काठमाडौं । नेपाल कम्युनिष्ट पार्टी (माओवादी केन्द्र) को पदाधिकारी बैठकले आउँदो साउन ७ गते पार्टी संस्थापक नेतामध्येका एक पुष्पलाल श्रेष्ठको जन्मजयन्ती मनाउने निर्णय गरेको छ ।

बिहीबार सम्पन्न बैठकपछि उपाध्यक्ष एवं प्रवक्ता अग्निप्रसाद सापकोटाले पत्रकारहरूसँग जानकारी दिँदै बैठकमा संगठनात्मक विषयमा गहन छलफल भएको बताए ।उनका अनुसार हालै देशभर, विशेषगरी रसुवा लगायतका जिल्लामा आएको बाढी र पहिरोले धनजनमा ठूलो क्षति पु‍र्याएकोप्रति पार्टीले गहिरो दुःख व्यक्त गरेको छ । माओवादी केन्द्रले मृतकप्रति श्रद्धाञ्जली अर्पण गर्दै पीडितका परिवारप्रति समवेदना जनाएको छ ।

प्रवक्ता सापकोटाले भने, ‘आजको पदाधिकारी बैठकमा आन्तरिक संगठनात्मक विषयहरुको बारेमा छलफल थियो । त्यसको अत्तिरिक्त अहिले अब यो अहिले बाढी पहिरोले धेरै ठूलो धनजनको क्षति गरेको छ त्यसमा अब रसुवा लगायतका जिल्लाहरुमा अकल्पनिय खालको बाढी पहिरो आएर धनजनको क्षति भएकोमा हाम्रो पार्टीले मृत्तकहरुप्रति श्रद्धाञ्जली व्यक्त गरेको छ ।

साथै सरकारसँग उद्धारको लागि तदरुकताका अनुसार काम गरोस् र राहतका लाग, पुर्नस्थापनाका लागि सरकारले गम्भिरतापूर्वक ध्यान देओस् भन्ने माग बैठकले गरेको छ । यसका साथसाथै साउनको ७ गते पुष्पलालको जन्म दिवस मनाउने निर्णय गरेको छ ।’