काठमाडौं । एक गायिकाले स्टुडियोमा आत्मदाह प्रयास गरेको घटनामा गायक तथा संगीतकार बाबुल गिरी (धनबहादुर) सोधपुछका का लागि जिल्ला प्रहरी परिसरमा राखिएका छन् । शनिबार दिउँसो अनामनगरस्थित गिरीको स्टुडियोमै शरीरमा आगो लगाएर गायिका नितु पौडेलले आत्मदाह प्रयास गरेकी थिइन् । उक्त घटनामा गायक गिरी पनि सामान्य घाइते भएका छन् ।

गिरीलाई कीर्तिपुरस्थित बर्न अस्पतालले शनिबार नै डिस्चार्ज दिएको थियो । डिस्चार्ज लगत्तै केही सोधपुछका निम्ति भन्दै प्रहरीले उनलाई नियन्त्रणमा लिएको हो । उनी अहिले पनि जिल्ला प्रहरी परिसर, भद्रकालीकै हाताभित्र रहेको प्रवक्ता एसपी पवन भट्टराईले जनाएका छन् । के कसरी घटना भएको हो भन्ने कुरा बुझ्नका निम्ति गिरीलाई नियन्त्रणमा लिइएको भट्टराईले जानकारी दिएका छन् । गिरीलाई म्याद थपेर मुद्दा चलाइहाल्नु पर्ने कुनै कारण नभएको उनले बताएका छन् ।