काठमाडौं । जेनजीहरूको उग्र प्रदर्शनपछि ललितपुरको नख्खु कारागारमा रहेका सबै कैदी निस्किएका छन् । रास्वपा सभापति रवि लामिछानेसहितका कैदीहरू प्रदर्शन उग्र बनेपछि कारागारबाट बाहिरिएका हुन् । कारागार बाहिर प्रदर्शनकारीहरू पुगेसँगै कारागार प्रशासन निरीह बन्न पुगेको थियो । लगत्तै, लामिछानेसहितका कैदीहरू बाहिरिएका हुन् ।

अहिले कारागार पूरै रित्तो भएको ललितपुरका एसएसपी श्यामकृष्ण अधिकारीले जनाए । ‘कोही पनि कैदी अहिले कारागारमा छैनन्,’ अधिकारीले भने । सोमबार र मंगलबार भएको प्रदर्शन अराजक बन्न पुगेको थियो । जेनजी प्रदर्शकारीले गरेको प्रदर्शनका कारण २० बढीको मृत्यु भइसकेको छ । देशका राष्ट्रपति, प्रधानमन्त्री, मन्त्री लगायत उच्च पदस्थहरूको कार्यालयमा आगजनी भएको छ । सबै संरचना ध्वस्त भएका छन् । यसैबीच प्रधानमन्त्री केपी शर्मा ओलीले राजीनामा दिइसकेका छन् ।