुर्दगीका लागि औपचारिक कूटनीतिक पत्र पठाएको पुष्टि गरेको छ । ढाका दाबी गर्छ—दुई देशबीचको सुपुर्दगी सन्धाअनुसार भारतको ‘कानुनी दायित्व’ हो कि दोषीहरूलाई फिर्ता पठाओस् ।
भारतले भने संयम कूटनीतिक प्रतिक्रिया दिएको छ ।

भारतीय विदेश मन्त्रालयले बंगलादेशको शान्ति, स्थिरता र लोकतान्त्रिक प्रक्रियाप्रति भारतको प्रतिबद्धता दोहोर्‍याउँदै, ‘भारत सधैं सबै सरोकारवालासँग रचनात्मक रूपमा संलग्न रहने’ उल्लेख गरेको छ । भारतले कुनै स्पष्ट ‘हो’ वा ‘होइन’ भनेको छैन, तर अन्तर्राष्ट्रिय अपराध अदालतको फैसलालाई अवहेलना गर्ने देशलाई ‘अमित्रतापूर्ण व्यवहार’ मानिने चेतावनी ढाकाको पत्रमा प्रष्ट देखिन्छ । मृत्युदण्डको फैसला, सडकमा उग्र प्रदर्शन, सेना तैनाथी र भारतसँगको कूटनीतिक दबाब-यी सबैले बंगलादेशको नाजुक राजनीतिक अवस्थालाई झनै जटिल बनाइदिएको छ ।

काठमाडौं । बंगलादेशकी अपदस्थ प्रधानमन्त्री शेख हसिनालाई मानवताविरुद्धको अपराधको आरोपमा मृत्युदण्डको सजाय सुनाइएको छ । बंगलादेशको राजधानी ढाकास्थित इन्टरनेशनल क्राइम्स ट्रिब्यूनलले मानवताको अपराधमा पूर्वप्रधानमन्त्री हसिनालाई मृत्युदण्डको सुजाय सुनाएको हो ।

विशेष न्यायाधिकरणले महिनौं लामो सुनुवाइमा उनलाई गत वर्ष विद्यार्थी नेतृत्वको विद्रोहमाथि घातक दमनको आदेश दिएकोमा दोषी ठहर गरिएको थियो । हसिनासँगै र दुई शीर्ष सहयोगीहरूलाई जुलाई विद्रोहको समयमा गरिएको मानवता विरुद्धको अपराधको दोषी ठहर गरेको छ ।

अन्य दुई जना पूर्व गृहमन्त्री असदुज्जमान खान कमाल र पूर्व प्रहरी महानिरीक्षक चौधरी अब्दुल्लाह अलमामुन हुन् । ७८ वर्षीया हसिनाले गत वर्ष अगस्ट ५ मा भएको विद्यार्थी नेतृत्वको विद्रोहलाई दबाउन घातक कारबाहीको आदेश दिएको आरोपमा मुद्दाको सामना गर्न भारतबाट फर्कन न्यायाधिकरणको आदेशको अवज्ञा गरेकी छिन् । ४५३ पृष्ठको फैसलाको प्रतिलिपि पढ्नुअघि न्यायाधीश मोहम्मद गुलाम मुर्तजा मजुमदारले यो फैसला छ भागमा सुनाइने जानकारी दिए । बंगलादेश टेलिभिजनले उक्त फैसलाको घोषणा प्रत्यक्ष प्रसारण गरेको थियो ।

काठमाडौं । बंगलादेशमा अभियोजन पक्षले पूर्व प्रधानमन्त्री शेख हसिनालाई मृत्युदण्डको सजाय दिन माग गरेको छ । उनीमाथि गत वर्ष विद्यार्थीहरूको नेतृत्वमा भएका प्रदर्शनहरूलाई दबाउन मानवताविरुद्धको अपराध गरेको आरोप लगाइएको छ । बंगलादेशमा विद्यार्थीहरूको यो प्रदर्शन निकै हिंसात्मक भएको थियो, जसमा सुरक्षा बलको कारबाहीमा धेरै मानिसको मृत्यु भएको थियो । यस हिंसापछि शेख हसिना सत्ताबाट बाहिरिनु परेको थियो ।

हसिना हाल भारतमा शरण लिएर बसेकी छिन् । बीबीसीका अनुसार उनीविरुद्ध चलिरहेको मुद्दामा एउटा अडियो क्लिप बाहिरिएको छ, जसमा कथित रूपमा उनले सुरक्षा बलहरूलाई प्रदर्शनकारीहरूमाथि ‘घातक हतियारहरूको प्रयोग’ गर्न आदेश दिएको सुनिन्छ ।
हसिनाले यी आरोपहरू अस्वीकार गरेकी छिन् ।

गत वर्ष भएको यस हिंसामा करिब १,४०० मानिसको मृत्यु भएको थियाे। यसलाई सन् १९७१ को बंगलादेशको स्वतन्त्रता संग्रामपछिको सबैभन्दा भयानक हिंसा मानिन्छ । बंगलादेशका मुख्य अभियोजक ताजुल इस्लामले भने, ‘हसिनाले १,४०० मृत्युदण्डको सजाय पाउनु पर्छ ।’ उनले थपेका छन्, ‘किनकि यो मानवीय रूपमा सम्भव छैन, त्यसैले हामी कम्तीमा एक पटक मृत्युदण्डको सजायको माग गर्दछौं ।’