प्यालेस्टाइनका राष्ट्रपति मोहमद अब्बासले आफ्नो वेस्ट बैंक मुख्यालयमा एकजना शीर्ष अमेरिकी अधिकारीसँगको वार्तामा गाजा प्यालेस्टिनी राज्यको अभिन्न अङ्ग भएको बताएका छन् ।

इजरायलले गाजामा आक्रमण तीव्र पारेपछि संयमका लागि अन्तराष्ट्रिय आह्वान जारी रहेका बेला यो भेटघाटको विशेष अर्थ राखिएको छ । राष्ट्रपति अब्बासले भ्रमणमा रहेका अमेरिकी राष्ट्रिय सुरक्षा सल्लाहकार जेक सुलिभानलाई गाजा प्यालेस्टाइन राज्यको अभिन्न अङ्ग भएको बताए । राष्ट्रपति कार्यालयले विज्ञप्ति जारी गरी भेटमा राष्ट्रपतिले कुनै पनि भागलाई अलग गर्ने प्रयास अस्वीकार्य हुने बताएका छन् ।

अब्बासले जारी इजरायली आक्रमणलाई रोक्नका लागि तत्काल आवश्यकत कदम चाल्नु पर्ने र विशेष गरी गाजामा प्यालेस्टाइनी जनतामाथि आजका दिनमा भइरहेको नरसंहारको अन्त्य हुनुपर्ने बताए ।

इजरायली युद्धले निम्त्याएको पीडा र विनाशबाट नागरिकहरूलाई जोगाउन आवश्यक रहेको उनले बताए । हमासद्वारा सञ्चालित गाजा स्ट्रिपको स्वास्थ्य मन्त्रालयले जनाएअनुसार युद्धले १८ हजार ७ सय भन्दाबढी मानिसको ज्यान लिइसकेको जनाएको छ जसमा अधिकांश महिला र बालबालिका छन् ।