काठमाडौं । तिब्बतका आध्यात्मिक नेता दलाई लामाले नेपालमा नव नियुक्त प्रधानमन्त्री सुशीला कार्कीलाई शुभकामना तथा बधाइ दिएका छन् । उनले एक सन्देश पठाउँदै कार्कीलाई बधाइ दिएको तिब्बती समाचार एजेन्सीले जनाएको छ। चीनले पृथकतावादी भनेर प्रतिवन्ध लगाएका धर्मगुरुले नेपालमा प्रधानमन्त्री नियुक्ती हुँदा बधाइ सन्देश पठाएको सम्भवतः पहिलो पटक भएको जानकारहरु बताउँछन् ।

चीनले भने अहिलेसम्म कार्कीलाई औपचारिक बधाइ सन्देश पठाइसकेको छैन । आफ्नो सन्देशमा लामाले नेपाली र तिब्बती जनताले ऐतिहासिक रूपमा निकट सम्बन्धको आनन्द लिँदै आएको बताएका छन् । उनको सन्देशमा भनिएको छ, ‘१९५९ पछि तिब्बतबाट जबरजस्ती भागेर आएका तिब्बती शरणार्थीहरूको पुनर्वासका लागि सुविधाहरू उपलब्ध गराएकोमा नेपाल सरकार र जनताप्रति अत्यन्त कृतज्ञ छु । वास्तवमा, तिब्बती समुदाय अपेक्षाकृत सानो भए पनि, मलाई विश्वास छ कि यसले नेपालको आर्थिक वृद्धितर्फ उल्लेखनीय योगदान दिँदै आएको छ ।’

वर्षौंदेखि, नेपालमा जीवनका सबै क्षेत्रहरूमा उल्लेखनीय विकास र बढ्दो समृद्धि भएको लामाले बताएका छन् । ‘यस्ता उपलब्धिहरू ती वास्तवमा गरिब र आवश्यकता पूर्ति गर्ने व्यक्तिहरूको जीवन सुधार्छन् भने मात्र थप अर्थपूर्ण हुन्छन्,’ उनी भन्छन्, ‘यी चुनौतीपूर्ण समयमा नेपाली जनताका आशा र अपेक्षाहरू पूरा गर्न तपाईंलाई हरेक सफलताको शुभकामना । मेरो प्रार्थना र शुभकामनासहित ।’ तिब्बतको स्वायत्तताका लागि लड्दै आएका नोबेल शान्ति पुरस्कार विजेता दलाई लामाले पृथकतावादी नेता भनेर देशबाट निष्काशित गरेको थियो । उनी भारतको हिमाञ्चल प्रदेशमा निर्वाशित जीवन बिताइरहेका छन् ।