काठमाडौं । आगामी फागुन २१ गते हुने प्रतिनिधिसभा निर्वाचनका लागि मतदाता नामावलीमा नाम दर्ता गर्न सात दिन बाँकी हुँदा काठमाडौंस्थित जिल्ला निर्वाचन कार्यालयमा सर्वसाधारण उत्साहजनक सहभागिता देखिएको छ । केही समय सर्भरमा समस्या आउँदा केही भीड देखिए पनि नामावली दर्ता गर्न भने त्यति धेरै समय नलाग्ने र झन्झट नरहेको सहभागीहरुले जानकारी दिएका छन् । सेवाग्राही अंकित बरालका अनुसार पहिलो पटक मतदाता नामावलीमा नाम दर्ता गर्न पाउँदा खुशी लागेको बताइन् ।

आफू जेनजी पनि भएका कारण अब आउने नेतृत्व युवा हुनपर्ने र मतदानको लागि आफू पनि तयार भएको बताइन् । कार्यालयको सर्भरमा समस्या देखिए पनि धेरै समय लाइनमा बस्नु नपरेको उनले जानकारी दिइन् । मतदाता नामावलीमा नाम दर्ता गर्ने काम ७७ वटै जिल्लाबाट भइरहेको कारणले पनि सर्भरमा चाप बढेर केही समस्या देखिएको कार्यालयका सूचना अधिकारी सिर्जना रायमाझीले जानकारी दिइन् ।

तस्वीर : नेपाल फोटो लाइब्रेरी