कास्की । गण्डकी प्रदेशमा नेपाली कांग्रेसका सुरेन्द्रराज पाण्डे मुख्यमन्त्री बनेका छन् । प्रदेश प्रमुख डिल्लीराज भट्टले बुधबार उनलाई मुख्यमन्त्रीमा नियुक्त गरेका हुन् । सर्वोच्च अदालतले सोमबार पाण्डेलाई ४८ घन्टाभित्र मुख्यमन्त्री नियुक्त गर्न परमादेश जारी गरेको थियो । सवोच्चले दिएको समय अनुसार नै पाण्डे मुख्यमन्त्री नियुक्त भएका हुन् । सर्वोच्च अदालतको परमादेश अनुसार पाण्डे संविधानको धारा १ सय ६८ को उपधारा ३ बमोजिम ठूलो दलको नेताको हैसियतले मुख्यमन्त्री बनेका छन् । गण्डकीका निवर्तमान मुख्यमन्त्री खगराज अधिकारीले संविधानसम्मत विश्वासको मत नपाएको ठहर गर्दै सोमबार सर्वोच्चले उनको विश्वासको मत बदर गरिदिए पछि पाण्डेका लागि बाटो खुलेको थियो ।

मुख्यमन्त्री अधिकारीले बैशाख २३ गते विश्वासको मत लिँदा ३० सदस्यको समर्थन प्रस्ताव बहुमतबाट पास भएको भनी सभामुखले घोषणा गरेका थिए । यसविरूद्ध कांग्रेसका नेता पाण्डे सर्वोच्च अदालत पुगेका थिए । सर्वोच्चले गण्डकी प्रदेशसभामा बहुमतको लागि न्यूनतम ३१ सदस्यको आवश्यकता पर्नेमा ३० सदस्यको समर्थन प्रस्ताव बहुमतबाट पास भएको भनी प्रदेश सभाका सभामुखबाट भएको घोषणा नेपालको संविधान विपरित भएको ठहर्दै बदर गरिदिएको थियो ।