काठमाडौं । उपसभामुख इन्दिरा रानाले आफूले कसैलाई अमेरिका पठाउन भिसाका लागि अनुरोध नगरेको दाबी गरेकी छन् ।

शुक्रबार विज्ञप्ति जारी गरी उपसभामुख रानाले आफूलाई अमेरिकी दूतावाससँग जोडेर आएका समाचारमा सत्यता नभएको बताएकी हुन् ।

उनले उपसभामुखको जिम्मेवारी वहन गरेको केही साताभित्र आएका निमन्त्रणामा सँगै जानुपर्ने भनी आएको अनुरोधलाई स्वीकार गरी पत्र लेखेको बताएकी छन् ।

उनले यो विषयलाई झण्डै डेढ वर्षपछि विवादित बनाउन खोजिएको भन्दै आफूविरुद्धको नियोजित कदमका रूपमा समेत चित्रण गरेकी छन् । उपसभामुख रानाले सन् २०२३ मार्च महिनामा यूएन सीएसडब्लू सम्मेलनमा आफ्ना सहयोगी समेत हुने भएकाले अन्तर्वार्ताका लागि अनुरोध गरेको कारण आफूले अमेरिकी दूतावासलाई अन्तर्वार्ताका लागि मिति राख्न मात्रै अनुरोध गरेको दाबी गरेकी छन् ।

विज्ञप्तिमा भनिएको छ, ‘उक्त कार्यक्रममा मेरो लागि सहयोगी समेत भैदिने हुनाले अन्तर्वार्ताको लागि मिति लिईदिन अनुरोध गरेपछि मैले नेपालस्थित संयुक्त राज्य अमेरिकाको राजदूतावासलाई अन्तर्वार्ताको लागी मिति राखिदिन अनुरोध मात्र गरेको थिएँ । कसैलाई भिसा दिने वा नदिने स्वःनिर्णय राजदूतावासले आफ्नो नीति र प्रक्रिया बमोजिम गर्ने नै हुन्छ। मैले कसैको भिसाको लागि अनुरोध पनि गरेकी छैन। हैन।’

उपसभामुख रानाले आफ्नो टोलीको सदस्य भन्दै ५ जनाको अन्तर्वार्ताको समय अगाडि सारिदिन काठमाडौँस्थित अमेरिकी दूतावाससँग ताकेता गरेको पाइएको थियो । पत्र बाहिरिएपछि उपसभामुख राना विवादमा परेकी छन् ।