Tag: रविन्द्र मिश्र

काठमाडौँ । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रवीन्द्र मिश्र बुधबार बसेको पार्टी कार्यसम्पादन समिति बैठकमा अनुपस्थित भए । पार्टीभित्र अध्यक्षको कार्यशैलीलाई लिएर विवाद बढिरहेका बेला मिश्र समेत अनुपस्थित भएका हुन् । अध्यक्षको कार्यशैलीप्रति असन्तुष्टि जनाउँदै मिश्र बैठकमा सहभागी नभएको उनी निकट स्रोतले जानकारी दिएको छ ।

‘पार्टीमा स्पष्ट दुई धार भए पनि अहिलेसम्म उहाँ कतैतिर खुल्नु भएको त छैन । तर, पार्टीलाई विधिसम्मत सञ्चालन गर्नुपर्छ भन्ने उहाँको धारणा छ,’ एक केन्द्रीय सदस्यले भने । अध्यक्ष लिङदेन र महामन्त्री डा. धवलशम्शेर राणाबीच लामो समयदेखि चलिरहेको टकराबमा मिश्र निरपेक्ष रहँदै आएका थिए । उनले कुनै पनि पक्षलाई खुलेर साथ दिएका छैनन् । तर, आजको बैठकमा अनुपस्थित हुनुलाई लिङ्देनप्रति उनको असन्तुष्टिको संकेतका रूपमा बुझिएको छ ।

बैठकमा सहभागी नभएका मिश्रले सामाजिक सञ्जाल एक्समार्फत पार्टीको विश्वसनीयतामा अत्यधिक ह्रास आएको उल्लेख गरेका छन् । उनले एक्समा लेखेका छन्, ‘प्रजातन्त्र-लोकतन्त्रमा पार्टी नबनी देश बन्दैन । पार्टी बनिदेओस् भन्ने एक मात्र कामना छ !’ उनले सबै पार्टीले विश्वसनीयता गुमाएको दाबी गर्दै अप्रत्यक्ष ढंगले आफ्नै पार्टीलाई पनि यसमै घान हालेका छन् । उनले भनेका छन्, ‘पद्धति, पारदर्शिता, इमानदारी र उत्कृष्टता गुमाउँदै गएर सबै पार्टीको विश्वसनीयतामा अत्यधिक ह्रास आउनु ठुलो चिन्ताको विषय हो ।’

आजै महामन्त्रीद्वय धवलशमशेर राणा र कुन्ती कुमारी शाहीले समेत कार्यसम्पादन समितिको बैठक बहिष्कार गरेका थिए । स्रोतका अनुसार मिश्र पछिल्लो समय अध्यक्ष लिङदेनको कार्यशैलीप्रति सन्तुष्ट छैनन् । लिङदेनले सबैलाई समेटेर पार्टीमा अभिभावकीय भूमिका खेल्नुपर्नेमा गुटको नेता मात्रै बन्न खोजिरहेको उनको बुझाइ छ । पार्टीको आगामी महाधिवेशनमा लिङदेनले मिश्रको साथ पाउने सम्भावना पनि कमजोर बनेको स्रोत बताउँछ ।

राप्रपामा अध्यक्ष लिङदेनको नियमित कार्यकाल मंसिरमा सकिँदैछ । पार्टीको विधानअनुसार एक वर्ष उनले आफ्नो कार्यकाल थप्न सक्नेछन् । तर, इतर पक्षले मंसिरभित्रै महाधिवेशन गर्न दवाव बढाइरहेका छन् । आज बसेको कार्यसम्पादन समितिको बैठकले यसै महिना केन्द्रीय समिति बैठक बसेर महाधिवेशनको मिति तय गर्ने निर्णय लिएको छ । महाधिवेशनमा लिङदेन अध्यक्षमा दोहोरिन चाहन्छन् भने राणा उनलाई चुनौती दिने तयारीमा छन् । वरिष्ठ उपाध्यक्ष मिश्रले कुन रणनीति लिन्छन् भन्ने प्रष्ट भएको छैन । उनले आफूलाई अध्यक्षको प्रत्याशीका रूपमा उभ्याएका पनि छैनन् र कसलाई साथ दिने भनेर पनि खुलेका छैनन् ।

विधानबमोजिम महाधिवेशनको मिति तोकिनुपर्ने, विधान विपरीत भएका निष्कासन र कारबाहीसम्बन्धी निर्णयहरू फिर्ता गरिनुपर्ने, निर्वाचन समिति र पर्यवेक्षकको टोलीमा सन्तुलन कायम गर्नुपर्ने, प्रभावकारी पार्टी सञ्चालनका लागि दुई पूर्वअध्यक्षहरुसहितको समाधान समिति गठन गरिनुपर्ने माग गर्दै उनीहरूले बैठक बहिष्कार गरेका हुन् । उनीहरूको सहभागिता बिना बसेको बैठकले महाधिवेशनको मिति टुङ्गो लगाउन केन्द्रीय कार्यसमितिको बैठक बोलाउने निर्णय गरेको छ । बैठकले कात्तिक २७ र २८ गते काठमाडौँमा केन्द्रीय समितिको बैठक बोलाउने निर्णय गरेको प्रवक्ता मोहनकुमार श्रेष्ठले जानकारी दिए।

