काठमाडौं । राष्ट्रिय स्वतन्त्र पार्टी (रास्वपा) ले हालैको जेनजी आन्दोलनलाई पुराना दलहरूको अनैतिक सत्ता–संस्कृति र नागरिक असन्तोषको विष्फोटको रूपमा चित्रण गरेको छ । सौराहामा शुक्रबार सुरु विस्तारित बैठकमा कार्यवाहक सभापति डोलप्रसाद (डीपी) अर्यालले प्रस्तुत राजनीतिक प्रतिवेदनमा रास्वपाले आफ्नो ‘निलो क्रान्ति’ को तयारीबीच जेनजीले ‘रातो क्रान्ति’ गरिदिएको टिप्पणी गरेको छ ।

अर्यालको भनाइमा, भदौ २३ र २४ गतेका घटनाहरू केवल सडकको आन्दोलन मात्र होइन, दशकौँदेखि थिचिएका नागरिक असन्तोषको सामूहिक विष्फोट थिए । उनले लेखेका छन्, ‘शासकहरूले आफ्नै भविष्य बरबाद पारे भन्ने तीव्र असन्तुष्टिले युवा पुस्ता मात्र होइन, सिंगो समाज परिवर्तनको निर्णायक शक्ति बन्न अघि सरेर जेनजी आन्दोलन भयो ।’

प्रतिवेदनका अनुसार, २३ गते आन्दोलन शान्त पार्ने घोषणा भइसकेको बेला सरकारको कठोर दमन र विद्यालय पोशाकधारी विद्यार्थीमाथिको गोलीकाण्डपछि आन्दोलन जनस्तरबाट पुनः प्रज्वलित भयो । ‘प्रधानमन्त्री केपी ओलीले जनको दुःख होइन, आफ्नै सुरक्षाको चिन्तामा राजीनामा दिएका हुन्’, अर्यालको प्रतिवेदनमा भनिएको छ । २४ गतेको विध्वंसमा राजनीतिक समूहहरूको योजनावद्ध सक्रियता देखिएको संकेत गर्दै उनले दुवै दिनका घटनाको निष्पक्ष छानबिन र दोषीमाथि कडा कारबाहीको माग गरेका छन् ।

रास्वपाले राजनीतिक विश्लेषण गर्दै भनेको छ, ‘तीन ठूला दलले संसदलाई सत्ताको ‘म्युजिकल चेयर’ बनाएर लोकतन्त्रको नाममा दलतन्त्रको आडमा नागरिक स्वतन्त्रतालाई कुच्याएपछि यस्तो विष्फोट अपरिहार्य थियो ।’ अर्यालले ठूला दलहरू—कांग्रेस, एमाले र माओवादी केन्द्रले आ–आफ्नो स्वार्थका लागि सत्ताको खेल खेल्दा जनआक्रोश चरममा पुगेको र जेनजी आन्दोलन त्यसैको परिणाम भएको ठहर गरेका छन् ।

‘हामीले मतमार्फत ‘निलो क्रान्ति’ ल्याउने सपना देखेका थियौं, तर जनअसन्तोषले त्यसअघि नै ‘रातो क्रान्ति’ गरिदियो’, प्रतिवेदनमा भनिएको छ, ‘तर त्यो आन्दोलनको म्यान्डेट संस्थागत गर्न अब निर्वाचन नै पहिलो र अनिवार्य प्रक्रिया हो ।’ रास्वपाले दलविहीन अन्तरिम सरकारलाई बाध्यताको उपज मानेको छ र राजनीतिक स्थायित्वका लागि जनमतको पुनः अभिव्यक्ति आवश्यक रहेको निष्कर्ष निकालेको छ ।