काठमाडौं । इजरायलको सेनाले खाली गरेको गाजाका क्षेत्रहरूमा हमासले ठूलो संख्यामा आफ्नो सुरक्षा बलका सदस्यलाई परिचालन गरेको छ । ती क्षेत्रमा आफ्नो पकड जमाउन हमासले सात हजारको संख्यामा आफ्ना सदस्य तैनाथ गरेको बीबीसीको खबरमा उल्लेख छ ।
प्यालेस्टिनी समूहले पनि पाँच जना नयाँ गभर्नर नियुक्त गरेका छन् । ती सबै सैन्य पृष्ठभूमिका छन् ।

फोन र म्यासेजमार्फत् परिचालनको आदेश दिइएको खबरमा उल्लेख छ । हमासका सशस्त्र इकाईहरू विभिन्न जिल्लाभर परिचालन गरिएका छन् । यस्तै हमासले पाँच नयाँ गभर्नरहरू पनि नियुक्त गरेको छ । जसमध्ये केहीले पहिले हमासको सशस्त्र शाखामा ब्रिगेडहरूको नेतृत्व गरेका थिए ।

रिपोर्टका अनुसार, हमासले फोन कल र टेक्स्ट सन्देशहरू मार्फत् यो आदेश जारी गरेको थियो । सन्देशमा भनिएको छ,’ कि यसको लक्ष्य गाजालाई अपराधी र इजरायलका सहयोगीहरूबाट मुक्त गर्नु हो ।’ लडाकुहरूलाई २४ घण्टा भित्र रिपोर्ट गर्न भनिएको थियो ।
गाजाबाट प्राप्त रिपोर्टहरूका अनुसार, हमासका सशस्त्र एकाइहरू पहिले नै धेरै क्षेत्रहरूमा तैनाथ भइसकेका छन् ।

केहीले सामान्य पोशाकमा र अरूले गाजा प्रहरीको नीलो पोशाक लगाएका छन् । दुघमाश जनजातिका बन्दुकधारीहरूले हमासको विशेष टोलीका दुई सदस्यलाई गोली हानी हत्या गरेपछि गाजा शहरको साब्रा क्षेत्रमा तनाव तीव्र गतिमा बढेको थियो । उनीहरूको शव सडकमा छाडिएको थियो ।

जसले गर्दा आक्रोश फैलियो र हमासबाट ठूलो बदलाको डर बढेको बताइएको छ । त्यसपछि हमासका सदस्यहरूले एउटा ठूलो क्षेत्रलाई घेरे जहाँ मेसिन गन र विस्फोटक पदार्थले सशस्त्र लगभग ३०० कुख्यात बन्दुकधारीहरू लुकेको भनिएको थियो । यसैबीच, इजिप्टको राष्ट्रपति कार्यालयले अमेरिकी राष्ट्रपति डोनाल्ड ट्रम्प र अन्य २० नेताहरू सोमबार इजिप्टमा गाजा युद्धमा हुने शिखर सम्मेलनमा भेट्ने बताएको छ ।