काठमाडौं । नेकपा एमाले भातृ संगठन राष्ट्रिय युवा संघ नेपालको केन्द्रीय कमिटीको तेस्रो पूर्ण बैठकले विभिन्न प्रस्ताव पारित गरेको छ । जेठ १९ र २० गते एमाले केन्द्रीय कार्यालय च्यासलमा बसेको बैठकले विभिन्न प्रस्ताव पारित गरेको हो । बैठकले पार्टीले लिएको ‘समृद्ध नेपालः सुखी नेपाली’को अभियानलाई लक्षित विन्दुमा पुयाउनु संघको महत्वपूर्ण जिम्मेवारी रहेको निष्कर्ष निकालेको छ ।

त्यस्तै बैठकले आगामी मिसन ८४ लाई केन्द्रित भई नेकपा (एमाले)लाई निर्णायक राष्ट्रिय शक्ति बनाउने महत्वपूर्ण लक्ष्य लिएको छ । बैठकले जनजीविका, जनसरोकार, सामाजिक न्याय, सुशासन तथा राष्ट्रियता र मुलुकको सार्वभौमसत्ताको रक्षार्थ आफ्नो स्पष्ट दृष्टिकोण र कार्यदिशा तय गरेको छ ।

संघको लक्ष्य, उद्देश्य र कार्यक्रमहरुलाई युवा समुदायमाझ प्रभावकारी तवरले लागू गर्न विभाग, प्रदेश, जिल्ला एवं पालिका स्तरसम्म प्रभावकारी कार्यसम्पादन गर्न जिम्मेवारी प्रदान गर्ने निर्णय गरेको छ । बैठकले साईबर सुरक्षा कार्यशाला, ७ प्रदेश, ७ भेला आयोजना गर्ने निर्णय गरेको छ । त्यस्तै बैकठले आर्टीफिसियल इन्टेलिजेन्स कन्फ्रेन्स गर्ने तथा प्रदेश, जिल्ला तथा पालिका अधिवेशनको मिति पनि तय गरेको छ ।