काठमाडौं । नव नियुक्त प्रहरी महानिरीक्षक (आईजीपी) दानबहादुर कार्कीलाई दर्ज्यानी चिन्ह प्रदान गरिएको छ । गृह मन्त्रालयमा आयोजित समारोहमा गृह सचिव रामेश्वर दंगालले महानिरीक्षक कार्कीलाई दर्ज्यानी चिह्न (फुली) लगाइ दिएका हुन् । सोमबार बसेको मन्त्रिपरिषद् बैठकले कार्कीलाई ३३ औं आईजीपीमा बनाउने निर्णय गरेको थियो । आईजीपी चन्द्र कुवेर खापुङको ३० वर्षे सेवा अवधि बुधबार सकिएर उनी अनिवार्य अवकाशमा गएका थिए ।

आजबाट प्रहरी महानिरीक्षक (आईजीपी) दानबहादुर कार्कीले नेपाल प्रहरीको सर्वोच्च कमान्ड सम्हालेका छन् । गत कात्तिक २५ गते बसेको मन्त्रिपरिषद् बैठकले कार्कीलाई नेपाल प्रहरीको प्रमुखमा नियुक्त गर्ने निर्णय गरेको थियो । गृह मन्त्रालयमा दर्ज्यानी चिह्न लगाएपछि आज उनले प्रहरी प्रधान कार्यालयमा औपचारिक रूपमा पदभार ग्रहण गर्दैछन् । प्रहरी संगठनभित्र एक इमान्दार र अनुभवी अधिकृतको रूपमा परिचित कार्कीसँग विभिन्न चुनौतीपूर्ण जिम्मेवारी सम्हालेको अनुभव छ ।

डीआईजी रहँदा लुम्बिनी प्रदेशको कमाण्ड सम्हालेका उनले एसएसपीको रूपमा काठमाडौं जिल्ला प्रहरी परिसरको नेतृत्व गरेका थिए । सोही अवधिमा भुटानी शरणार्थी प्रकरण जस्ता संवेदनशील मुद्दाको सामना गर्नुपरेको थियो । भर्खरै, गत भदौ २४ मा काठमाडौं उपत्यकामा जेनजी आन्दोलन चर्कदा उपत्यकाको कमान्ड सम्हाल्ने जिम्मेवारी पनि उनकै काँधमा थियो ।

उपत्यका कमाण्ड सम्हाल्नुअघि उनी प्रहरी प्रधान कार्यालयको मानव स्रोत साधन विभाग प्रमुखको भूमिकामा थिए । कार्कीको पृष्ठभूमिमा कुनै ठूलो आर्थिक विवादमा नमुछिएको स्वच्छ छवि रहेको छ । उनले फिल्डको अनुभवदेखि आईजीपीको सचिवालयमा बसेर काम गरेको अनुभव समेत सँगालेका छन् । विदेशमा विभिन्न तालिम लिइसकेका उनी यसअघि नेपाल प्रहरीको केन्द्रीय प्रवक्ताको भूमिकामा समेत रहेका थिए । नेपाल प्रहरीले अहिले विभिन्न चुनौतीहरूको सामना गरिरहेको छ ।