काठमाडौं । राष्ट्रिय प्रजातन्त्र पार्टी (राप्रपा) का वरिष्ठ उपाध्यक्ष रविन्द्र मिश्रले हालको अस्थिर राजनीतिक परिदृश्यप्रति गहिरो चिन्ता व्यक्त गर्दै सचेत र सजग हुन चेतावनी दिएका छन् । आज (शुक्रबार) सामाजिक सञ्जालमा लेख्दै उनले भनेका छन्, ‘यदि अहिलेको संकटलाई सतही रूपमा मात्र सम्बोधन गरियो भने, यो ‘दुःखद मध्यान्तरपछि फेरि यथास्थितिको निरन्तरता’ बन्ने छ ।’ मिश्रले पाँच महिनामा चुनाव गर्ने र त्यसैअन्तर्गत केही अनुहार फेरिएको संसदलाई पुनः सत्ता सुम्पिने योजनाले मुल समस्याहरूलाई छुनै नसक्ने दाबी गरेका छन् ।

यस्ता छन् मिश्रले उठाएका प्रश्न :
–नेताहरूको पक्राउ तथा सम्पत्ति छानबिन कसरी टुङ्ग्याइन्छ ?
–जेनजी आन्दोलन छानबिन आयोगको प्रतिवेदन कसरी कार्यान्वयन हुन्छ ?
–भ्रष्टाचार नियन्त्रण कसरी सम्भव हुन्छ ?
–मुलुकको दीर्घकालीन स्थिरता र सामाजिक सौहार्दता कसरी सुनिश्चित हुन्छ ?
मिश्रका अनुसार यी प्रश्नहरूको गहिरो उत्तर नखोजी गरिने जुनसुकै चुनाव, नेतृत्व परिवर्तन वा नारा सबै ‘प्राविधिक निरन्तरता’ मात्र हुनेछ— मुल चरित्र बदलिंदैन ।

‘सपना साकार पार्न संरचनागत पुनरावलोकन आवश्यक’
जेनजी आन्दोलनको भावनाप्रति सहानुभूति जनाउँदै मिश्रले भनेका छन्, ‘यदि जेनजीको सपना साकार पार्ने हो भने, देशलाई शान्तिपूर्ण संक्रमणमार्फत नवीन समझदारी तर्फ उन्मुख गराउनु पर्छ ।’ उनले संविधानको संरचनागत पुनरावलोकनको खाँचो औंल्याउँदै गहिरो राजनीतिक संवादको माग समेत गरेका छन् ।

उनको बुझाइमा अहिले धेरैले अल्पकालीन र सतही समस्याको सम्बोधनमा चित्त बुझाइरहेका छन् । तर, त्यस्तो सोचले दीर्घकालीन समाधान सम्भव छैन । ‘कति सतहमा बहने ?’ भन्दै मिश्रले गहिराइमा पस्न आग्रह गरेका छन् ।

‘नेताहरूलाई खेद्न खोज्दा लोकतन्त्र नै संकटमा पर्ला’
राजनीतिक नेताहरूलाई खेद्दै हिंड्ने मानसिकता गलत दिशातर्फ जाने खतरा रहेको मिश्रको धारणा छ । ‘नेताहरूलाई बढी खेद्न खोज्दा लोकतन्त्र नै संकटमा पर्ला’, उनले भनेका छन्, ‘गल्ती नेताहरूले मात्र होइन, हामी सबैले गरेका छौं । अब मिलेर जाने समय हो, बदला लिने होइन ।’

चुनावको अर्थ के ?
चुनावप्रति मिश्रको समर्थन स्पष्ट छ—तर शर्तसहित । ‘ठिक छ, चुनाव ५ महिनामै गरौ’ं, उनी भन्छन्, ‘तर यो चुनाव दुःखद घटनाको निरन्तरता होइन, नेपालको भविष्य सुखद बनाउने मोका बनोस् ।’ उनका अनुसार, चुनाव आफैंमा समाधान होइन—यदि गहिरो संरचनागत समस्या ज्यूँका त्यूँ रहे, तिनै पुराना अनुहार फर्केर आउने छन् र मुलुक फेरि सोही चक्रमा फस्नेछ । मिश्रले सतही समाधानको मोह त्यागेर गहिरो, दूरदर्शी र संरचनागत परिवर्तनतर्फ उन्मुख हुन सबै राजनीतिक शक्तिहरूलाई आग्रह गरेका छन् ।