काठमाडौं । नेपाली कांग्रेसका महामन्त्री गगन थापाले कानुन विपरीत कार्य गर्ने सबै जना कानुनी प्रक्रिया अनुसार अनुसन्धानको दायरामा आउनुपर्ने बताएका हुन् ।

शनिबार सामाजिक संजालमार्फत महामन्त्री थापाले कुनै प्रकारको पूर्वाग्रह नराखी कानुन विपरीत कार्य गर्नेलाई कानुनी कारबाही गर्नुपर्ने बताएका हुन् । उनले भनेका छन्, ‘कोहीप्रति कुनै प्रकारको पूर्वाग्रह वा पक्षपात नगरी कानुनले स्वतन्त्र र निर्भीक रूपमा आफ्नो काम गर्न पाउनुपर्छ’ कानुनी शासनको मान्यता यही हो । कानुन विपरीत कार्य गर्ने सबै जना कानुनी प्रक्रिया अनुसार अनुसन्धानको दायरामा आउनुपर्छ।’

उनले सहकारी प्रकरण होस् कि मानव तस्करीमा संलग्न रहेको प्रकरण होस्, सबैलाई कानुनी दायरामा ल्याउनुपर्ने उल्लेख गरेका छन् ।

उनले भने, ‘सहकारी प्रकरण होस् कि जनप्रतिनिधि मानव तस्करीमा संलग्न रहेको प्रकरण होस्, यस्ता प्रकरणमा संलग्न सत्ताको नजिकको होस् की टाढाको होस्, नयाँ होस् कि पुरानो होस्, भिडको होस् कि टाकुराको होस्, एक्लो होस् कि शक्तिशाली होस् कानुन सबैको लागि बराबर हुनुपर्छ। गल्ती गर्नेले सजाय भोग्नुपर्छ। सबै कानुनी दायरामा आउनुपर्छ र सबैले आफ्नो भागको कानुनी दायित्व बोक्नुपर्छ।’

उनले कुनै पनि व्यक्तिलाई राज्यले विशेष ढंगले हेर्न नपाइने बताएका छन् । उनले भनेका छन्, ‘कुनै पनि व्यक्तिलाई राज्यले क्भभिअतष्खभ ढङ्गले हेर्न पाइँदैन। यो विचार, आबद्धता वा पृष्ठभूमिको आधारमा हुने छनोटको विषय होइन, विधिको विषय हो। म यो मान्यतामा अटल विश्वास गर्छु। त्यसैले बन्द कोठाको बैठकमा होस कि सार्वजनिक स्थानमा होस, पार्टी सरकार मा हुँदा होस कि प्रतिपक्षमा हुँदा होस मेरो यो मान्यता र विश्वास बदलिँदैन । आज गणेशमान सिंहको जन्म जयन्ती, हामीले गणेशमान सिंहबाट सिकेको पनि यही हो। उहाँका अटल विश्वास,आदर्श र निष्ठाको स्मरण सहित हार्दिक श्रद्धा सुमन !’