काठमाडौं । नेकपा (माओवादी केन्द्र) का केन्द्रीय सदस्य सुदन किरातीले पार्टी बैठकमा सबै नेताले आ–आफ्नो कुरा राख्न पाउनु पर्ने माग गरेका छन् । आज (बिहीबार) देखि काठमाडौंमा सुरू भएको केन्द्रीय समिति बैठकमा किरातीले सबैले आफ्ना कुरा आफैले राख्नु पर्ने माग गरेका हुन् ।

बैठकमा अध्यक्ष प्रचण्डले पेस गर्ने प्रतिवेदनमा भौगोलिक र गैरभौगोलिक समूह बनाउने र त्यहाँ छलफल गरेर हलमा निष्कर्ष र सुझाव प्रस्तुत गर्ने कार्यसूची थियो । यसमा असहमति जनाउँदै केही नेताहरूले सबैले वर्तमान परिस्थितिबारे दुई-तीन मिनेट भए पनि बोल्न पाउनु पर्ने भनेका थिए । माओवादी निकट अखिल क्रान्तिकारीका पूर्व अध्यक्ष समेत रञ्जित तामाङले नेताहरुमा बाहिर अनेक बोल्ने तर पार्टी बैठकमा केही नबोल्ने प्रवृत्ति भएको बताएका छन् ।

‘अहिलेको परिस्थितिका विषयमा बाहिर अनेकौं कुराहरू आइराखेका छन् । बाहिर राखेका कुराहरू हामी आधिकारिक मानिरेहका छैनौं । अवको यो स्थितिमा पार्टीको संगठनलाई कसरी अगाडि लाने हो भन्ने दृष्टिकोणमा सबैले दुई-तीन मिनेट राख्नुपर्छ । बाहिर अनेकौं तर्क राख्ने । पार्टीको बैठकमा केही नराख्ने । केही सीमित मान्छेहरूले मात्रै राख्ने अवस्थाले अहिलेको अवस्थालाई नेतृत्व गर्न सकिँदैन,’ तामाङले भने । तामाङलाई बीचमा रोकेर महासचिव देव गुरूङले ती सबै विषयवस्तु समूहगत छलफलमा पनि आउने बताएका थिए । त्यसपछि सुदन किराती बोलेका हुन् ।

‘आमाले त आफ्नो नानीको प्रतिनिधित्व गर्न सक्दैन भने यहाँ कसैले हाम्रो प्रतिनिधित्व गर्न सक्दैन । हामी आफै बोल्नु पर्छ,’ किरातीले भने । पूर्व पर्यटन मन्त्री समेत रहेका किराती माओवादी केन्द्रभित्र उपमहासचिव जनार्दन शर्मा निकट मानिन्छन् । शर्माले जेनजी आन्दोलनपछिको परिस्थितिमा अध्यक्षलगायत सबै पदाधिकारीले राजीनामा दिनुपर्ने र वरिष्ठ नेताको संयोजकत्वमा विशेष महाधिवेशन गर्नुपर्ने प्रस्ताव आइतबारको बैठकमा राखेका थिए । उनले पार्टीको नेतृत्वमा पुस्तान्तरणको विषयलाई उठाउँदै आएका छन् ।