काठमाडौँ – नेपाल सङ्गीत तथा नाट्य प्रज्ञा–प्रतिष्ठानले स्थापनाको १४औँ वार्षिकोत्सव सम्पन्न भएको छ । संस्कृति, पर्यटन तथा नागरिक उड्डयनमन्त्री हितमान तामाङले ‘नेपाल सङ्गीत तथा नाट्य राष्ट्रिय प्रज्ञा पुरस्कार–२०८०’ घोषणा, स्रष्टा सम्मान तथा विविध सांस्कृतिक कार्यक्रमको सोमबार उद्घाटन गर्नुभएको थियो ।

सो अवसरमा उहाँले वार्षिकोत्सवका अवसरमा प्रज्ञा प्रतिष्ठानले प्राप्त गरेका उपलब्धिहरु, सम्पन्न गर्न बाँकी रहेका कामहरुका बारेमा समीक्षा गर्नुपर्ने बताउनुभयो । उहाँले प्रज्ञा प्रतिष्ठानका लागि मन्त्रालयबाट आगामी आर्थिक वर्षमा सम्बोधन गरिनुपर्ने विषयमा आफू र मन्त्रालय सकारात्मक रहेको छ भन्नुभयो ।

समारोहमा नेपाल सङ्गीत तथा नाट्य प्रज्ञा–प्रतिष्ठानकी कुलपति निशा शर्माले ‘नेपाल सङ्गीत तथा नाट्य राष्ट्रि प्रज्ञा पुरस्कार–२०८०’का लागि छनोट भएका स्रष्टा तथा सर्जकहरुको नामावली सार्वजनिक गर्नुभयो । पुरस्कारको नामावली सार्वजनिक गर्दै कुलपति शर्माले प्रज्ञा–प्रतिष्ठान स्रष्टा तथा सर्जकहरुको संस्था भएकाले उहाँहरुको सल्लाह र सुझावलाई प्राथमिकतामा राख्ने प्रतिबद्धता व्यक्त गर्नुभयो ।

कार्यक्रममा राष्ट्रियसभा सदस्य कृष्ण अधिकारी, ललितकला प्रज्ञा प्रतिष्ठानका कुलपति नारदमणि हार्तम्छाली, राष्ट्रिय जनसांस्कृतिक सङ्घ नेपालका कार्यवाहक अध्यक्ष भीम कुमाखी मल्ललगायतले वार्षिकोत्सवका अवसरमा आफ्नो धारणा राख्नुभएको थियो ।

प्रतिष्ठानका उपकुलपति शम्भु राईले प्रज्ञा प्रतिष्ठानको अवसर र चुनौतीका बारेमा चर्चा गर्दै प्रज्ञा प्रतिष्ठानसँग विविध कार्यक्रम आयोजना गर्नका लागि सुविधासम्पन्न प्रेक्षालयको अभाव रहेको बताउनुभयो ।

पुरस्कारका लागि छनौट हुनुभएका स्रष्टाहरु रङ्गमञ्च विधातर्फ वरिष्ठ नाट्यकर्मी तथा अभिनेता हरिहर शर्मा, शास्त्रीय सङ्गीत विधातर्फ वरिष्ठ सङ्गीत साधक चन्दनकुमार श्रेष्ठ, सङ्गीत विधातर्फ वरिष्ठ गायिका तारा थापा, नृत्य विधातर्फ जोगेन्द्र केसी, नाटक विधातर्फ नाट्यकर्मी गोपाल देवान र लोक सङ्गीत विधातर्फ बमबहादुर कार्की रहनुभएको छ । वार्षिकोत्सव कार्यक्रमका अवसरमा नाटक, नृत्य र सङ्गीतका क्षेत्रमा संस्थागत तथा व्यक्तिगत रुपमा योगदान पु¥याएका संस्था तथा स्रष्टाहरुलाई सम्मान गरिएको छ ।

संस्थागततर्फ नृत्य निर्देशक सङ्घ नेपाल, माला आर्टस् एकेडेमी र सांस्कृतिक समाज नेपाल सम्मानित भए भने व्यक्तिगततर्फ वरिष्ठ नृत्यकर्मी नारायणदेवी प्रधान, राधेश्याम प्रधान, केपी पौडेल, वरिष्ठ रङ्गकर्मी वीरेन्द्र हमाल, वरिष्ठ गायक रामकृष्ण दुवाल, जनपक्षीय गायक भीम मल्ल कुमाखी, प्राज्ञ माधव प्रधान, वरिष्ठ सङ्गीतकर्मी सङ्गीता प्रधान, वरिष्ठ गायिका कुन्ती मोक्तान, वरिष्ठ नाट्यकर्मी अविनाश श्रेष्ठ, वरिष्ठ नाटक निर्देशक अशेष मल्ल, सङ्गीतकर्मी रुपकुमार राई, वरिष्ठ नाट्यकर्मी बद्री अधिकारी र सङ्गीतकर्मी विष्णु अधिकारीलगायत प्रशंसापत्रसहित सम्मानित हुनुभयो । प्रज्ञा–प्रतिष्ठानको सदस्यसचिव कुश्मा महराद्वारा सहजीकरण गरिएको कार्यक्रममा नेपाल सङ्गीत तथा नाट्य प्रज्ञा–प्रतिष्ठानको १४ वर्षे यात्राकोे भिडियो प्रस्तुत गरिएको थियो ।