काठमाडौँ, १९ साउनः सङ्घीय संसद् प्रतिनिधिसभाको आजको बैठकमा ‘विश्व व्यापार सङ्गठनको मत्स्य उद्योगमा सहुलियतसम्बन्धी सम्झौतालाई अनुमोदन गरियोस्’ भन्ने प्रस्ताव बहुमतले पारित भएको छ ।

उद्योग, वाणिज्य तथा आपूर्तिमन्त्री दामोदर भण्डारीले ‘विश्व व्यापार सङ्गठनको मत्स्य उद्योगमा सहुलियतसम्बन्धी सम्झौताको प्रावधान माथि सदनमा छलफल गरियोस्’ भनी प्रस्ताव पेस गर्नुभयो । उक्त प्रस्तावमाथिको छलफलपछि उक्त सम्झौतालाई अनुमोदन गरिएको हो ।

छलफलमा सांसद रमा कोइराला पौड्याल, हेमराज राई, हितराज पाण्डे, प्रेम सुवाल सहभागी हुनुभयो । मन्त्री भण्डारीले एक बहुपक्षीय सम्झौता भएको र कार्यान्वयन भएको खण्डमा विश्व व्यापार सङ्गठनसँग नेपालका थप माग र मुद्दाले प्राथमिकता पाउने बताउनुभयो ।

उहाँले भन्नुभयो, “हालसम्म १०६ वटा राष्ट्रले समर्थन जनाइसकेका छन् । यो सम्झौताले मुलुकलाई लाभ नै प्राप्त हुन्छ । यसको सान्दर्भिकता र महत्व छ । भूपरिवेष्ठित राष्ट्र हौँ तर समुद्रमा नेपालको पनि अधिकार छ । सम्झौताले नेपालमा उत्पादित माछाले बजार पाउँछन् ।”

प्रतिनिधिसभाको अर्को बैठक साउन २० गते दिउँसो १ बजे बस्नेछ ।