काठमाडौं । प्रधानमन्त्री केपी शर्मा ओली आज जापानी उपनिवेशविरुद्ध चीनले आयोजना गरेको विशाल सैन्य परेडमा सहभागी भएका छन् ।चीन भ्रमणमा रहेका प्रधानमन्त्री ओलीले अहिले चीनको तियानमेन स्क्वयारमा भइरहेको भव्य परेड अवलोकन गरिरहेका हुन् ।

परेडमा ओलीसहित रुसी राष्ट्रपति भ्लादिमिर पुटिन, उत्तर कोरियाली नेता किम जोङ उनलगायत २६ देशका राष्ट्र तथा सरकार प्रमुख र ५० हजार पाहुना उपस्थित छन् ।

चीनको पैचिङस्थित थ्येनआनमन चोकमा चिनियाँ जनताको जापानी अतिक्रमणविरूद्धको युद्ध तथा विश्व फासिवाद विरोधी युद्धमाथिको विजयको ८०औं वार्षिकोत्सव समारोह आयोजना गरिएको हो ।

समारोहलाई चिनियाँ राष्ट्रपति सी चिनफिङले महत्वपूर्ण सम्बोधन र सेनाको अवलोकन निरीक्षण गरेका थिए । चीनको सातौं स्थापना दिवसको अवसरमा तत्कालीन प्रधानमन्त्री टंकप्रसाद आचार्य र १२ औं स्थापना दिवसमा तत्कालीन राजा महेन्द्रले परेड अवलोकन गरेका थिए ।

भदौ १४ गते तीन भ्रमणमा गएको प्रधानमन्त्री ओली नेतृत्वको प्रतिनिधिमण्डल आजै स्वदेश फर्किदै छ । शाङ्घाई सहयोग संठन (एससिओ) शिखर सम्मेलनमा सहभागी गएका ओली राति आठ बजे काठमाडौं आईपुग्ने तालिका रहेको परराष्ट्र मन्त्रालयले जनाएको छ ।

चीनबाट फर्किए लगत्तै प्रधानमन्त्री ओलीले विमानस्थलमा पत्रकारहरुलाई भ्रमणबारे जानकारी दिने मन्त्रालयका प्रवक्ता लोकबहादुर पौडेल क्षेत्रीले जानकारी दिएका छन् । भ्रमणका क्रममा ओलीले शिखर सम्मेलनलाई सम्बोधन गर्नुका साथै चिनिया राष्ट्रपति सी चिनफिङसहित बिभिन्न देशका राष्ट्र प्रमुखहरुसँग साइडलाईन भेटवार्ता गरेका थिए ।