काठमाडौं । नेकपा माओवादी केन्द्रले सुशीला कार्कीलाई नयाँ प्रधानमन्त्री नियुक्त गर्दै गरिएको प्रतिनिधिसभा विघटनमा असहमति जनाईरहेका बेला सोही पार्टीका नेताले भने समर्थन गरेका छन् ।

नेकपा माओवादी केन्द्रका उपमहासचिव हरिबोल गजुरेलले वर्तमान परिस्थितिलाई निकास दिनका लागि प्रतिनिधि सभा विघटन आवश्यक रहेको बताएका छन् । उनले प्रतिनिधि सभा विघटन आवश्यक थियो भन्ने कुरा जनताले अनुभव गरिरहेका टिप्पणी गरेका छन् ।

यद्यपि विघटनमा प्रक्रियागत त्रुटि भएको उनको भनाइ छ । ‘संसद् विघटनमा प्रक्रियागत त्रुटि भए पनि परिस्थितिलाई निकास दिन यो आवश्यक थियो भन्ने कुरा जनताले अनुभव गरिरहेका छन्’ उनको भनाइ छ ।

गजुरेलले जेन–जी आन्दोलन सफल भएको भन्दै देश गम्भीर संकटमा रहेको बेला राष्ट्रपति रामचन्द्र पौडेलले देखाएको अडान र साहसका कारण आन्दोलन सुरक्षित रूपमा अवतरण हुन पुगेको बताएका छन् । ‘राष्ट्रपति धन्यवादका पात्र हुनुहुन्छ’ उनले भनेका छन् ।

माओवादी केन्द्रले भने संवैधानिक व्यवस्था विपरीत प्रतिनिधिसभा विघटन गरिएको भन्दै गम्भीर असहमति रहेको जनाएको छ । गजुरेल भने विघटनको पक्षमा उभिएका हुन् । विघटित प्रतिनिधिसभाका आठ राजनीतिक दलले संसद विघटनप्रति असहमति जनाएका छन् । यसरी असहमति जनाउनेमा नेकपाली कांग्रेस, नेकपा एमाले, नेकपा माओवादी केन्द्रलगायतका दलहरु छन् ।