काठमाडौं । चीनका राष्ट्रपति सी चिनफिङले जनमुक्ति सेना (पिएलए) का दोस्रो वरीयताका जनरल ह वेइदङसहित नौं जना वरिष्ठ कमाण्डरलाई पदमुक्त गरेका छन् ।

चिनियाँ रक्षा मन्त्रालयले एक वक्तव्य जारी गर्दै राष्ट्रपति सीले जनरल वेइङदङसहित पिएलएका सेन्ट्रल मिलिटरी कमिसन (सिएमएसी) का नौं जना जनरलहरूलाई बर्खास्त गरिएको फाइनान्सियल टाइम्सले जनाएको छ । बर्खास्तीमा परेकाहरूमा वेइङदङ, सिएमसीका अर्का सदस्य मिआओ हुआ, सीएमसी राजनीतिक कार्य विभागका पूर्व उपप्रमुख ह हङजुन र पिएलए रकेट फोर्सका प्रमुख वाङ हाउबिन लगायत वरिष्ठ कमाण्डरहरू छन् ।

त्यस्तै पिएलए रकेट फोर्सका पूर्व कमान्डर ली युचाओ र लिउ गुआङबिन, रकेट फोर्सकै पूर्व राजनीतिक कमिश्नर झोउ यानिङ, पिएलएका नौसेना विभागका वरिष्ठ अधिकारी छु झोङ्बो, सशस्त्र विभागका वरिष्ठ कमाण्डर झाङ झेनझङलाई पनि बर्खास्त अन्तर्राष्ट्रिय समाचार संस्था रोयटर्स लगायतका सञ्चारमाध्यमहरूले जनाएका छन् ।

यी नौ अधिकारीहरू भ्रष्टाचार र पदसम्बन्धी अपराधमा संलग्न भएको ठोस प्रमाण भेटिएकाले कारबाही गरिएको रक्षा मन्त्रालयले जनाएको छ । सीको यो कदमलाई हालसम्मकै सबैभन्दा ठूलो सैन्य शुद्धीकरण अभियानको रूपमा हेरिएको भनेर फाइनान्सियल टाइम्सले लेखेको छ । ह वेइदङ सिएमसीका दुई उपाध्यक्षमध्ये एक हुन्।

उनी कम्युनिस्ट पार्टीको पोलिटब्युरोका सदस्य समेत हुन् भने पिएलएका तेस्रो शीर्ष अधिकारी थिए। उनी वरिष्ठ उपाध्यक्ष बन्ने तयारीमा समेत थिए । उनीहरूलाई पार्टीबाट निष्कासन गरी सैन्य अभियोजन कार्यालयमा मुद्दा पठाइएको पनि चिनियाँ रक्षा मन्त्रालयले बताएको छ । उनीहरूको बर्खास्ती चीनको इतिहासमा करिब ६० वर्षपछि पहिलो पटक त्यस्तो उच्च तहका सैन्य अधिकारी हटाइएका हुन् ।