काठमाडौं । चालू आर्थिक वर्षको सुरुवातसँगै घरजग्गा कारोबार घट्दै गएको छ । चालू आर्थिक वर्षको दोस्रो महिना भदौसम्म देशभर घरजग्गा कारोबार १३ प्रतिशतको गिरावट आएको भूमि व्यवस्थापन तथा अभिलेख विभागको तथ्याङ्कले देखाएको हो ।

भूमि व्यवस्थापन तथा अभिलेख विभागका अनुसार भदौ महिनामा देशभर कुल २७ हजार ४९४ वटा घरजग्गा कारोबार भएको छ । जबकि अघिल्लो महिना साउनमा देशभर कुल ३१ हजार ६२१ वटा घरजग्गा कारोबार भएका थिए । जुन भदौमा १३ दशमलव ०५ प्रतिशतले कम हो । गत आर्थिक वर्षको सोही अवधि अर्थात् गत वर्षको भदौमा देशभर ३२ हजार ७९८ वटा घरजग्गा कारोबार भएको थियो ।

घरजग्गा कारोबारसँगै राजश्व सङ्कलनमा पनि ४ दशमलव ५१ प्रतिशत गिरावट आएको छ । भदौ महिनामा कुल घरजग्गा कारोबारबाट ३ अर्ब १४ करोड ७ लाख १६ हजार रुपैयाँ राजस्व सङ्कलन भएको छ । जबकि अघिल्लो महिना साउनमा घरजग्गा कारोबारबाट ३ अर्ब २८ करोड ९१ लाख ३८ हजार रुपैयाँ सङ्कलन भएको थियो ।

भदौमा सबैभन्दा धेरै घरजग्गा भूमिसुधार तथा मालपोत कार्यालय इनरुवा सुनसरीमा १ हजार ४०२ वटा घरजग्गा कारोबारका लिखत पारित भएका छन् । त्यस्तै,  जनकपुरधाममा १ हजार ६०, भ्रदपुर झापामा १ हजार २७ वटा, राजविराज सप्तरीमा ९३७ वटा, भक्तपुर ९१८, बेलबारी मोरङमा ८९३, सिराहा ६८९, मलंगवा सर्लाही ६२६, लगनखेल ललितपुर ६२०, लाहान सिराहामा ६१८ वटा घरजग्गा कारोबार भएको छ ।