काठमाडौं । राष्ट्रिय जनमोर्चाकी सांसद तारा थापाले जनताको काम के गरेका छौं भन्दै प्रश्न गरेकी छन् । मंगलबार लुम्बिनी प्रदेशसभाको बैठकमा सांसद थापाले जनता यत्रो समस्या पर्दा पनि प्रदेशसभा बेखबर हुनु दुःखको विषय भएको बताएकी हुन् ।

उनले केन्द्रमा समीकरण बिग्रिदैमा प्रदेशमा पनि समीकरण परिवर्तन गरिएको भन्दै आपत्ति जनाएका हुन् । उनले यो सरकार पनि कति टिक्ने भन्ने निश्चित नभएको बताइन् । उनले मुख्यमन्त्रीले विश्वासको मत माग्दै गर्दा लुम्बिनी प्रदेशलाई उत्पादनबाट अघि बढाउने आश्वासन दिएको तर कृषिमा बजेट नछुट्याइएको भन्दै आपत्ति जनाइन् ।

उनले भनिन्,’केन्द्रमा तपाइँहरु यतिधेरै धाइरहनु भएको छ कि तपाइँले कसरी प्रदेशको विकास गर्न सक्नु हुन्छ ? बजेट छुट्याउने बेलामा भौतिक पूर्वाधारमा छुट्याउने अनि भाषण गर्दा चाहिँ उत्पादन बढाउँछौं भन्ने ? उत्पादन बढाउन त कृषिमा बजेट छुट्याउनु पर्यो नि । पाँच लाखलाई रोजगारी दिने भनेर मात्र हुन्छ ? साँचो कुरा मात्र बोल्नु ।’

उनले युवाहरुलाई झुटो आश्वासन दिने काम नगर्न आग्रह गरिन् । उनले भनिन्, ‘अहिले दैनिक तीन देखि पाँच हजार युवा विदेश गइरहेका छन् । तपाईंहरु मन्त्री बन्न र कार्यालय सहयोगी राख्नसमेत केन्द्रमा धाइरहनु भएको छ । खै रोजगारी दिने नीति बनाएको ?’

उनले युवालाई विदेश पलायन रोक्ने काम नगरेसम्म सुशासनका कुरा नगर्न चेतावनी दिइन् ।